သွက်ဂွံကၠောန်ရေၚ်တၠုၚ်ကဵု ညံၚ်ပွပ္ကီုပရာပ်လိၚ်ဒပ်ပၞာန် ဂွံဒေါံဒေၚ်အာလွာဲလၟုဟ် ဥူကျဝ်မိုဝ်ထောန်ဗတိုက်ဖ္အောဝ်

ဝါယှေန်တာန် – ဂျူလာၚ်(၁၈)

ပွပ္ကီုပရာပ်ဒပ်ကံၚ်ဇြဳပၞာန် ကလိလောန်ဒၟံၚ် လ္တူညးဗြဴ ပ္ဍဲကၟိန်ဍုၚ်ဗၟာ ညံၚ်ဂွံဒေါံဒေၚ်အာလွာဲလၟုဟ် သွက်ဂွံကၠောန်ရေၚ်တၠုၚ်ကဵုဂှ် အမာတ်ကလုတ်ဥူကျဝ်မိုဝ်ထောန် ဗတိုက်ဖ္အောဝ်လဝ် ကံၚ်ဇြဳဂီုကၠီုကုလသမဂ္ဂရ။

ပ္ဍဲအခိၚ်ကၠောန်ဗဒှ်လဝ် Open Debate စပ်ကဵုပရေၚ်ညးဗြဴ၊ ပရေၚ်ၜိုဟ်လလံ ကေုာံ ပွပ္ကီုပရာပ်လိၚ် ပ္ဍဲပဋိပက္ခပရေၚ်ဂီုကၠီု ပ္ဍဲဂိတုဂျူလာၚ် စၟတ်တ္ၚဲ (၁၃) တုဲကၠုၚ်တေံဂှ် ဟီုသ္ဂးလဝ်သာ်ဏံရ။

ဒပ်ပၞာန်ဂှ် သွက်ဂွံရပ်စပ်သောၚ်ကလးကဵု ပွပ္ကီုပရာပ်လိၚ်ကောန်ဒပ်ဍေံတအ် မ္ၚးနူပၟိက်ဆန္ဒဟၟဲတုဲ ညးက္လိလောန်လဝ်တအ်ဂှ် ဟွံကဵုဖျေံဒုဟ်ဒဏ်တုဲ သီုစဵုဒၞာကဵုဒၟံၚ်ရဂှ် ဟီုသ္ဂးလဝ်ရ။

ဟိုတ်ဂှ်ရ ပရေၚ်ဒပ်ပၞာန် ဂွံဗၠးတိတ်ဒၟံၚ် နူဒုဟ်ဒဏ်ဂှ် ညံၚ်ဂွံလလံအိုတ်အာပေၚ်ၚ် သွက်ဂွံဖျေံကဵု ပရေၚ်ရေၚ်တၠုၚ်ကေတ်အရေဝ်ကီု တၚ်ဂလာန်သ္ဂုတ်သွာတ် စပ်ကဵုကၟိန်ဍုၚ်ဗၟာဂှ် ညံၚ်ဂွံဖျေံကဵု ဗွဲမဂတာပ်အခိၚ်မာန် သွက်ဂွံကၠောန်ရေၚ်တၠုၚ်ကဵုဂှ်လေဝ် အမာတ်ကလုတ် ဗတိုက်ဖ္အောဝ်လဝ် ကၟိန်ဍုၚ်လုပ်ဂကောံကံၚ်ဇြဳပရေၚ်ဂီုကၠီုရ။

အခိၚ်လၟုဟ်ပြဟ်ဟ်ဏံ ပ္ဍဲပေါဲဗတိုက်ရပ်လွဟ် ပ္ဍဲဍုၚ်ဂှ် ကောန်ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ် ညးဗြဴတအ်တုဲ ဗတိုက်ဒၟံၚ်ကီု ကလိလောန်ဒၟံၚ် ပွပ္ကီုပရာပ်ဆေၚ်ကဵုလိၚ်ကီုရဂှ် ဂကောံညးဗြဴတအ် လလောၚ်တြးလဝ်ရ။

ပ္ဍဲစရၚ်ကောန်ဒုဟ်ဒဏ် ဒးဒုၚ်ဒှ်ဒၟံၚ်သံသယ ကလိလောန်လဝ် ဆေၚ်စပ်ကဵုဂြိုဟ်ပလီုညးဗြဴ ကေုာံ ပွပ္ကီုပရာပ်ဆေၚ်စပ်ကဵုလိၚ်တအ်ဂှ် ဟိုတ်နူစုတ်လဝ်ဒပ်ပၞာန်ဗၟာ ကေုာံဒပ်မၚ်ပယျဵု ပ္ဍဲလိက်ဒုၚ်စဳရေၚ်သၞာံဏံ ဗွဲမတပ်တးဂှ်ရ တၚ်ဏာဂုဏ် ကုညးအုပ်ကာနာနာကုလသမဂ္ဂ ကေုာံ ညးစၞးညးအုပ်ကာနာနာကုလသမဂ္ဂရဂှ် အမာတ်ကလုတ် ဟီုသ္ဂးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – NUG