သဵု(လ်) ၊ နဝ်ဝေမ်ဗာ ၁၆
က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန် သ္ကိုပ်သ္ကကၠောန်သ္ပလဝ် ပရေၚ်စမ်ၜတ်ဒရုၚ်ဒုၚ်ဂစိုတ်မွဲတုဲ သွက်ဂွံကၠောန်ပ္တိတ် ကဵုဂအုံဗွဝ် ဒဒှ်ရစၞောန်ပ္ညုၚ်လဝ်ဂှ် ဌာန်ပရိုၚ်ကၟိန်ဍုၚ်ပိုၚ် ထ္မံက်ထ္ၜးလဝ် ပ္ဍဲဂိတုနဝ်ဝေမ်ဗာ ၁၅ တေံရ။
လွဟ်အပ္ဍဲအကာသ ဒရုၚ်တံဏံဂှ် ယဝ်ရဆက်မိတ်ဏာ အလုံဂၠးမွဲမ္ဂး သဘဴဓဝ်ပရေၚ်ပၞာန်တံ ညံၚ်ဂွံဗဗွဲကဵုခေတ်ဍေံ သွက်ဂွံကၠောန်ကၠုၚ်ဂှ် နွံပၟိက်ကၠုၚ် ဇၞော်ကဵုပၟိက်ဏောၚ်ဂှ်လေဝ် က္ဍိုပ်သ္ကိုပ်ကေန် ဟီုရ။
အခိၚ်ကၠောန်သ္ပဒၟံၚ် ပရေၚ်ပံၚ်တောဲ လ္ပာ်ပရေၚ်ပၞာန် ကေုာံရုယှာ ဗွဲမပြဟ်ဂှ် ပ္ဍဲကဵုသၞာံဏံမံက်တေံ ကြဴနူကေန်ဂျုၚ်အာန် ကောပ်ကာဲကၠုၚ် ပရေၚ်စမ်ၜတ်ဒရုၚ်ဒုၚ်ဂစိုတ်ဂှ်တုဲဂှ် ပရေၚ်ခၞံဗဒှ်ဒရုၚ်သာ်ဏံတံဂှ် ကလိဂွံဒၟံၚ်အရီုဗၚ် နဲကွတ်ပညာ နူဇရေၚ်မဝ်သကိုဝ်ဟာ တၚ်သၟာန်သာ်ဏံတံ မံက်တိတ်ကၠုၚ်လဝ်ရ။
ဒရုၚ်ဗ္တိုက်ဒုၚ်ဂစိုတ် ဒၞါဲဒတန်သၞတံဂှ် ပ္ဍဲပေါဲပၞာန်ယူကရုၚ်ကီု ပ္ဍဲကဵုသ္ကုတ်လဒေါဝ်ဗၟံက်တေံကီုဂှ် သုၚ်စောဲဒၟံၚ် လှဲလှဲလးလးအိုတ်ရ။
ဂွံရပ်စပ်စကာအာ ဒရုၚ် သွက်ပရေၚ်ပၞာန်တံဂှ် အလုံဂၠးမွဲ ပရေၚ်ပြိုၚ်ပ္ကာန်တံ အသိၚ်သၠုၚ်တိုန်ကၠုၚ်ဒၟံၚ်တုဲ ပွမသုၚ်စောဲအပ္ဍဲပေါဲပၞာန်တံ ပရေၚ်အံၚ်ဇၞး နွံဒၟံၚ်ဟီုဂှ် သၞာဲဒဴစပ်ကဵုလ္ပာ်ပၞာန်ဂမၠိုၚ် သ္ဇက်ဒးသ္ပစၟတ်သမ္တီ နွံဒၟံၚ်ရောၚ် ဒဒှ်ရကေန်ဂျုၚ်အာန် ဟီုလဝ်ဂှ် ဌာန်ပရိုၚ် KCNA ကိုဝ်ရဳယျာသၟဝ်ကျာ ထ္မံက်ထ္ၜးလဝ်ရ။
ကိုဝ်ရဳယျာသၟဝ်ကျာ တတ်ကၠောံပယျဵုတုဲ သီုကဵုနန်သမ္မတ လ္တူဍုၚ်သဵု(လ်) ဂှ်မပါလုပ် ဒၞါဲပၟိက်ဇၞော် ပ္ဍဲဍုၚ်ကိုဝ်ရဳယျာသၠုၚ်ကျာတံဂမၠိုၚ်ဂှ် ပဝ်ယာန်လဝ် ဂၠိုၚ်ကဵုနာဍဳရ။
ဟိုတ်နူပြဝဏံတုဲ ကိုဝ်ရဳယျာသၠုၚ်ကျာ ဒးဖျေံစွံလဝ်လွဟ်လက်နက် သ္ဂောံပန်ဖျေံ ဒရုၚ်ကိုဝ်ရဳယျာသၟဝ်ကျာတံဂှ်ရ။
အကြာကိုဝ်ရဳယျာသၟဝ်ကျာကဵု ရုယှာဂှ် ထ္ပက်လဝ်စၟတ်တဲ တၚ်တုပ်စိုတ် စပ်ကဵုပရေၚ်စဵုဒၞါမွဲတုဲ သွက်ဂွံလုပ်ပေါဲဗ္တိုက် ကရောံဒပ်ပၞာန်ရုယှာဂှ် ဗလးဏာလဝ် ကောန်ဒပ်ပ္ဍဲယူကရုၚ် ဂၠိုၚ်ကဵုလ္ၚီရ။
ဟိုတ်နူအရီုဗၚ် နူကဵုကိုဝ်ရဳယျာသၟဝ်ကျာသာ်ဏံတုဲ ရုယှာတံ ကဵုအာအရီုဗၚ်နဲကွတ်ပညာပရေၚ်ပၞာန် သွက်ပျုၚ်ယာန်မာန်ဏောၚ် အရာမဒှ်ဓဝိၚ်ဂမၠိုၚ် မံက်တိတ်ဒၟံၚ်ရ။
နကဵုဒပ်ပၞာန်ကိုဝ်ရဳယျာသၟဝ်ကျာ သွက်ဂွံကၠောန်ပ္တိတ် ဒရုၚ်ဒုၚ်ဂစိုတ် ဟွံပိုတ်သ္ကုတ်ဂှ် နွံပၟိက်တုဲ ၜိုတ်သၟဟ်အစောံ ဂွံကၠောန်ပ္တိတ်အာ ကဵုဂအုံဗွဝ် ဗွဲမပြဟ်ဂှ် ဒဒှ်ရကေန်ဂျုၚ်အာန် ကဵုလဝ်စၞောန်ပၟိၚ်ဂှ် ပရိုၚ် KCNA ထ္မံက်ထ္ၜးလဝ်ရ။
Ref: Reuters