ပ္ဍဲကဵုဒေသတွဵုရးဍုၚ်မန်လ္ၚဵုတံဂှ် ကောန်သ္ဂံၚ်ဗော်ဍုၚ်မန်တၟိတံ ကေတ်ဂီုကၠီုဂေတ်ဒၟံၚ်ကၚ် နွံဒၟံၚ်

မုဟ်ဍုၚ်၊ ဂျူလာၚ် (၁၆)

ကောန်သ္ဂံၚ်ဒပ်ပၞာန်ဗၠးၜးကောန်ဂကူမန် MNLA ဗော်ဍုၚ်မန်တၟိတံဝွံ ကေတ်ကၠုၚ်ဂီုကၠီု ဂေတ်ကၠုၚ်ကၚ် ပ္ဍဲကွာန် နူကဵုပွိုၚ်ဍုၚ်ပိပွိုၚ်ဍုၚ် မၞုံတွဵုရးဍုၚ်မန်တံကဵု လ္တူဂၠံၚ်ကွဳစက်တံ နွံကၠုၚ်ဂှ် ဂွံတီကေတ် ဇရေၚ်ညးသေတံရ။

စနူဂိတုဂျူလာၚ် သတ္တာဟဒုတိယတုဲ ပ္ဍဲကဵုသ္ကုတ်သၠုၚ်ကျာပွိုၚ်ဍုၚ်မုဟ်ဍုၚ် ကွာန်လ္ၚဵုတံကဵု မွဲဒမြိပ်ကွာန်ဝၚ်ဒုန် ဂၠံၚ်ကွဳစက်မုဟ်ဍုၚ်−ဇြပ်ဗုဂှ် ကေတ်ဂီုကၠီု ဂေတ်ကၠုၚ်ကၚ် နကဵုကယျိုၚ် ပၞာန်ပေၚ်ၚ်ရ။

သ္အာၚ်နူဂှ်ပၠန် ပ္ဍဲကဵုလ္ပာ်ဍုၚ်ခေါဇာ ပွိုၚ်ဍုၚ်ရေဝ် ဒၞါဲဂကောံဒပ်စဵုဒၞါညးဍုၚ်ကွာန်တံ ချဳဒရာၚ်ဇြဟတ် ခိုဟ်ဒၟံၚ်ဂှ် လောန်ကၠုၚ်ပိဂိတုတေံ ကောန်သ္ဂံၚ် ဒပ်ပၞာန်ဗၠးၜးကောန်ဂကူမန် MNLA တံ ကေတ်ဂီုကၠီု ဂေတ်ကၠုၚ်ကၚ်ချဳဒရာၚ်တံ နွံလဝ်ရ။

ဗွဲကြဴဂှ် ပ္ဍဲကဵုကွာန်အနၚ် မၞုံအပ္ဍဲပွိုၚ်ဍုၚ်ဇြပ်ဗုကဵု ဗ္ဒါဲကွာန်ဝါဂၠံၚ်ဂှ် ဖျေံဇြဟတ်ဒပ်တုဲ ကေတ်ဒၟံၚ်ဂီုကၠီုတံ နွံဒၟံၚ်ဂှ် ဂွံတီကေတ် ဇရေၚ်ပရိုၚ်တမ်ရိုဟ်ပ္ဍဲဒေသတံရ။

ညးဒေသမန်မွဲတၠဂှ် ဗော်ဍုၚ်မန်တၟိ သွက်ဂွံရေၚ်တၠုၚ်သာ်ဏံဂှ် ဒှ်သဘဴကေတ်လဝ်တၚ်တုပ်စိုတ် ပ္ညဳပ္ညပ်လဝ် ကုဂကောံဇြဟတ်ပၠန်ဂတးတံသၟးဟွံက သီုကဵုကံၚ်ဇြဳပၞာန်တံ နွံတုဲ ညးဍုၚ်ကွာန်တံ ညံၚ်လမျီုပိုန်ဒြပ်အရပ်ရာ ဂွိုအ်ဆောံလေၚ်ဂှ် လ္ပာ်သ္ပမာန်တံရောၚ် ကၠောန်ၜိုတ်လဝ်ရောၚ်ဂှ် ဟီုရ။

“ကေတ်ကဵုဂီုကၠီု ၁၀၀ တၟံကၠံ ပေၚ်ၚ်မာန်ဟာဟီုဂှ် နကဵုအဲ ကဵုမာန်ဏောၚ်ဂှ် ဟွံစှ်ေစိုတ်ပုဟ်၊ ဆ္ဂးလေဝ် ၜိုတ်ဒးရးရ။ ညးတံဂှ်လေဝ် ပ္ညဳပ္ညပ်ကဵု ဂကောံဇြဟတ်ပၠန်ဂတးတံ၊ လ္ပာ်စကစတံတုဲ ဒှ်သဘဴဆက်သ္ဂောံ ကၠောန်အာ နွံဂှ် အဲထေၚ်ကေတ်ရ။ ညးတံဂှ် ကုဂကောံဒပ် မကၠောန်ဒၟံၚ်ပၠန်ဂတးတံဂှ် အာစိုပ်စဵုဒၞါကဵု စၞးကံၚ်ဇြဳပၞာန်ဟွံသေၚ်ပုဟ်။ နကဵုအဲတှ်ေ အကြာသီုၜါလ္ပာ် ညံၚ်ဂွိုအ်ဒှ်ပေါဲဗ္တိုက်ကီု ညးဍုၚ်ကွာန်ညးတံ ညံၚ်လမျီုဒြပ်ရတ် ဂွိုအ်ဆောံလေၚ်ကီု လ္ပာ်သ္ပမာန်ဂှ် အတိုၚ်ပၟိက်ညးဍုၚ်ကွာန်တံ လုပ်ကၠုၚ်လဝ်ဏောၚ်” သာ်ဝွံ ညးသ္ဂးရ။

အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဏံ နကဵုဗော်ဍုၚ်မန်တၟိ မရပ်ဂန်လဝ် ပြသၞာပရေၚ်ဍုၚ်ကွာန် သွက်ဂွံသောၚ်ကလး နနဲပရေၚ်ဍုၚ်ကွာန်ဂှ် ကေတ်ဒၟံၚ်ဂီုကၠီု အပ္ဍဲဒေသပေါဲဗ္တိုက်ဟွံက္တဵုဒှ်တံဂှ် အကြာညးဍုၚ်ကွာန်မန်တံ ရမျာၚ်ပါ်ပါဲဒၟံၚ်တံ တိတ်ဒၟံၚ်ရ။

နာဲသဳရဳမန်ဆာန် ဥက္ကဌ ကမ္မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဒပ်စဵုဒၞါဍုၚ်မန် (MSDF) ဂှ် နကဵုဗော်ဍုၚ်မန်တၟိ ဟိုတ်နူပရေၚ်ဗျိပၠုတ် ကဵုပွစဵုဒၞါ ကုညးဍုၚ်ကွာန်မန်တံ ဟွံမာန်ပုဟ်ဂှ်တုဲ နဒဒှ်သဘဴကလေၚ်ဟံၚ်သိက္ခာပရေၚ်ဍုၚ်ကွာန်၊ ပရေၚ်ပၞာန်တုဲ ဒှ်ပွချဳဒရာၚ် လ္ဂောံကဵုမဟာဗျူဟာ ပရေၚ်ဆက်ဆောံညးဍုၚ်ကွာန်တံဏောၚ်ဂှ် သ္ၚဳဂၠိပ်လဝ်ရ။

“ဍာံဍာံတေံ ယဝ်ရဗော်ဍုၚ်မန်တၟိ မိက်ဂွံကေတ်ဂီုကၠီုမ္ဂး ပ္ဍဲကဵုဒၞါဲပေါဲဗ္တိုက်တံ ဒှ်မံၚ်အဆက်က် ညံၚ်ရဴလ္ပာ်ပွိုၚ်ဍုၚ်ရေဝ်တံဂှ် ဒးကေတ်ကဵုပရေၚ်ဂီုကၠီု၊ ပရေၚ်စဵုဒၞါတံဏောၚ်။ ပ္ဍဲကဵုဒေသပေါဲဗ္တိုက် ဟွံက္တဵုဒှ် ပေါဲဗ္တိုက်ရပ်လွဟ်တံ ဂကောံဒပ်ပၠန်ဂတးတံ ချဳဒရာၚ်ဒၟံၚ်ဟွံမွဲတံဂှ် ကၠုၚ်စိုပ်ဂေတ်ဒၟံၚ်ကၚ်ဂှ်ဝွံ ကဵုပွစဵုဒၞါ ကုညးဍုၚ်ကွာန်မန်တံ ဟွံမာန်ပုဟ်၊ ကဵုဂီုကၠီုဟွံမာန်ပုဟ် ဟိုတ်နူဂလာန်ဟီုဗျိပၠုတ်သာ်ဏံတုဲ နဒဒှ်သဘဴကလေၚ်ဟံၚ်သိက္ခာ ပရေၚ်ပၞာန်၊ ပရေၚ်ဍုၚ်ကွာန်ဂှ် ချဳဒရာၚ်လဝ် နကဵုမဟာဗျူဟာ ပရေၚ်ဆက်ဆောံညးဍုၚ်ကွာန်တံရောၚ်ဂှ် ဒးသ္ၚဳဂၠိပ်ကေတ်ရောၚ်” သာ်ဝွံ သ္ဂးရ။

သ္အာၚ်နူဂှ်ပၠန် ဗော်ဍုၚ်မန်တၟိဂှ် ညံၚ်ဂွိုအ်က္တဵုဒှ်ပေါဲဗ္တိုက်ရပ်လွဟ် ကုကံၚ်ဇြဳပၞာန်တံကီု သီုကဵုဂကောံ ဇြဟတ်ပၠန်ဂတးတံကီုဂှ် ဟိုတ်နူဒးထိၚ်ဒၟံၚ်ဗွဲတၟေၚ်ဂှ်ရ တိဍာ်ဆေၚ်မုက်မာန် သီုၜါဂကောံတံဂှ် ဝေၚ်ပါဲတုဲ ဂေတ်ဂေၚ်ဒၟံၚ်ပရေၚ်ဂီုကၠီုရောၚ်ဂှ် ညးထံက်ထ္ၜးလဝ်ရ။

စပ်ကဵုကောန်သ္ဂံၚ်ဒပ်ပၞာန်ဗၠးၜးကောန်ဂကူမန် MNLA ဗော်ဍုၚ်မန်တၟိ ကေတ်ဒၟံၚ်ဂီုကၠီု အပ္ဍဲဒေသမန် တံဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဗော်ဍုၚ်မန်တၟိကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ဗော်ဍုၚ်မန်တၟိဝွံ အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ပရေၚ်သဳကၠဳပရေၚ်ၜိုဟ်လလမ် ကုကံၚ်ဇြဳပၞာန်ဂှ် မွဲဂကောံတုဲမွဲဂကောံကဵုဒှ်၊ ကဵုဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲတၞဟ်သ္အာၚ်တံကဵုဒှ် သဳကၠဳလဝ် စဵုကဵု (၆) ဝါရ။

ပရိုၚ်−သြၚ်လောန်တိုၚ်(မ်)

ဗီု−Moe Kyaw Thu