ဇြပ်ဗု၊ နဝ်ဝေမ်ဗာ ၁၆
အပ္ဍဲကဵုပေါဲဗ္တိုက် မက္တဵုဒှ်ဒၟံၚ် ပ္ဍဲဂကောံကွာန်ဗဒိုပ်ဇၞော် ပွိုၚ်ဍုၚ်ဇြပ်ဗု တွဵုရးဍုၚ်မန် ပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ် လ္ပာ်ကံၚ်ဇြဳပၞာန် ဗ္တိုက်ဒၟံၚ်ကဵုပၞာန်ကျာ ဟွံပိုတ်သ္ကုတ်ရောၚ် ဂွံတီကေတ် အတိုၚ်ဂလာန် ကောန်သ္ဂံၚ်ပၠန်ဂတး မပါလုပ်ဒၟံၚ် ပ္ဍဲပေါဲဗ္တိုက်ဗလးတိတံရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၈၀ ပြၚ်ပါဂှ်ဝွံ စနူဂိတုနဝ်ဝေမ်ဗာ ၅ တုဲကၠုၚ်တေံတုဲ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲဂကောံကွာန်ဗဒိုပ်ဇၞော်ဂှ်တုဲ က္တဵုဒှ်ဒၟံၚ်ပေါဲဗ္တိုက် ကုဒပ်ပံၚ်ကောံ ဂကောံဇြဟတ်ပၠန်ဂတးတံ လၟေၚ်ဒဒှ်တ္ၚဲရ။
အပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်လဝ် နူဂိတုနဝ်ဝေမ်ဗာ ၅ စဵုကဵုဂိတုနဝ်ဝေမ်ဗာ ၁၄ ပွိုၚ် ၁၀ တ္ၚဲဂှ် လ္ပာ်ကံၚ်ဇြဳပၞာန် ဗ္တိုက်ကၠုၚ်လဝ်ကဵုပၞာန်ကျာ ဟွံအောန်နူကဵု ၁၅ ဝါတုဲ အပ္ဍဲပေါဲဗ္တိုက်ဂှ် ၜါလ္ပာ်ဇီုကပိုက်ချိုတ်တံ နွံဒၟံၚ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲဂိတုနဝ်ဝေမ်ဗာ ၁၀ တုဲကၠုၚ်တေံဂှ် နူဒပ်ပ္ကတ်ပ္ကေၚ် စၟတ် ၄ ဖျေံသ္ဇိုၚ်ဇြပ်ဗုဂှ် ဒုသ္ကိုပ်ဗိုလ်ဇၞော်မွဲတၠ၊ သ္ကိုပ်ဗိုလ်မွဲတၠ မပါလုပ် ပိတၠ ချိုတ်အာလဝ်ရ။
ပ္ဍဲဂိတုနဝ်ဝေမ်ဗာ ၁၅ ဂှ် သ္ပကုသိုလ် ကောန်ဒပ်ကံၚ်ဇြဳပၞာန်ပိတၠ ပါလုပ်သီုကဵုဒုသ္ကိုပ်ဗိုလ်ဇၞော် မဒးပြဟ်လလုဲအာလဝ်ဂှ် မွဲတၠ ပ္ဍဲကဵုဍုၚ်ဒပ်ဇြပ်ဗုဂှ်ရောၚ် တမ်ရိုဟ်ပရိုၚ်သြၚ်လောန်တိုၚ်(မ်) နူကဵုအပ္ဍဲဒပ်ဂမၠိုၚ် ဟီုရ။
ဒပ်ကံၚ်ဇြဳပၞာန် မဒးဇီုကပိုက်ချိုတ်ဂၠိုၚ်ကၠုၚ် အပ္ဍဲပေါဲဗ္တိုက်ဂှ်ဝွံ ပ္ဍဲဂိတုနဝ်ဝေမ်ဗာ ၁၁ ဂှ်လေဝ် ထပ်ဗလးဏာလဝ် ဇြဟတ်ပၞာန်ရီု ၆၀ ပြၚ် နူကဵုဍုၚ်ဒပ်ဇြပ်ဗုဂှ်ရောၚ် ဂၠိုက်ဂၠါဲဂွံတီကေတ်ရ။
အတိုၚ်ဂလာန် ဂကောံဇြဟတ်ပၠန်ဂတးတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ ညံၚ်ဗ္ဒိုပ်ဗျူဟာအနာန်ကွေန် ဖျေံသ္ဇိုၚ်လှာဒကှ် ပ္ဍဲကဵုတွဵုရးကရေၚ်ဂှ် ဟွံဂွံစှ်ေအာဂှ် ဒှ်ကရောၚ်ပၞာန် မကဵုအာအရီုဗၚ်ပၞာန်ရောၚ် ဂွံတီကေတ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ နူကဵုကွာန်ဗဒိုပ်ဇၞော်၊ ဗဒဝ်ၜါ၊ ကွာန်လှာၜိုပ်၊ ကွာန်တၟိ၊ ပယဝ်ဟေဝ်တံဂမၠိုၚ် ကြပ်အလုံကွာန်မွဲ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပေါဲဗ္တိုက်ဏံဂှ် ဒပ်ပၞာန်ဗၠးၜးကောန်ဂကူကရေၚ် KNLA တမ်ဒပ်လၟိဟ် ၂၇ ၊ ကရောၚ်ပၞာန်ဒပ်ပၞာန်စဵုဒၞါညးဍုၚ်ကွာန် PDF မပ္တံကဵုကရောၚ်ပၞာန်ကၠဗု၊ ကရောၚ်ပၞာန်နဂါနဳတံ ပံၚ်တောဲဗ္တိုက်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု − CJ