လံၚ်လုၚ်၊ ဂျူလာၚ်(၁၆)
ရးဒေသဇၞော်တၞၚ်သြဳ၊ ပွိုၚ်ဍုၚ်လံၚ်လုၚ်၊ နူဒပ်ကံၚ်ဇြဳပၞာန် ဖျေံလဝ်ဗဒိုပ် လ္တူဒဵုကွာန်နာခါန်တဝ်ဂှ် ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲကွာန်တအ်တုဲ ညးဍုၚ်ကွာန် (၃၀၀၀)ပြၚ် ဒးဂြိပ်ဒဴဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျူလာၚ် စၟတ်တ္ၚဲ (၁၄) တုဲကၠုၚ်တေံ အခိၚ်ဒေါဝ်တ္ၚဲဂှ် နူကဵုဒပ်စဵုဒၞာညးဍုၚ်ကွာန် အာစိုပ်ဗတိုက်လဝ် ဒပ်ကံၚ်ဇြဳပၞာန် ဖျေံလဝ်ဗဒိုပ် လ္တူဒဵုကွာန်နာခါန်တဝ်ကဵုလွဟ်ဇၞော်တုဲဂှ် လ္ပာ်ကံၚ်ဇြဳပၞာန် ပန်ဖျေံနၚ်လွဟ်ဇၞော် ပ္ဍဲကွာန်အဆက်ဟွံပိုတ်သ္ကုတ်ရ။
ဟိုတ်နူလွဟ်ဇၞော်ဒပ်ကံၚ်ဇြဳပၞာန်ပန်ဖျေံလဝ်တုဲ ညးဒေသ နူကွာန် (၆) ကွာန် ပါလုပ် သီုကွာန်နခါန်တဝ်၊ ခမောၚ်တောၚ်၊ တောၚ်မေန်ပျောၚ်၊ မေဝ်အုမ် နောက်၊ ထုၚ်တွောန်၊ သခါန်ဂျဳ ၜိုတ် ၃၀၀၀ ပြၚ်တအ် ပၠံၚ်လမျီု ဒးဂြိပ်ဒဴပါဲဒၟံၚ် ပ္ဍဲဒၞာဲဗၠးဘဲရ။
ဒပ်ကံၚ်ဇြဳပၞာန်ပန်ဖျေံဒၟံၚ်လွဟ်ဇၞော်ဂှ် သ္ပတံနူ ဂိတုဂျူလာၚ် စၟတ်တ္ၚဲ (၁၂) ကြဴနူထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်တုဲဂှ် လုပ်စိုပ်ဖျေံလဝ်ဗဒိုပ် လ္တူဒဵုကွာန်နာခါန်တဝ်ရ။
ဃောဒပ်ကံၚ်ဇြဳပၞာန် ထ္ပက်ကရောၚ်ပၞာန်ဂှ် ဟိုတ်နူပန်ဖျေံလဝ်လွဟ်ဇၞော်ကြာန်န်တုဲ သၟတ်ဗြဴအာယုက် (၁၆) သၞာံ နူကွာန်ခမောၚ်တဝ် (၁) တၠ ဒးလွဟ်ဇၞော်တုဲ ဒးချိုတ်လဝ်ကီု ညးတြုံမွဲတၠလေဝ် ဇီုကပိုက် ဂွံလဝ်ဘဲဝပ်ရ။
ပ္ဍဲပွိုၚ်ဍုၚ်လံၚ်လုၚ်ဂှ် သ္ပတံနူဂိတုဂျူလာၚ်မံက်တုဲ ဟိုတ်နူဒပ်ကံၚ်ဇြဳပၞာန် ထ္ပက်လုက်ဒၟံၚ်ကရောၚ်ပၞာန် ပ္ဍဲကွာန်ဂှ်ရ ကဵုအကြာဒပ်ပံၚ်တောဲစဵုဒၞာဒေသတအ် ပရေၚ်ပၞာန်ၜါလ္ပာ် သ္ကာတ်မြဟ်ဒၟံၚ်ရ။
ရးဒေသဇၞော်တၞၚ်သြဳဂှ်မ္ဂး ပ္ဍဲဂိတုဂျောန်တုဲကၠုၚ်တေံဂှ် မ္ၚးနူပေါဲဗတိုက်ၜါလ္ပာ်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဍုၚ်ကွာန် ၂၅၀၀၀ ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသနတအ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ
sanlontai