သမ္မတဖဳလေတ်ဖေန်တြေံ ဒူတာတေကဵု သမ္မတကြုက်ယှဳတံ သဳကၠဳလဝ် ပရေၚ်ၜဳကြုက်သၠုၚ်ကျာရောၚ်ဂှ် သမ္မတဖဳလေတ်ဖေန် မာကောသ် ထေၚ်ခယျ

ပေကျေန်၊ ဂျူလာၚ် (၁၈)

သမ္မတတြေံ ဒူတာတေကဵု သမ္မတကြုက် ယှဳကျေန်ဖျေန်တံ ဒဒှ်ရသဳကၠဳလဝ် ပရူပရာက္ၜၚ်မၚ်ပြၚ်ၜဳကြုက်တံ ကၠတ်ဗက်ဒၟံၚ်လက္ကရဴ က္ၜၚ်ဖဳလေတ်ဖေန်တံဂှ်ကီု သီုကဵုပရူပရာ ပြဝကြုက် အပ္ဍဲၜဳကြုက်သၠုၚ်ကျာတံဏောၚ်ဂှ် သမ္မတဖဳလေတ်ဖေန် မာကောသ်ဂျူနဳယျာ ဟီုဂးလဝ်ရ။

သမ္မတမာကောသ်ဂှ် ဒဒှ်ရညးတီလဝ် လၟေၚ်တရဴဒူတာတေ အာဍုၚ်ကြုက်ဂှ်ကီု၊ ပရေၚ်ဆက်ဆောံအကြာၜါဍုၚ်သာ်လဵုဟွံဟီု ဒဒှ်ရဒုၚ်တၠုၚ်ဂှ်လေဝ် ထပ်ဟီုဂးလဝ်ရ။

“ညံၚ်ရဴပြသၞာ ပိုယ်တံဒးဆေၚ်ဒၟံၚ်မုက် ဗီုပြၚ်ကၠတ်ဗက်လက္ကရဴတံဂှ် ညးတံ သဳကၠဳလဝ်ဏောၚ်ဂှ် အဲစၟဳကေတ်ရ။ ဟီုမ္ဂးတှ်ေ စပ်ကဵုကိစ္စတံဏံသီုဖအိုတ်တုဲ အရာမတောတက်မွဲမွဲ ကလိဂွံမာန်ဏောၚ်” ဂှ် ဟီုလဝ်ကဵု အ္စာပရိုၚ်တံရ။

ဒၞါဲသမ္မတြေံ ဒူတာတေ ညးမၞုံပၟိက်ကဵုကြုက်ဂှ် ပ္ဍဲသၞာံ ၂၀၂၂ တေံ ဝှာဒဳနာန်မာကောသ်ဂျူနဳယျာ ဂွံဒုၚ်ရုဲစှ်လဝ် နဒဒှ်သမ္မတ သွက်တြဴသၞာံရ။

သမ္မတဖဳလေတ်ဖေန်လၟုဟ်ဂှ် ဟိုတ်နူထ္မံက်ကၠုၚ်ဒၟံၚ်ရုပ်ရဴ ပရေၚ်ဆက်ဆောံ မစုက်လုက်ကဵု အလဵုအသဳအမေရိကာန်ဂှ်ရ ပရေၚ်ဆက်ဆောံဖဳလေတ်ဖေန်ကဵု ကြုက်ဂှ် ၜိုဟ်ဂံက်ကၠုၚ်ဒၟံၚ်ရ။

“ပ္ဍဲကဵုဒၞါဲရေၚ်တၠုၚ်ပံၚ်ကောံ ပရေၚ်ဍုၚ်ကေဝ်ဆာန်ကၟိန် အကြာကြုက်ကဵု ဖဳလေတ်ဖေန်ဂှ် သွက်ဂွံဆက်ပါလုပ်အာ နူကဵုအခန်ကဏ္ဍပၟိက်ဇၞော်ဂှ် စၟဳစလဝ်ရောၚ်” သာ်ဝွံ ပ္ဍဲဂိတုဂျူလာၚ် ၁၇ တေံ အခိၚ်ဆဵုဂဗလဝ် ပ္ဍဲကဵုတွဵုရး Diaoyutai မၞုံဍုၚ်ဗေကျေန်ဂှ် သမ္မတယှဳ ဟီုဂးလဝ်ကဵု ဒူတာတေရ။

ပ္ဍဲကဵုလက်ထက်သမ္မတမာကောသ်ဂှ် ပရေၚ်ဆက်ဆောံ အကြာကြုက်ကဵု ဖဳလေတ်ဖေန်ဂှ် ကြံၚ်မ္ၚိုဟ်ကၠုၚ်လဝ်တုဲ နကဵုဖဳလေတ်ဖေန် ဂတးကၠုၚ်က္ဍိုပ် လ္ပာ်ပရေၚ်ဆက်ဆောံ ကုဍုၚ်မဟာမိတ် အမေရိကာန်ရ။

တုဲကၠုၚ်ပ္ဍဲဂိတုမေတေံ အပ္ဍဲလၟေၚ်တရဴ သမ္မတမာကောသ် မအာလဝ် သ္ၚိဗုဂှ် ပရေၚ်ဒှ်မဟာမိတ်စပ်ကဵုပရေၚ်ဂီုကၠီု လအ်ကၠုၚ်ကဵုစှော်သၞာံဂှ် အမေရိကာန် ကေုာံ ဖဳလေတ်ဖေန်တံ ကလေၚ်သ္ပဒတန်လဝ် ဗွဲမဗိုန်ဗတ်ရ။

ဟိုတ်နူတၚ်သ္ဂုတ်သွာတ် ဖဳလေတ်ဖေန် ကဵုအာအမေရိကာန် အခေါၚ်သုၚ်စောဲ ဗ္ဒိုပ်ဖျေံသ္ဇိုၚ်ပၞာန် ပန်ဗ္ဒိုပ် အပ္ဍဲသၞာံဏံဂှ်ရ လ္ပာ်ကြုက်တံ ဒေါသေတိတ်ဒၟံၚ်ရ။

ယဝ်ရပါလုပ်ဒးအာ အကြာပရေၚ်ကြံၚ်မ္ၚိုဟ် ကြုက်ကဵုအမေရိကာန်ဂှ်မ္ဂး ဍုၚ်ဖဳလေတ်ဖေန် ဒှ်အာညံၚ်သုသာန်မာန်ဒၟံၚ်ဂှ် သမ္မတတြေံ ဒူတာတေ ဟီုဂးလဝ် ကုမဳဒဳယျာအပ္ဍဲဍုၚ်မွဲ ပ္ဍဲဂိတုတုဲကၠုၚ်တေံရ။

Ref; Reuters