ဌာန်ဂအုပ်ပၞာန်ကီု သီုတံဒပ်ပၞာန် ဖျေံသ္ဇိုၚ်ရေဝ် ဒးဒုၚ်ဂြာတ်ထောံဖျေံဗုမ် ကဵုက္ၜၚ်ကျာမၞိဟ်ဒဳဟၟဲ

ရေဝ်၊ ဂျူလာၚ်(၁၆)

တွဵုရးဍုၚ်မန် ဌာန်ဂအုပ်ကောပ်ကာဲချဳဒရာၚ်ပၞာန် စၟတ် (၁၉) ကေုာံ တံဒပ်ကံၚ်ဇြဳပၞာန်လ္ၚဵုဂှ် ဗတိုက်ဂြာတ်ထောံဖျေံလဝ်ဗုမ် ကဵုက္ၜၚ်ကျာမၞိဟ်ဒဳဟၟဲရဂှ် ဂကောံဇြဟတ်ပၠန်ဂတးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

ပ္ဍဲဂိတုဂျူလာၚ် စၟတ်တ္ၚဲ (၁၄)တုဲကၠုၚ်တေံဂှ် စ.က.ခ (၁၉)ကံၚ်ဇြဳပၞာန်ကီု တံဒပ်ခလရ (၆၁) မၞုံပ္ဍဲဂၠံၚ်ရေဝ်-ထဝါဲ ကေုာံ ဒပ်အမၠံက် စၟတ် (၃၁၆)တအ်ဂှ် ဂကောံဇြဟတ်ပၠန်ဂတးတအ် ဂြာတ်ထောံဖျေံလဝ်ဗုမ် ကဵုက္ၜၚ်ကျာမၞိဟ်ဒဳဟၟဲရ။ 

ပရေၚ်ချဳဒရာၚ်ဏံ ဒှ်ပရေၚ်ဂြာတ်ထောံဖျေံလဝ်ဗုမ်ကဵုက္ၜၚ်ကျာ ဂကူ SF-Z (ညးဒဳဟၟဲ) အလန်ကိုပ်ကၠာအိုတ်ရဂှ် ညးတာလျိုၚ် Ye Air Force – Stealth Fighter ပါလုပ်ချဳဒရာၚ်လဝ် ပရေၚ်ပၞာန်ဂှ်မွဲတၠ ဟီုသ္ဂးလဝ်ရ။ 

ပရေၚ်ဗတိုက်ပန်ပှော်လၟုဟ်ဏံ သွက်ဂွံဓမံက်အာရုပ်ရဴ လၟေၚ်ကမၠောန်မဟာဗျူဟာ ဒေသပၞာန်လ္ပာ်သ္ကုတ်သၠုၚ်ကျာ – ၃ ဓမံက်လဝ်ရုပ်ရဴ တၚ်ရန်တၟံပရေၚ်ပၞာန်မွဲတၚ်ရဂှ် ညးဆက်ဟီုလဝ်ဏီရ။ 

ပရေၚ်ချဳဒရာၚ်ပၞာန်ဏံဂှ် ဒပ်ပံၚ်ကောံမဟာမိတ်ပၠန်ဂတးဖျေံသ္ဇိုၚ် မန်-တၞၚ်သြဳ ဒပ်ပၠန်ဂတးဍုၚ်မန် MSRF၊ YAF၊ YDF၊ တံဒပ် – ၂ ခရိုၚ်ထဝါဲ(T-5)၊ ကရောၚ်ပၞာန်ဒေါန ကေုာံ တံဒပ် ABSDF -၁ တအ် ပံၚ်တောဲချဳဒရာၚ်လဝ်ပၞာန်ရဂှ် ဂွံတီကေတ်ရ။ 

ဟိုတ်နူဗတိုက်ဂြာတ်ထောံဖျေံလဝ်ဗုမ် ကဵုက္ၜၚ်ကျာညးဒဳဟၟဲတုဲ ၜိုန်ပရေၚ်ဇီုကပိုက်လ္ပာ်ကံၚ်ဇြဳပၞာန် နွံကီုလေဝ် ဆက်လ္ၚတ်ဂၠိုက်ဂၠာဲဒၟံၚ် အကာဲအရာ ပ္ဍဲဗလးမုက်တိ သောဲသောဲဗြောဲဗြောဲရဂှ် ဒပ်ပံၚ်ကောံဂကောံဇြဟတ်ပၠန်ဂတးတအ် လလောၚ်တြးလဝ်ရ။ 

တွဵုရးဍုၚ်မန် ပွိုၚ်ဍုၚ်ရေဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် ဒှ်ဒေသဂကောံဇြဟတ်ပၠန်ဂတး ဇြဟတ်ခိုဟ်ဒၟံၚ်မွဲဒေသတုဲ ဟိုတ်နူတံဒပ်ကံၚ်ဇြဳပၞာန် ကေုာံ ဗဒိုပ်ဒပ်ကံၚ်ဇြဳပၞာန် ဒးဒုၚ်ဗတိုက်ဒၟံၚ်ခြာဟွံလအ်ဟွံလအ်တုဲ ပတေၚ်ဂြတ်လဝ် ပရေၚ်ဂီုကၠီုဗွဲတၟေၚ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ်-Ye Air Force