ပ္ဍဲၜဳကလေၚ် PDF ဂးတုဲ မၞိဟ်ဒပ်ပၞာန်တံ မရပ်ဒက်လဝ် (၃) တၠဂှ်ဝွံ ဒှ်ဒၟံၚ်ရဲဗက်ရာန်ကပေါတ်တြေံတြေံ

ၜဳကလေၚ်၊ ဂျူလာၚ် (၁၉)

ညးသၟတ် (၃) တၠ နူကဵုဒပ်ကံၚ်ဇြဳပၞာန် ခယျစ ကောန်ဒပ်စဵုဒၞါညးဍုၚ်ကွာန် PDF ဂးတုဲ မရပ်ဒက်ဏာ ပ္ဍဲကဵုဗ္ဒါဲသၞေဟ်ကၚ်ကံက်အခေါန်လုပ်ဍုၚ် ယှိုဲတာန်လွေန်တြေံ ဂၠံၚ်လုပ်ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်ဝွံ PDF တံဟွံသေၚ်တုဲ ဒှ်ဒၟံၚ်ရဲရာန်ကပေါတ်တြေံတြဟ်တံရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျူလာၚ် (၁၇) အခိၚ်လဒေါဝ်တ္ၚဲ ၜိုတ် ၂ နာဍဳ ညးသၟတ် (၃) တၠ နူကဵုလ္ပာ်သဓီု ကၠုၚ်ၜဳကလေၚ် နကဵုကွဳလိုန်ဓာတ်မွဲဖ္ဍိုက်ဂှ် ဒပ်ကံၚ်ဇြဳပၞာန် ဟီုဂး PDF တံဂးတုဲ ရပ်ဒက်ဏာလဝ်ရ။

ညးဒးဒုၚ်ရပ်ဂမၠိုၚ်ဝွံ မာၚ်သက်ပိုၚ်သဵု အာယုက် ၂၀ သၞာံ၊ မာၚ်ခဇြေန်ကိုဝ် အာယုက် ၁၉ သၞာံ ကေုာံ မခေန်မေလာတ် ဒၟံၚ်ကွာန်ဒံၚ်သောန် ပွိုၚ်ဍုၚ်ၜဳကလေၚ်တံ (၃) တၠ ဒးဒုၚ်ရပ်လဝ်ရ။

PDF ဂးတုဲ မၞိဟ်ဒးဒုၚ်ရပ်လဝ်ဂမၠိုၚ်ဝွံ ဟိုတ်နူဒှ်ဒၟံၚ်ရဲဗက်ရာန်ကပေါတ်တြေံတြေံ အပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်တံဂှ်ရ လ္တူဒပ်ကံၚ်ဇြဳပၞာန် မဟီုဂးဒၟံၚ်ဂှ် အကြာညးဍုၚ်ကွာန်တံ ဒှ်ဒၟံၚ်သ္ဇက်ဒးဂြိုၚ်စဏောၚ်ဂှ် ညးဒေသဒံၚ်သောန်မွဲတၠ ဟီုရ။

ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ညးသၟတ်ဒးဒုၚ်ရပ် (၃) တၠဂှ်ဝွံ ဒှ်ကောန်ဒပ် PDF (သစ်ချတောၚ်) တံရောၚ် တြးဒၟံၚ်ဝါဒတံ နွံဒၟံၚ်ရ။

အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ စဳဇန်ဒၟံၚ် သွက်ဂွံပံက်အမှုကေတ်ဒုဟ် ကုညးသၟတ် မရပ်ဒက်လဝ် (၃) တၠဂှ် နကဵုၝောံပိုဒ်ဗ္တိုက်သ္အးပကီုပရာပ်တံရောၚ်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။

လောန်ကၠုၚ်သၞာံမံက်ဏံဂှ်လေဝ် ဒပ်ကံၚ်ဇြဳပၞာန်ဝွံ မၞိဟ်တြုံ၊ မၞိဟ်ဗြဴ အာကၠောန်ကလောန် အပ္ဍဲကတိုၚ်ထဝ် နူကဵုပွိုၚ်ဍုၚ်ၜဳကလေၚ် ၜိုတ် ၂၀ ပြၚ်ဂှ် PDF တံဂးတုဲ ရပ်ဒက်လဝ်ဏီရ။

ပရိုၚ်−သြၚ်လောန်တိုၚ်(မ်)

ဗီု−Social Media