သုၚ်စောဲကုဒ်ဓလေတ်တုဲ ကြုက် ကၠတ်ကေတ်လဝ် E-Mail အေဂျေန်ဇြဳ အလဵုအသဳအမေရိကာန်

ဝါယှေန်တာန်- ဂျူလာၚ်(၁၆)

ဟက်ကာကြုက်တအ် သုၚ်စောဲ ပၠုပ်စုတ်ကုဒ်ဓလေတ် ပ္ဍဲ Microsoft တုဲ ညံၚ်ဂွံကၠတ်ကေတ်အဳမေလ် အေဂျေန်အလဵုအသဳ ကေုာံညးသုၚ်စောဲအဳမေလ်တအ် ကၠောန်သ္ပလဝ်ရဂှ် ညးတာလျိုၚ်တအ် ဟီုသ္ဂးလဝ်ရ။

ဂိတုဂျူလာၚ် စၟတ်တ္ၚဲ (၁၄)တုဲကၠုၚ်တေံဂှ် ပ္ဍဲတၚ်လလောၚ်တြးကုမ္ပဏဳမွဲတၚ်ဂှ် ဟက်ကာကြုက်တအ် ကၠောန်သ္ပလဝ် ညံၚ်ကုဒ် Microsoft ဂွံယောၚ်ယာတုဲ ပ္တိတ်လဝ်ဇြဟတ် သွက်ဂွံကၠောန်ရေၚ်တၠုၚ်ချဳဒရာၚ် ပရေၚ်ထံၚ်ပရိုၚ်သိုက်ဗာရ။

အကာဲအရာဏံ ဇီုကပိုက်ဒး ကမၠောန်ပရေၚ်ဂီုကၠီုသိုက်ဗာ ကေုာံ ပရေၚ်ဆက်ဆောံ အမေရိကာန်-ကြုက်ရဂှ် ဟီုသ္ဂးလဝ်တုဲ အလဵုအသဳကြုက်ဂှ်မ္ဂး စပ်ကဵုကမၠောန်ပြဝဏံတုဲ ပါလုပ်ဆက်စပ်ဒၟံၚ်ဟၟဲရဂှ် ဟီုတးပါဲလဝ်ရ။

Microsoft ကေုာံ ညးပိုၚ်အဝဵုအမေရိကာန်တအ်ဂှ် ဟက်ကာဆက်စပ်ဒၟံၚ်ကဵုအလဵုအသဳကြုက်တအ် သ္ပတံနူဂိတုမေတုဲ ကေၚ်ပၞုက်ဓလုက်ပ္တိတ်လဝ်ဇြဟတ် သွက်ဂွံလုပ်စိုပ် အကံက်အဳမေလ် ဂကောံ (၂၅) ဂကောံ ကေၚ်နွံကၠုၚ်တုဲ ပ္ဍဲကဵုဂှ် အေဂျေန်အလဵုအသဳ (၂)အေဂျေန်လေဝ် ပါလုပ်ဒၟံၚ်ရဂှ် ဟီုသ္ဂးလဝ်ရ။

လၟုဟ်ဏံမ္ဂး စပ်ကဵုတၚ်ပ္တဝ်က္ဍိုပ်ဟက်ကာတအ်တုဲ ၜိုန်ရလ္ပာ် Microsoft ဟွံဂွံဓမံက်ထ္ၜးလဝ်ကီုလေဝ် ဌာနအလဵုအသဳအမေရိကာန်၊ ဌာနပရေၚ်ကူသာန်သွံရာန်ပရေၚ်ပိုန်ဒြပ် ကေုာံ ညးစၞးကၠတ်ထဝ်သၟဝ် ပါလုပ်ဒၟံၚ် ဒးဒုၚ်ဟက်လဝ် နွံဗွဲမဂၠိုၚ်ရဂှ် ဂွံတီကေတ်ရ။

ဝန်ဇၞော်ပရေၚ်ဍုၚ်သ္အာၚ်အမေရိကာန် အခိၚ်ဆဵုဂဗကဵု ကလုတ်တမာန်ကြုက်ကဆံၚ်သၠုၚ်အိုတ် ပ္ဍဲကောံဓရီုဂျာကာတာဂှ် ပ္ဍဲလ္တူတၚ်ကၠောန်ရေၚ်တၠုၚ်ပ္တဝ်ဒၟံၚ်က္ဍိုပ် ကုအလဵုအသဳမေရိကာန်၊ ကုမ္ပဏဳ ကေုာံကောန်ဍုၚ်တအ်ဂှ် ဒးဒှ်ဒၟံၚ်ဓဝိၚ်ဗွဲတၟေၚ်တုဲ ညံၚ်ပရေၚ်ကေတ်လျိုၚ် ပရေၚ်ဒုၚ်လျိုၚ်ဂွံနွံ လ္ပာ်ညးတအ် ရေၚ်တၠုၚ်အာ တၚ်ထေက်ကဵုကၠောန်ရေၚ်တၠုၚ်ရောၚ်ဂှ် ဟီုသ္ဂးလဝ်ရ။

သ္အာၚ်နူဂှ်ပၠန် သွက်ဂွံစၟဳစၟတ်ကဵု ပရေၚ်ပလေဝ်ပလေတ်ဂီုကၠီုဇကုဂှ် အာတ်မိက်လဝ် Microsoft မဒှ်ကုမ္ပဏဳဖျေံသ္ဇိုၚ်ဝါယှေန်တာန် သွက်ဂွံကၠောန်ရေၚ်တၠုၚ်ကဵု ပရေၚ်စၟဳစၟတ်ပရေၚ် ဂီုကၠီုဒေတ်ဂျေတ်ဒေဝ်ကီု ပရေၚ်ရေၚ်တၠုက်ကဵုဂှ်လေဝ် ညံၚ်ဂွံပိုၚ်ခြာကဵု ဗွဲမသက္ကုၚုဟ်မးဂှ် ညးပိုၚ်အဝဵု ကေုာံ အမာတ်ချူဓဇက်သၞောဝ်တအ် အာတ်မိက်လဝ်ရ။

Ref: Reuters