ပ္ဍဲပေါဲဗတိုက်ကျာ်ထဝ် ကောန်အရာပ် (၃) တၠ ဒးဒုၚ်ပန်ဂစိုတ်လဝ်တုဲ ကောန်အရာပ် (၃၀၀၀) ပြၚ် ဒးဂြိပ်ဒဴဒၟံၚ်

ကျာ်ထဝ်၊ ဂျူလာၚ်(၂၀)

ပေါဲဗတိုက်က္တဵုဒှ်လဝ် ပ္ဍဲပွိုၚ်ဍုၚ်ကျာ်ထဝ် တိဍာ်ထိၚ်ဒဝ်ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ပန်ဂစိုတ်လဝ် ကောန်အရာပ်ညးဍုၚ်ကွာန် (၃) တၠတုဲ ညးဒေသ (၃၀၀၀) ပြၚ်လေဝ် ဒးဂြိပ်ဒဴဒၟံၚ်ရဂှ် KNU ခရိုၚ်သဓီု လလောၚ်တြးလဝ် ပရိုၚ်ရ။

သ္ပတံနူ ဂိတုဂျူလာၚ် စၟတ်တ္ၚဲ (၁၄) တုဲကၠုၚ်တေံတုဲ ကရောၚ်ပၞာန် ကံၚ်ဇြဳပၞာန် ဇြဟတ်မၞုံ ဗ္ဒာဲ ၁၅၀ ဂှ် ပန်ဖျေံလွဟ်ဇၞော် လွဟ်ဍောတ် ပ္ဍဲကွာန်ငှေက်ပျဝ်တဝ် ကဵု ကွာန်အလူလေဝ်တုဲ ထ္ပက်လုပ်ကၠုၚ်လဝ်ကရောၚ်ပၞာန်ရ။

ဟိုတ်နူကရောၚ်ပၞာန်ဒပ်ကံၚ်ဇြဳပၞာန် လုပ်ကၠုၚ်တုဲ ဂကောံသ္ၚိကၟိန် (၆၉၉) နူကွာန်ဇြဳကုမ်၊ ပိတောက်တဝ်၊ ချာန်မျေအ်၊ ငှေက်ပျဝ်တဝ်၊ ကရေဝေဇြုက် လၟိဟ်မၞိဟ် ၃၀၀၀ ပြၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။

ဒပ်ကံၚ်ဇြဳပၞာန်ထ္ပက်လုပ်ကၠုက်ကရောၚ်ပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပ္ဍဲဂိတုဂျူလာၚ် စၟတ်တ္ၚဲ (၁၆)ဂှ် ပေါဲဗတိုက်က္တဵုဒှ်လဝ်တုဲ ပ္ဍဲပေါဲဗတိုက်ဂှ် ဒပ်ကံၚ်ဇြဳပၞာန် ပန်ပှော်လဝ် မောၚ်ပိုၚ်ချေတ်ဥူ ဒၟံၚ်ကွာန်ပိတောက်တဝ် ကေုာံကောန်အရာပ်ကၠုၚ်သွံဖျာ နူဍုၚ်ကျာ်ထဝ် (၂) တၠ သီုဟိုတ်ဟၟဲမွဲသာ်ရဂှ် KNU ဟီုသ္ဂးလဝ်ရ။

ဒပ်ကံၚ်ဇြဳပၞာန်ဂှ် ကြဴနူပန်ဂစိုတ်လဝ်ကောန်အရာပ်ညးဍုၚ်ကွာန် (၃)တၠတုဲဂှ် ကေတ်ဏာလဝ် ကွဳလိုန်ဓာတ်ကောန်အရာပ်ကီု သီုစံၚ်ပလီုဏာလဝ် ကွဳစက်ဟိုက်ဂျေတ် ကောန်အရာပ်ပိုၚ်ရဂှ် ဓမံက်လဝ် ပ္ဍဲတၚ်လလောၚ်တြး KNU ရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၈)ဂှ် ကလေၚ်ဆုတ်တိတ်ကရောၚ်ပၞာန်တုဲ ကေတ်လဝ်ဂီုကၠီု ပ္ဍဲလ္တူဂၠံၚ် လဂုၚ်-မတ်မလီုရဂှ် ညးအုပ်ကာ KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန် ပန်ဂစိုတ်လဝ် ကောန်အရာပ်ညးဍုၚ်ကွာန် ပ္ဍဲပေါဲဗတိုက်ဂှ် ဒှ်တံဒပ် သၟဝ်တဲၝောံဒပ်ကံၚ်ဇြဳပၞာန် (၄၄) ဖျေံသ္ဇိုၚ်ပွိုၚ်ဍုၚ်ကျာ်ထဝ်ရဂှ် ဂွံတီကေတ်ရ။

ပ္ဍဲပွိုၚ်ဍုၚ်ကျာ်ထဝ် ဇြဟတ်ပၠန်ဂတးခိုဟ်ဒၟံၚ်ဂှ် သ္ပတံနူကၞောတ်သၞာံတုဲကၠုၚ်တေံတုဲ ၜိုန်ရလ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဟၟဲကီုလေဝ် လၟုဟ်ဏံကလေၚ်ထပ်ထ္ပက်ကၠုၚ်ဒၟံၚ် ကရောၚ်ပၞာန်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNU