မာၚ်တဝ်၊ နဝ်ဝေမ်ဗာ ၁၆
တၚ်ရန်တၟံညးဍုၚ်ကွာန်ရခေၚ် ကေုာံ ဒပ်ပၞာန်ရခေၚ် အဓိကမွဲ ညံၚ်ကောန်ဒပ်ကံၚ်ဇြဳပၞာန် မၞုံအပ္ဍဲဍုၚ်ရခေၚ်တံ ဂွံအိုတ်အးအိုဿီုဂှ် ညးတံ ဆက်ထ္မံက်ဒၟံၚ်ရုပ်ရဴရောၚ် AA ဟီုရ။
ပေါဲဗ္တိုက်အပ္ဍဲဍုၚ်ရခေၚ် မစလဝ် ပ္ဍဲသၞာံ ၂၀၂၃ ဂိတုနဝ်ဝေမ်ဗာ ၁၃ ဂှ်ဝွံ စဵုကဵုလုပ်ကၠုၚ်ပွိုၚ်မွဲသၞာံဂှ် အသိၚ်ယအ်စှ်ေအာဟွံမွဲ ဆက်သ္ကာတ်မြဟ်ဒၟံၚ် လၟေၚ်ဒဒှ်တ္ၚဲဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ပရေၚ်ပၞာန်ရခေၚ် ဒေသပလက်ဝပေၚ်မွဲသၞာံဂှ်ရ။
အပ္ဍဲပရေၚ်ပၞာန်ပွိုၚ်မွဲသၞာံဂှ် သီုကဵုဍုၚ်ချေၚ် ဍုၚ်ပလက်ဝ မပါလုပ် ပ္ဍဲကဵုဍုၚ်ရခေၚ် ၁၀ ပွိုၚ်ဍုၚ်ဂှ် ဒပ်ပၞာန်ရခေၚ် AA ထိၚ်ဒက်ဂွံလဝ်အိုတ်တုဲ ပွိုၚ်ဍုၚ်သှ်ေဒၟံၚ် ၇ ဂှ် သ္ဂောံဆက်သီအာ နွံဒၟံၚ်ရ။
ဥူဖေတာန် သၟာပရေၚ်ဍုၚ်ကွာန်ဝှ်ကြံၚ်ဂှ်တှ်ေ တၚ်ရန်တၟံပရေၚ်ပၞာန် ဟွံတုဲဒှ်ဏီတုဲ လ္ပာ်ဂကောံပၠန်ဂတးၝောံဍုၚ်ဏံ ဗီုလဵုချဳဒရာၚ်ကၠုၚ်ရောဟီုဂှ် ဒှ်တၚ်အဓိကတုဲ ယဝ်ရဍုၚ်ရခေၚ် ဗၠးၜးအာမ္ဂး သ္ပပဓာန်ကဵု AA တုဲ ကြက်ကၠောန်အာ တၚ်ရန်တၟံပရေၚ်ပၞာန်ညးတံအိုတ်ဏောၚ်ဂှ် သ္ၚဳဂၠိပ်လဝ်ရ။
“တၚ်ရန်တၟံပရေၚ်ပၞာန် ဒပ်ပၞာန်ရခေၚ်ဂှ်လေဝ် ဍိုက်ပေၚ်အာယျ အခိၚ်ဟီုဟွံဂွံဏီဂှ် ညးတံလေဝ် ဒက်ပ္တန်လဝ် ပရေၚ်ဆက်ဆောံမဟာမိတ်တံကီုရဏောၚ်။ ပ္ဍဲဒေသတၞဟ်ဟ် ဂကောံဇြဟတ်ပၠန်ဂတးၝောံဍုၚ်တံဂှ်တှ်ေ ချဳဒရာၚ်အာသာ်လဵုအိုတ်ရော။ အသိၚ်သ္ကာတ်တ် စဵုကဵုၜိုတ်လဵု ကၠောန်မာန်ဂှ်ရော။ ညအ်ဂှ်လေဝ် ပါလုပ်ဒၟံၚ် ပ္ဍဲတၚ်အဓိကရ။ ဟိုတ်ဂှ်ရ ဍုၚ်ရခေၚ်ဝွံ ယဝ်ရကံၚ်ဇြဳပၞာန်အိုတ်အးအာဏောၚ် ဟီုမွဲနဲပၠန် ယဝ်ရဗၠးၜးအာဏောၚ်ဟီုမ္ဂး ရံၚ်အကာဲအရာတုဲ ဒှ်သဘဴဒးချိၚ်ဆကၠောန်အာဂှ် နွံ။ ဂကောံဇြဟတ်ပၠန်ဂတးတံဂှ်တှ်ေ သ္ပပဓာန်ကဵု ဒပ်ပၞာန်ရခေၚ်တုဲ ကၠောန်ကၠုၚ်တၚ်ရန်တၟံ ပရေၚ်ပၞာန်ညးတံအိုတ်ဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
AA ဂှ်တှ်ေ အလုံဍုၚ်ရခေၚ်မွဲ ဂွံစိုပ်အာသ္ကေံတဲညးဍုၚ်ကွာန်တံ ဗွဲမပြဟ်မာန် ကောန်ဒပ်ကံၚ်ဇြဳပၞာန်တံ ဂွံအိုတ်အး သွက်တၚ်ရန်တၟံတံဏံဂှ် ထ္ပက်ပၞာန်ဗ္တိုက်ဒၟံၚ် ဗ္ဒိုပ်ဒပ်ပၞာန်သှ်ေဒၟံၚ်တံ မွဲတုဲမွဲဂှ် ကဵုလဝ်သမ္တီရ။
ဂွံသီအာဖအိုတ် သှ်ေဒၟံၚ်ညိညဏီ ပ္ဍဲကဵုဍုၚ်အာမ်၊ ဒံၚ်ကုတ်၊ ဂွ ကေုာံ ပ္ဍဲကဵုဍုၚ်မံၚ်တဝ်တံဂှ် ပေါဲဗ္တိုက်တံ သ္ကာတ်မြဟ်ဒၟံၚ်တုဲ ဍုၚ်မံၚ်တဝ် မဒှ်ဍုၚ်ပရေၚ်သွံရာန်ဗၞိက်ဂှ်တှ်ေ သှ်ေဒၟံၚ်ဗ္ဒိုပ်မၚ်ပယျဵု စၟတ် ၅ မွဲဓဝ်ရ။
ပ္ဍဲကဵုဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲဌာန်ဂအုပ်ပၞာန်ရးသ္ကုတ်ပလိုတ် ဖျေံသ္ဇိုၚ်ဍုၚ်အာမ်ဂှ်ဂမၠိုၚ် သ္ဂောံဆက်သီအာ သှ်ေဒၟံၚ် မပ္တံကဵု ဌာန်ဂအုပ်ပၞာန် နပခ၊ တမ်ဒပ်ပရေၚ်ဗ္တိုက်၊ တမ်ဒပ်ပရေၚ်ထံက်ပၚ်ပလံၚ်ဗစိုပ် ကေုာံ ဒပ်ပရေၚ်ဆက်စၠောံ တမ်ဒပ်အေန်ဂျေန်နဳယာဗလးတိတံဂှ်လေဝ် AA ထ္မံက်ဒၟံၚ်ပၞာန် ဗ္တိုက်ဒၟံၚ်ရ။
မွဲလ္ပာ်ဂှ်ပၠန် အပ္ဍဲကဵုဍုၚ်သီဂွံလဝ်ဖအိုတ်တံဂှ် နကဵုအလဵုအသဳပၠန်ဂတးညးဍုၚ်ကွာန်ရခေၚ် အဟိန်ဝေၚ်အာပၞာန်ထ္ပက်ဂှ် ပ္တိတ်ဇြဟတ်ရေၚ်တၠုၚ်ဒၟံၚ် ကမၠောန်ပရေၚ်ဒုၚ်ကာညးဍုၚ်ကွာန်တံဂှ်ရ တၚ်နွံပၟိက်ဂမၠိုၚ် နွံဒၟံၚ်ဖိုဟ်ဂှ် AA ကဵုသမ္တီလလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−AA