ပ္ဍဲကဵုဍုၚ်မတ်မလီု မပတေၚ်ဂြတ်လဝ် ပရေၚ်ဂီုကၠီုဂှ် ပရေၚ်ဂစိုတ်ဂယိုၚ်ပၠံၚ်ၜးတံ ဒှ်ကၠုၚ်အဆက်က်

မတ်မလီု၊ ဂျူလာၚ် (၁၆)

ပ္ဍဲကဵုဍုၚ်မတ်မလီု ဍုၚ်ဇၞော်တွဵုရးဍုၚ်မန် မပတေၚ်ဂြတ်လဝ် ပရေၚ်ဂီုကၠီုဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ပရေၚ်ဂစိုတ်ဂယိုၚ်မၞိဟ်တံ ဒှ်ကၠုၚ်အဆက်က်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျူလာၚ် (၈) တေံ ဗ္ဒါဲစမြိုၚ်မၞိဟ်ဟွံမံၚ် လ္တူရေၚ်ဒဵုမတ်မလီုဂှ် ဂစိုတ်လဝ်မၞိဟ်တြုံမွဲတၠတုဲ လၟေၚ်ဒဒှ်ပၠံၚ်ၜးဏာလဝ် သီုကွဳလိုန်ဓာတ် သီုဖုၚ် သီုကပေါတ်လ္ၚဵုလ္ၚဵုတံ က္တဵုဒှ်လဝ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် ၁၀ အခိၚ်ဇိုၚ်သဝ်တ္ၚဲဂှ်လေဝ် ပ္ဍဲကဵုတၞုၚ်ကၠအ်ထၜိုတ် မၞုံအရာပ်(စမ်းကြီး) ဂှ် ၜုၚ်တက်လဝ်မၞိဟ်တြုံမွဲတၠတုဲ လၟေၚ်ဒဒှ်ပၠံၚ်ၜးဏာလဝ် ကွဳလိုန်ဓာတ်၊ ဖုၚ်တံ က္တဵုဒှ်လဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။

လၟေၚ်ဒဒှ်ပၠံၚ်ၜးကပေါတ် ဂစိုတ်ဂယိုၚ်မၞိဟ်တံဂှ်ဝွံ အပ္ဍဲသၞာံဏံ ဒှ်ဂၠိုၚ်ကၠုၚ်တုဲ ပၠံၚ်ၜးကွဳလိုန်ဓာတ်တံ ၜုၚ်တက်တုဲ ပၠံၚ်ကပေါတ်တံသၟးဟွံက သီုကဵုကၠတ်ကွဳလိုန်ဓာတ်တံဂှ်လေဝ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။

ညးဒေသမတ်မလီုမွဲတၠဂှ် ပရေၚ်ဂစိုတ်ဂယိုၚ်မၞိဟ်ဂမၠိုၚ်ဝွံ ဗွဲကြဴဏံ က္တဵုဒှ်ကၠုၚ် အဆက်က်ကီုလေဝ် လ္ပာ်ကံၚ်ဇြဳပၞာန်ဂှ် စဵုကဵုထ္မံက်ပ္တိတ်ကေတ်အရေဝ် ဟွံမွဲ အောန်ကြဳဒၟံၚ်ဂှ် ဟီုရ။

“အဓိကဂှ်တှ်ေ ပရေၚ်ပိုန်ဒြပ်ကြေပ်ဂြတ်ကၠုၚ်ရ။ တန်တဴကဵု လ္တူကမၠောန်ကၟိတ် အောန်ကြဳကၠုၚ်ဂှ်တုဲ ပရေၚ်ပၠံၚ်ၜးကၠတ်ဂၠံၚ်တံဂှ် သာဂၠိုၚ်ကၠုၚ်ရ။ အခိၚ်ဇိုၚ်သဝ်တ္ၚဲတံဂှ်တှ်ေ ဂၠိုၚ်အိုတ်ရ။ ပရေၚ်ဒးဒုၚ်ပၠံၚ်ၜးကွဳလိုန်ဓာတ်တံ ဒှ်တုဲ ဒးဒုၚ်ကၠတ်ကွဳလိုန်ဓာတ်တံလေတ် ဂၠိုၚ်ဒၟံၚ်ဏောၚ်။ ပၠံၚ်ၜးကေတ်တုဲ သီုကဵုဂၠါဲသၞအန္တရာယ်လမျီုမၞိဟ်တံဏောၚ်။ လၟေၚ်ဒဒှ်သာ်ဏံတံဂှ် ဒှ်ကၠုၚ်ဒၟံၚ်စေအ်အ်ဂှ် ဂွံဆဵုကေတ်ရ။ CCTV တံဂှ်တှ်ေ ပြးဒၟံၚ်အလုံဍုၚ်မွဲရ။ ပၟတ်ပၠိုတ်မ္ဂးတှ်ေ စုတ်လဝ်သီုသိုလ်ဠာဏောၚ် ဟီုဒၟံၚ်အိုတ်ရ။ အေ ဂှ်တှ်ေ ဟွံဂၠါဲပ္ဍဲ CCTV မွဲသာ် တုဲအာအတိုၚ်ဏံနွံတုဲ အဲထေၚ်ဂှ်တှ်ေ ရပ်တၠဒုဟ်တံ ဟွံဂွံပုဟ်ဂှ် ဂွံတီကေတ်ရ” သာ်ဝွံ သ္ဂးရ။

ပ္ဍဲဍုၚ်မတ်မလီုဂှ် ဒပ်ကံၚ်ဇြဳပၞာန်ဝွံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ပ္ဍဲကဵုဂၠံၚ်လုပ်တိတ်ဍုၚ်တံဂှ် သၠုၚ်ပ္တိုန်လဝ် ပရေၚ်ဂီုကၠီုတုဲ ဂေတ်ကၚ်ကေတ်ဂီုကၠီု သီုဗ္တံသီုတ္ၚဲတံကီု၊ ဂၠိုက်ဂၠါဲစၟဳတ်တံကီုဂှ် ကၠောန်ၜိုတ်ဒၟံၚ်ရ။

သ္အာၚ်နူဂှ်ပၠန် သွက်ပရေၚ်ဂီုကၠီုညးဍုၚ်ကွာန်တံဂးတုဲ ပ္ဍဲကဵုအလုံဍုၚ်မတ်မလီုမွဲဂှ် စုတ်လဝ်ကေမ္မရာ CCTV တံကီုလေဝ် ရပ်ရဲတၠဒုဟ်တံ ဟွံဂွံဂှ် ပ္တိတ်ဒၟံၚ်သၟာန်ညးသ္ကအ် နွံဒၟံၚ်ရ။

ညးဒေသမတ်မလီုမွဲတၠပၠန်ဂှ်လေဝ် သွက်ဂွံတိတ်ကၠုၚ်အာမ္ၚးဂှ် ဒးဂွိၚ်ဒၟံၚ်တုဲ ဒၟါနူအကာဲအရာ ဂီုကၠီုဟွံမွဲဂှ်ရ စွံသတိဗွဲတၟေၚ်တုဲ ဒးအာကၠုၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကၠာတေံဟီုမ္ဂး ပိုယ်တံတိတ်မ္ၚးတှ်ေ ၜိုတ် (၉) နာဍဳ (၁၀) နာဍဳလေဝ် ပြေပြံၚ်ဒၟံၚ်ဏောၚ်။ ပြသၞာဟွံမွဲပုဟ်။ လၟုဟ်ဂှ် လဆောဝ်လဆောဝ် ဇကုအခိၚ်ကၠောန်ဒၟံၚ်ကမၠောန်ဂှ် စိုတ်ပါအာပ္ဍဲကမၠောန်တုဲ အခိၚ်စဴသ္ၚိလဇုဲအာမ္ဂး ဒးဂွိၚ်ဒၟံၚ်နွံရ။ အခိၚ်လဵုဒှ်ဒှ် ပရေၚ်စသုၚ်မံၚ်စံၚ်ခက်ခုဲကၠုၚ်မ္ဂး မၞိဟ်ကၠောန်ဂှ်လေဝ် မဂွံမဂြဲရဏောၚ်။ လဆောဝ်လဆောဝ် မၞိဟ်ကြအ်ဒၟံၚ်ဂဥုဲၜူမာဲတံဂှ်လေဝ် အခက်အခုဲဍေံနွံဒၟံၚ်ကီုဏောၚ်။ ဟိုတ်ဂှ်ရ နကဵုအဲ သတိဂှ် ဒးစွံဇၞော်ဇၞော်တုဲ ဒးအာကၠုၚ်ဒၟံၚ်ဂှ် နွံရ။ ဒး(မီးပွိုင့်) တုဲ ဒးဒေါအ်ကွဳမ္ဂးလေဝ် ဒးမၚ်ကျောဝ်ဒၟံၚ် လ္ပာ်တေံ လ္ပာ်ဏံလၟိုန်ဏောၚ်။ အခိၚ်လဵု မုပဏာဇကုဟီုဂှ် ဒးမၚ်ကျောဝ်ဒၟံၚ်လၟိုန်ဏောၚ်။ သတိပိုတ်အာဟွံဂွံပုဟ်” သာ်ဝွံ သ္ဂးရ။

မၞိဟ်မကလိလောန်ဒၟံၚ် ပွပၠံၚ်ၜး ဂစိုတ်မၞိဟ် မက္တဵုဒှ်ဒၟံၚ် အပ္ဍဲဍုၚ်မတ်မလီု ဗွဲမဂၠိုၚ်ဂှ်ဝွံ ဒက်ဂကောံတုဲ ကၠောန်ကၠုၚ်ညးသ္ကအ်အိုတ်တုဲ ၚုဟ်မးနွံညိဓဝ်ဂှ် ဂၠါဲကၠုၚ်သၞ ကုအန္တရာယ်လမျီုတံဂှ်ရ ဘဝညးဍုၚ်ကွာန်တံ ဂီုကၠီုဟွံမွဲ ဒှ်ကၠုၚ်ဒၟံၚ်ရ။

ဟိုတ်နူပရေၚ်ကၠတ်ဂၠံၚ်ပၠံၚ်ၜးသာ်ဏံတုဲ ၜိုန်ရအာတေၚ်ဇရေၚ်ကံၚ်ဇြဳပၞာန်တံကီုလေဝ် ဟိုတ်နူထ္မံက်ပ္တိတ်ရပ်ကဵု ညးမကလိလောန်ဒုဟ်ဒဏ်တံ ဟွံမွဲဂှ်ရ ညးဍုၚ်ကွာန်တံဝွံ ဒးဂဗဒၟံၚ် အကာဲအရာ ညးဒးညးဒုၚ်ရောၚ်ဂှ် ဂွံတီကေတ် ဇရေၚ်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−Bo Bo Win