ဍာ်ဗု၊ ဂျူလာၚ်(၁၆)
ရးဒေသဇၞော်တၞၚ်သြဳ၊ ပွိုၚ်ဍုၚ်ဍာ်ဗု၊ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဒေသနဘုလေဝ်ဂှ် ရပ်ကေတ်ဏာညးဒေသ နဒဒှ်ဒေၚ်ဒုၚ်ဒၞာမၞိဟ် ပ္ဍဲမွဲဒမြိပ်ဂၠံၚ်ဇက်တိုန်ကၠုၚ် ဟွံအောန်နူ (၁၀)တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳ ဇြဟတ်မၞုံ (၁၂၀)ပြၚ်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၅) အခိၚ်နူဂယးပြဟ် ဃောတတ်အာဗ္ဒာဲကွာန်ကဒေတ်အိုၚ်ဂှ် ရပ်ကေတ်လဝ် ညးဒေသ မံၚ်တန်တဴဒၟံၚ်ပ္ဍဲကၠအ်ဥဒျာန်တအ် နဒဒှ်ဒေၚ်ဒၞာဒုၚ်မၞိဟ်ရ။
ပၞောဝ်ကဵုညး ဒပ်ကံၚ်ဇြဳပၞာန်ရပ်ကေတ်လဝ်ဂှ် ညးတြုံ ကေုာံ ညးဗြဴတအ်ပါလုပ်တုဲ ညးတအ်ဂှ် ဒှ်သၟာကမၠောန်ကၠအ်ဥဒျာန်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ကြဴနူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ရပ်ကေတ်ဏာ ညးဒေသတအ် နဒဒှ်ဒေၚ်ဒၞာဒုၚ်မၞိဟ်တုဲဂှ် ဆက်တိတ်အာ လ္ပာ်ကွာန်ဨကနိကဵု ကွာန်ခမောက်ချောၚ်တေံရ။
ဂေတ်ဂေၚ် ဒေသနဘုလေဝ် လၟေၚ်ကွာန်တုဲ ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ဂှ်ရ ညးဒေသ နူကွာန်ဨကနိ၊ ခမောၚ်ချောၚ်၊ ကဒေတ်အိုၚ်ဗွဲမဂၠိုၚ် ဒးဂြိပ်ဒဴပါဲဓလေတ်ဒၟံၚ်ရ။
ၜိုန်ရကရောၚ်ပၞာန်ကံၚ်ဇြဳ ထ္ပက်ဒၟံၚ်ကရောၚ်ပၞာန်ကီုလေဝ် စဵုကဵုဂိတုဂျူလာၚ် စၟတ်တ္ၚဲ (၁၅) ပေါဲဗတိုက်က္တဵုဒှ်လဝ် ဟၟဲဏီကီုလေဝ် ပရေၚ်ပၞာန်ၜါလ္ပာ် ကြံၚ်မ္ၚိုဟ်သ္ကာတ်မြဟ်ဒၟံၚ်ရဂှ် ဂကောံဇြဟတ်ပၠန်ဂတးတအ် ဟီုသ္ဂးလဝ်ရ။
ပ္ဍဲဂိတုဂျူလာၚ် စၟတ်တ္ၚဲ (၁၁) တုဲကၠုၚ်တေံလေဝ် ရေၚ်ယာဉ်ကွဳစက်ကံၚ်ဇြဳပၞာန် ကၠုၚ်စိုပ်သၞေဟ်ဍာ်ဒမျိုဟ်ထဝါဲ ဒေသနဘုလေဝ်ဂှ် ဒးဒုၚ်ကြတ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၃)တၠ ဒးချိုတ်လဝ်တုဲ ဂွံလဝ်ဘဲဝပ် (၄)တၠဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai