လဂုၚ်၊ အဝ်ဂေတ်(၂)
က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ၊ သမ္မတကၟိန်ဍုၚ် ဥူဝေန်မျေတ် ဒးဒုၚ်ရပ်လဝ် ဟွံဗဗွဲဓဝ်ကီု သီုကောန်ထံၚ်ပရေၚ်ဍုၚ်ကွာန် သီုဖအိုတ်ဂှ် ညံၚ်ဂွံဗလးကဵု နတၚ်ဆောတ်ယောၚ်ဟၟဲ လွာဲလၟုဟ်ဂှ် သမ္မတ NUG ယာယဳ ဒူဝါလယှဳလ ဟီုကဵုကၠုၚ်သတိရ။
ကြဴနူကံၚ်ဇြဳပၞာန်လောၚ်တြးလဝ် ဒဒှ်ရသ္ပကဵုအခေါၚ်ဒုဟ်ဒဏ် က္ဍိုပ်သ္ကိုပ်ပရေၚ်ဍုၚ်ကွာန်တအ် ဗၠးၜးသက်သာ နူဂဗုတ်လ္ၚဵုတုဲဂှ် သမ္မတယာယဳ ချူပ္တိုန်ဟီုသ္ဂးလဝ် ပ္ဍဲမုက်လိက်တွောတ်တာညးရ။
သမ္မတယာယဳ ဒူဝါလယှဳလဂှ် သွက်ဂွံဗလးပ္တိတ်ကဵု ဒဝ်အံၚ်သာန်သုကျဳ ကေုာံဥူဝေန်မျေတ် သီုကောန်ထံၚ်ပရေၚ်ဍုၚ်ကွာန်ဖအိုတ် နတၚ်ယောၚ်ယာဟၟဲကီု ကံၚ်ဇြဳပၞာန် ဒးကေတ်တာလျိုၚ် ပရေၚ်ထတ်ယိုတ်ညးတအ်ရောၚ်ကီုဂှ် ဟီုသ္ဂးလဝ်ရ။
တ္ၚဲဏံ ပ္ဍဲဂိတုဒုတိယဒဂိုန်ပေၚ် နဒဒှ်စၟတ်သမ္တီ တ္ၚဲဓမ္မစက် ကံၚ်ဇြဳပၞာန် သ္ပကဵုအခေါၚ် က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ ဗၠးသက်သာ နူဂဗုတ်ဖျေံလဝ်ဒုဟ်ဒဏ်တုဲ (၅)ဂဗုတ် ကေုာံ ဂဗုတ်ဖျေံလဝ်ဒုဟ်ဒဏ် လ္တူသမ္မဥူဝေန်မျေတ် (၂)ဂဗုတ်ရ။
အတိုၚ်ကံၚ်ဇြဳပၞာန် ဖ္အောန်ယှအ်ဖျေံလဝ်ဒုဟ်ဒဏ်ဏံမ္ဂး ဒဝ်အံၚ်သာန်သုကျဳဂှ် ဒဏ်ထံၚ်ဒးဒုၚ်ဖျေံလဝ် နတၚ်စောတ်စောဲဟွံဗဗွဲဓဝ် (၆) သၞာံကီု သမ္မတကၟိန်ဍုၚ် ဥူဝေန်မျေတ် ဒဏ်ထံၚ် (၄) သၞာံ၊ ပံၚ်သီုၜါတၠ က္လိဂွံအခေါၚ်ဗၠးၜးနူဒုဟ်ဒဏ် (၁၀) သၞာံရ။
ကံၚ်ဇြဳပၞာန်သီအဝဵုဂှ် ပါဲနူဖ္အောန်ယှအ်ဖျေံဒုဟ်ဒဏ် က္ဍိုပ်သ္ကိုပ်ကၟိန်ဍုၚ်ၜါတၠဂှ် ကောန်ထံၚ် (၇၇၄၉)တၠ ဒးဒုၚ်ရပ်လဝ် အလုံမွဲကၟိန်ဍုၚ်တအ်လေဝ် သ္ပကဵုကၠုၚ်အခေါၚ်ဗၠးတိတ်တုဲ ကောန်ထံၚ်ဒးဒုၚ်ဖျေံလဝ်ဒဏ်ဂစိုတ်တအ်လေဝ် ပြံၚ်စၠောံလဝ် ဒဏ်ထံၚ်မွဲအာယုက်ရဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ်-NUG
sanlontai