တၞၚ်သြဳ၊ ဂျူလာၚ်(၂၀)
ရးဒေသဇၞော်တၞၚ်သြဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ်၊ ပ္ဍဲပွိုၚ်ဍုၚ်တၞၚ်သြဳဂှ် အကြာဒပ်ကံၚ်ဇြဳပၞာန်ကဵု ဒပ်ဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ဒၟံၚ် တ္ၚဲဆက်နွံကၠုၚ်ရဂှ် ညးတာလျိုၚ်ဒပ်ပံၚ်ကောံ ဒပ်စဵုဒၞာဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳပၞာန် ဇြဟတ်နွံ (၁၅၀) ပြၚ်ဂှ် သ္ပတံနူ ဂိတုဂျူလာၚ် စၟတ်တ္ၚဲ (၁၅) တုဲကၠုၚ်တေံတုဲ ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်တၞၚ်သြဳတုဲ ပေါဲဗတိုက်က္တဵုဒှ်ဒၟံၚ် ဇၟာပ်တ္ၚဲ အဆက်ဆက်ရ။
နူဂိတုဂျူလာၚ် စၟတ်တ္ၚဲ (၁၅) စဵုကဵုစၟတ်တ္ၚဲ (၁၈) ပ္ဍဲပွိုၚ်(၄)တ္ၚဲဏံ ပေါဲဗတိုက်က္တဵုဒှ်လဝ် ဟွံအောန်နူ (၁၀) ဝါနွံတုဲ လ္ပာ်ကံၚ်ဇြဳပၞာန် ဗ္ဒာဲ (၁၀) တၠ ဒးချိုတ်လဝ်ရဂှ် ဂွံတီကေတ် နူဒပ်ပံၚ်ကောံ ဒပ်စဵုဒၞာဒေသတအ်ရ။
အခိၚ်လၟုဟ်ဏံ ပေါဲဗတိုက်တအ်ဂှ် စဵုကဵုကွာန်တုၚ်ခွောန်၊ တေဝ်ဖျူ ကေုာံ ချောၚ်နှေတ်ပေါက် မုက်ပၞာန်သၠဲတိုန်ကၠုၚ်ဒၟံၚ်ကီု ဒပ်ကံၚ်ဇြဳပၞာန်လေဝ် ထပ်ဗပေၚ်လဝ် ဇြဟတ်ဒပ်ရ။
ပ္ဍဲပေါဲဗတိုက်ၜါလ္ပာ်ဂှ် ဒပ်ကံၚ်ဇြဳပၞာန် ဖျေံလဝ်သ္ဇိုၚ်လွဟ်ဇၞော် ဗ္ဒာဲကွာန်ကောန်တဳတဝ် ဂၠံၚ်မဝ်တောၚ် ပွိုၚ်ဍုၚ်တၞၚ်သြဳတုဲ ပန်ဖျေံဒၟံၚ် ပ္ဍဲလ္ပာ်ကွာန်တအ်ရ၊
ဟိုတ်နူပေါဲဗတိုက်တုဲ ညးဒေသ နူကွာန်ဗ္ဒာဲဂှ် (၅) ကွာန် ပါလုပ်သီုကွာန်တုၚ်ခွောန်၊ တေဝ်ဖျူချောၚ် ကေုာံ ချောၚ်နှေတ်ပေါက်တအ် (၁၀၀၀) ပြၚ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။
ပ္ဍဲဂိတုမာတ်ချ်ကဵု ဂိတုဨဗြဴသ္ကုတ်သၞာံမံက် တုဲကၠုၚ်တေံလေဝ် ပ္ဍဲကွာန် သ္ကုတ်ဂၠံၚ် တၞၚ်သြဳ-မဝ်တောၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်စဵုဒၞာဒေသတအ် ပေါဲဗတိုက်တ္ၚဲဆက် က္တဵုဒှ်လဝ် ပွိုၚ်ဗ္ဒာဲ ၂ သတ္တာဟတုဲ ပရေၚ်ဇီုကပိုက်ဒးချိုတ်လဝ်သီုၜါလ္ပာ်နွံရ။
ပရိုၚ်-သြၚ်လောန်တိုၚ်(မ်)
ဗီုရုပ်- Social Media
sanlontai