မတ်မလီု၊ ဂျူလာၚ်(၁၉)
ပ္ဍဲတွဵုရးဍုၚ်မန် ဟိုတ်နူဗြဲဇၞော်ဂူတုဲ ဍာ်ဇၞော်ဍာ်ကလိုပ်တံက္တဵုဒှ်မံၚ်ဂှ်ရ ဒးပဆုဲပြံၚ်မံၚ် ညးဍုၚ်ကွာန်ဒးဘဲဍာ်နူပွိုၚ်ဍုၚ်ပိပွိုၚ်ဍုၚ်တံ ကာတၟေၚ်ရဂှ် ညးဒေသတံကဵု ဂကောံရီုဗၚ်ပရေၚ်မၞိဟ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သ္ပတံနူဂိတုဂျူလာၚ် စၟတ်တ္ၚဲ ၁၇ အခိၚ်ဗ္တံတေံတုဲ ဟိုတ်နူဗြဲဂူမံၚ်အဆက်ဟွံပိုတ်သ္ကုတ်ဂှ်ရ ပ္ဍဲပွိုၚ်ဍုၚ်ရေဝ်၊ ဇြပ်ဗု ကေုာံ မုဟ်ဍုၚ်မၞုံပ္ဍဲတွဵုရးဍုၚ်မန်တံဂှ် ဍာ်ဇၞော်ဍာ်ကလိုပ်တံကဵု ပရေၚ်ဍာ်တတ်လ္တူဂၠံၚ်ကွဳစက်တံ က္တဵုဒှ်မံၚ်ရ။
ဟိုတ်နူဍာ်ဇၞော်ဍာ်ကလိုပ်တံတုဲ ဒးပဆုဲပြံၚ်လဝ် ညးဍုၚ်ကွာန်ဒးဘဲဍာ်လ္ၚဵုတံ ပ္ဍဲအခိၚ်ဗ္တံဂှ်တုဲ ဗွဲမဂၠိုၚ်တံဂှ် မၚ်ရံၚ်မံၚ်အကာဲအရာတံအိုတ်ရဂှ် ညးတာလျိုၚ်ဂကောံရီုဗၚ်ပရေၚ်မၞိဟ် ပွိုၚ်ဍုၚ်ဇြပ်ဗုမွဲတၠ ဟီုရ။
“နူဂယး ၜိုတ်ပွဳူ ၆နာဍဳ ၆နာဍဳကဝက်ဂှ် ပ္ဍဲသၞေဟ်ကၚ်လုပ်ဍုၚ်ဇြပ်ဗု ဗ္ဒါဲသၞေဟ်ကၚ်(၂၀၀)ဂှ် ကာတံ တတ်ကၠောံဟွံဂွံရ။ တုဲပၠန် အကာဲအရာဍုၚ်ဇြပ်ဗုဂှ်တှ်ေ ပ္ဍဲလ္ပာ်လ္တူဍုၚ်ဇြပ်ဗု ဥပမာ- ညံၚ်ရဴပ္ဍဲအရာပ် (ကျောၚ်းပိုၚ်း)တံ အရာပ်အံၚ်မၚ်္ဂလာတံဂှ် ပြဟ်ဟ်ဏံ ဍိုက်ဗၠိုက်မံၚ်ရ။ လ္ပာ်ကြုၚ်ခ္ဍာ်တံဂှ်တှ်ေ ဒးဆုဲပြံၚ်ရဂှ် ညးစုက်လုက်တံ ဟီုရ” သာ်ဝွံ ညးသ္ဂးရ။
အတိုၚ်တၚ်နၚ် သြၚ်လောန်တိုၚ်မ် ကလိဂွံလဝ် စဵုကဵုအခိၚ် ၅ နာဍဳသဝ်တ္ၚဲဂှ်မ္ဂး ဟိုတ်နူဍာ်ဇၞော် ဍာ်ကလိုပ်က္တဵုဒှ်လဝ်တုဲ ညးဒးဘဲဍာ် နူပွိုၚ်ဍုၚ်ရေဝ် ကွာန်ဟံဂါမ် ဗ္ဒါဲ ၄၀၀၊ ညးဍုၚ်ကွာန်ဒးဘဲဍာ် နူကွာန်ကြုၚ်ခ္ဍာ် ပွိုၚ်ဍုၚ်ဇြပ်ဗု ၃၀၀ ပြၚ်၊ ညးဍုၚ်ကွာန်ဒးဘဲဍာ် နူပွိုၚ်ဍုၚ်မုဟ်ဍုၚ် ၂၀၀ ပြၚ်တံဂှ် ဒးဆုဲပြံၚ်လဝ်ကာတၟေၚ်ရဂှ် ဂွံတီကေတ်ရ။
ပြဟ်ဟ်ဏံဂှ်လေဝ် ဟိုတ်နူဗြဲဆက်ဂူမံၚ်ဂှ်ရ ပ္ဍဲပွိုၚ်ဍုၚ်ရေဝ်ဂှ် သွက်ဂွံပံက်အာ ပရေၚ်ဟံၚ်ပြာ် ယာယဳတံဂှ် စဳဇန်မံၚ်အိုတ်ရဂှ် ညးတာလျိုၚ်ဂကောံရီုဗၚ်ပရေၚ်မၞိဟ်မွဲတၠဂှ် ဟီုရ။
“ချိုတ်ပၠိုတ်ဂှ်တှ်ေ ပလေဝ်ပလေတ်လဝ်ယာယဳဂှ် နွံမံၚ်ရ။ ဘဲအန္တရာယ်သဘာဝတံ ဒှ်ကၠုၚ်မ္ဂး သ္ဇက်ဒးကၠောန်တံ နွံမံၚ်ရ။ ပိုဲတံ လ္ပာ်ဏံဂှ်တှ်ေ ပလေဝ်ပလေတ်လဝ်တံနွံမံၚ်ရ။ ပြဟ်ဟ်ဏံဂှ် မၞိဟ်ကၠုၚ်ပ္ဍဲဗ္ဒိုပ်ဟံၚ်ပြာ်တံဂှ် ဟွံမွဲဏီရ။ ဓမ္မတာ ၜိုတ်(၂၀၀) ညးပါဲဓလေတ်ဘဲဍာ်လ္တူဍုၚ်ရေဝ်တံဂှ် ပလေဝ်ပလေတ်လဝ် ပ္ဍဲလ္တူကုန်၊ ပ္ဍဲဘာလကျာ်၊ ပ္ဍဲဇြပ်သဘၚ်ဓရ်တံ နွံမံၚ်ရ” သာ်ဝွံ ညးသ္ဂးရ။
ဟိုတ်နူဍာ်ဇၞော်ဍာ်ကလိုပ်တံတုဲ ပ္ဍဲဒၞါဲ ၅ ဒၞါဲ မၞုံပ္ဍဲမွဲဒမြိပ်ဂၠံၚ်ဇၞော် ဗျဳထံၚ်သု မတ်မလီု-ရေဝ်တံ ပရေၚ်ဍာ်တတ်လ္တူဂၠံၚ်ကွဳစက်တံ က္တဵုဒှ်မံၚ်ဂှ်ရ ဒှ်မံၚ်စဵုကဵုအကာဲအရာ ကွဳစက်ဖ္ဍိုက်ကပေါတ် ဇၞော်ဇၞော်တံကဵု ညးအာတရဴတံသၟးရ အာကၠုၚ်ဂွံရ။
သ္အာၚ်နူဂှ်ပၠန် ဟိုတ်နူဗြဲဆက်ဂူမံၚ်ဂှ်ရ တ္ၚဲဏံ သ္ပတံနူၜိုတ်အခိၚ် ၅နာဍဳဂှ်တုဲ ဂၠံၚ်ဇၞော် လ္ဂုၚ်-မတ်မလီု မၞုံဍုၚ်ဇိုၚ်ကျာ် ပွိုၚ်ဍုၚ်ပံၚ်ဂှ် ပွဍာ်တတ်တံ စက္တဵုဒှ်မံၚ်ယျဂှ် ဂွံတီကေတ် နူဇရေၚ်ညးဒေသတံရ။
တွဵုရးဍုၚ်မန်ဂှ် လၟေၚ်သၞာံ ဒးဂဗမံၚ် ကုဘဲဒဏ်ဍာ်ဇၞော်ဍာ်ကလိုပ်တံကဵု ပြဿနာဘဲသဘာဝတံတုဲ ပ္ဍဲပရေၚ်ဍာ်ဇၞော်ဍာ်ကလိုပ်ကေုာံ ပရေၚ်တိဒဵုလာ် က္တဵုဒှ်လဝ် ပ္ဍဲသၞာံ ၂၀၁၉ တုဲကၠုၚ်တေံဂှ် ညးဒေသ ဗ္ဒါဲ ၇၀ ဒးချိုတ်အာလဝ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai