သဝ်-ဂျူလာၚ်(၁၈)
ရးဒေသမဂွေ၊ ပ္ဍဲပွိုၚ်ဍုၚ်သဝ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ဇြဟတ်ဗ္ဒာဲ (၅၀၀) ပါ်လဝ်ၜါကရောၚ်ပၞာန်တုဲ လ္ပာ်ဒပ်စဵုဒၞာညးဍုၚ်ကွာန်တအ် ဟွံအောန်နူ (၆)တၠ ဒးပြဟ်လလုဲလဝ်ရဂှ် ဂကောံဒပ်စဵုဒၞာညးဍုၚ်ကွာန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳပၞာန်ဂှ် ကြဴနူစံၚ်ပလီုလဝ်ကွာန်ယျေန်ကေဝ် သီုအလုံမွဲကွာန်တုဲဂှ် ညးဒေသ နူကွာန်ဗ္ဒာဲဂှ် ကွာန်သွဲလွဲကျေန်၊ အေန်ဘူ ကေုာံနာတ်ကောၚ်တအ် (၂)လ္ၚီပြၚ် ဒးဂြိပ်ဒဴ ပါဲဓလေတ်ဒၟံၚ်ရ။
အခိၚ်လၟုဟ်ဏံ ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ကဵု ဒပ်စဵုဒၞာညးဍုၚ်ကွာန်တအ်ဂှ် ပေါဲဗတိုက်က္တဵုဒှ်ဒၟံၚ် ပွိုၚ် (၄)တ္ၚဲဆက်ဆက်ရဂှ် ဂွံတီကေတ်ရ။
ကရောၚ်ပၞာန်ဂှ် ကွဳစက်ခြပ် (၃)ဖ္ဍိုက်ကီု ကွဳစက်ၜိုတ် (၃၀)ဖ္ဍိုက် သီုကဵုဇွောံမဂမၠိုၚ် ပါကၠုၚ်တုဲ နူပခုက္ကူ-တညောၚ်-ဇြုက်ဖျူ-ဇြေန်ဖျူကျောန်-သလေန်-ဇြေတုတ္တရာ စိုပ်ကၠုၚ်ဒၟံၚ် လောၚ်ယှေရ။
“ထ္ပက်ဒၟံၚ်ကရောၚ်ပၞာန် လ္ပာ်သဝ်၊ လောၚ်ယှေဂှ် လအ်ဒၟံၚ်ယျ။ စဆေၚ်ဂွံမုက် ၜိုတ်ပန်တ္ၚဲဒှ်ဏောၚ်။ စံၚ်လဝ်ကွာန်ယျေန်ကေဝ်ရ။ ညးဍုၚ်ကွာန်မွဲတၠ ချိုတ်လဝ်။ ဂကောံစဵုဒၞာညးဍုၚ်ကွာန်တအ်လေဝ် ဒးပြဟ်လလုဲလဝ်နွံရ” ဂှ် ညးလုပ်ဂကောံ ဒပ်စဵုဒၞာညးဍုၚ်ကွာန်မွဲတၠ ဟီုသ္ဂးလဝ်ရ။
ပ္ဍဲမဳဒဳယာတြးဝါဒကံၚ်ဇြဳပၞာန်ဂှ်မ္ဂး သီဂွံလဝ် ဇွကောန်ဒပ်စဵုဒၞာညးဍုၚ်ကွာန် (၅)တၠ ကေုာံလွဟ်လက်နက်ရဂှ် လလောၚ်တြးလဝ်တုဲ ဒပ်စဵုဒၞာညးဍုၚ်ကွာန်တအ်လေဝ် သ္ပလဝ်ဒ္တန်ရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် စၟတ်တ္ၚဲ(၁၄)ဂှ် ဟိုတ်နူပန်ဖျေံလဝ်ဗုမ်ပၟတ် ပ္ဍဲကွာန်ယျေန်ကေဝ်တုဲ ကောန်ၚာ် အာယုက် (၁၂)သၞာံမွဲတၠ ဒးလွဟ်ဇၞော်တုဲ ဒးချိုတ်လဝ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ညးဒေသ ပ္ဍဲရးဒေသမဂွေ (၃၀၀)ပြၚ် ဒးချိုတ်လဝ်တုဲ ညးဍုၚ်ကွာန် (၂၀၅၄၀၀)တၠ ထောံသ္ၚိဌာန်တုဲ ဒးဂြိပ်ဒဴဒၟံၚ်ရဂှ် ဂကောံဗၠးၜးတအ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – ယျဝ်အလေန်တာန်
sanlontai