ပ္ဍဲပါကေဿတာန် ဟိုတ်နူပရေၚ်ဖံက်ဗ္တိုဟ်ဗုမ်ဒုၚ်ချိုတ် အပ္ဍဲပေါဲထ္ၜးဆန္ဒပရေၚ်ဍုၚ်ကွာန်တုဲ မၞိဟ် (၄၀) ပြၚ် ချိုတ်အာလဝ်

အေဿလာမ်မာဗာတ်၊ အဝ်ဂါတ် (၁)

ပ္ဍဲကဵုတွဵုရးခိုၚ်ဗာပက်ခ်ထဝန် ဒိုဟ်ဗာယပ်ဍုၚ်ပါကေဿတာန်ဂှ် တုဲကၠုၚ်ပ္ဍဲဂိတုဂျူလာၚ် (၃၀) တေံ ဟိုတ်နူပရေၚ်ဖံက်ဗ္တိုဟ်ဗုမ်ဒုၚ်ချိုတ် အပ္ဍဲကောံကလောံပရေၚ်ဍုၚ်ကွာန်ဂှ်တုဲ အောန်အိုတ် မၞိဟ် (၄၂) တၠ ချိုတ်တုဲ (၁၃၀) ပြၚ် ဒဒှ်ရကလိဂွံလဝ်ဝပ်ဂှ် ညးတာလျိုၚ်ပရေၚ်ဟံၚ်ပြာ် ကေုာံ ဂကောံဒပ်ဗၠာဲသၟိၚ်တံ ဟီုဂးလဝ်ရ။

လၟေၚ်ဒဒှ်ဏံဂှ် က္တဵုဒှ်အာလဝ် ပ္ဍဲကဵုတိဍာ်ဂကူ ဘာဂျူအာတြေံ မစုက်ဒၟံၚ်ကဵုပယျဵု အာဖဂါန်နေဿတာန်ဂှ်ရ။ ပ္ဍဲကဵုပေါဲကောံကလောံပရေၚ်ဍုၚ်ကွာန် ဗော်ကောန်သာဗေတေပ် ဂျာန်မဳရာပ်အူလာမ်မာ အေဿလာမ်ဖေဝ် မၞိဟ်တီဂၠိုၚ် ဆက်စပ်ဒၟံၚ်ကဵု ပရေၚ်ဍုၚ်ကွာန်အေဿလာမ်ဂှ် ပရေၚ်ဖံက်ဗ္တိုဟ် က္တဵုဒှ်လဝ်ရ။

ပ္ဍဲကဵုဒၞါဲပွဳပွူ မၞုံကြပ်ရုၚ်ဂဥုဲဘာဂျူအာဂှ် ဒဒှ်ရလလောၚ်တြးလဝ် အကာဲအရာကာတၟေၚ်ဂှ် သၞာဲဒဴဗၠာဲသၟိၚ်ခရိုၚ်ဂှ် ဟီုလဝ်ကဵု မၞိဟ်ကလိဂွံဝပ်ဗွဲမဂၠိုၚ်ဂှ်တုဲ မၞိဟ်ကလိဂွံဝပ် ဗွဲမသ္ကာတ်မြဟ်တံဂှ် ဒးပလံၚ်ဗစိုပ်လဝ် ရုၚ်ဂဥုဲ ပက်ယှဝါ ဍုၚ်ဇၞော်တွဵုရးဂှ် နကဵုက္ၜၚ်ကျာပၞာန်ရောၚ်ဂှ် ဂွံတီကေတ်ရ။

ပ္ဍဲကဵုတၚ်လလောၚ်တြး Rescue 1122 မဒှ်ဂကောံဟံၚ်ပြာ် ကၠာအိုတ်ဂှ် ဒဒှ်ရမၞိဟ်ချိုတ်အာ (၄၂) တၠ နွံဒၟံၚ်ယျဂှ် သ္ဂးလဝ်တုဲ ပ္ဍဲကဵုပေါဲကောံဓရီုကောန်ကမၠောန်သၟာကမၠောန် နူကဵုဗော် မၞုံပ္ဍဲဘာဂျူအာ ဍုၚ်ခါ(လ်) ဂှ် ဟိုတ်နူပရေၚ်ဗ္တိုဟ်ထ္ကးတုဲ မၞိဟ် (၁၃၀) တၠ ကလိဂွံလဝ်ဝပ်ရ။ ဒဒှ်ရမၞိဟ်ဂၠိုၚ်ကဵုကၠံ ကလိဂွံလဝ်ဝပ် ဗွဲမသ္ကာတ်မြဟ်ဂှ် သၞာဲဒဴဗၠာဲသၟိၚ်ခါမ် ဟီုလဝ်ရ။

ပရေၚ်ဗ္တိုဟ်ထ္ကးဂှ်ဝွံ ဒးက္တဵုဒှ်အာလဝ် ဟိုတ်နူပရေၚ်ဖံက်ဗ္တိုဟ်ဗုမ်ဒုၚ်ချိုတ်တံဂှ်ရောၚ်ဂှ် သ္ကိုပ်ဗၠာဲသၟိၚ်တွဵုရး အက်တကာဟိုက်ရာပ် ဟီုလဝ်ကဵု ဌာန်ပရိုၚ်ရာ်တာရ။

အကြာတေဝ်ဟေဝ်အဳကေ တာလဳဗာန်ပါကေဿတာန် (TTP) ကဵု အေဿလာမ်တံဂှ် စနူအခိၚ်ပရေၚ်ဒေါအ်ပန်ပှော် လီုအာတုဲဂှ် ပရေၚ်ဗ္တိုက် နူကဵုရဲနွံပၟိက်ပၞာန်အေဿလာမ်တံ ကလေၚ်စကၠုၚ်ပၠန်ရ။ ပ္ဍဲကဵုပရေၚ်ဖံက်ဗ္တိုဟ်ဗုမ် ပလဳ မၞုံပ္ဍဲပဳယှာဝါမွဲဂှ် ပ္ဍဲသၞာံဏံစတေံ မၞိဟ် ၁၀၀ ပြၚ် ချိုတ်အာလဝ်ရ။

TTP ဝွံ ၜိုန်ရဒှ်ကောန်ဂကောံ တာလဳဗာန် ဍုၚ်ဇိုၚ်ဝုတ်ဒိုဟ် အာဖဂါန်နေဿတာန်တံ တိုက်ရိုက်ဟွံသေၚ်ကီုလေဝ် ဒဒှ်ရဒုၚ်လဝ်သစ္စာဂှ် ကဵုလဝ်ကတိရ။ ပ္ဍဲကဵုအာဖဂါန်နေဿတာန်ဂှ် ဒၞါဲဍေံတံဖျေံသ္ဇိုၚ် နွံဂှ် ဂကောံဒပ်ဗၠာဲသၟိၚ်ဂီုကၠီုပါကေဿတာန်တံ သ္ဂးလဝ်ရ။

ဂကောံ TTP ဝွံ ဂကောံမၞုံပၟိက်ပၞာန် မကၠောန်ဒၟံၚ်ပရေၚ်ဗ္တိုက် အပ္ဍဲကဵုဒေသဂှ် မွဲဂကောံဓဝ်ဟွံသေၚ်ကီုလေဝ် ဒှ်ဒၟံၚ် နဒဒှ်အခန်ကဏ္ဍဒေသ ဂကောံ IS မွဲရ။

အလဵုအသဳပံၚ်ကောံ သ္ကိုပ်ဝန်ဇၞော် မပလေဝ်ပလေတ်ဒၟံၚ် သွက်ပေါဲရုဲမာဲကောန်ဂကူ မကၠောန်ဗဒှ် ပ္ဍဲဂိတုနဝ်ဝေမ်ဗာဏံဂှ် ဟီုဗျိလဝ် ကုပရေၚ်ဗ္တိုဟ်ထ္ကး ဗော်မဟာမိတ်အဓိကဂှ်တုဲ အရာဏံဂှ် ဒှ်ပရေၚ်ဗ္တိုက် ကုလၟေၚ်ကမၠောန်ဒဳမဝ်ကရေဇြဳ ပါကေဿတာန်ရောၚ် သာ်ဝွံ ဟီုလဝ်တုဲ ကဵုအာဒုဟ် ကုညးမၞုံတာလျိုၚ်တံရောၚ်ဂှ် ကဵုလဝ်ကတိရ။

ရုၚ်ကလုတ်အမေရိကာန် မၞုံအေဿလာမာဗာတ်ကဵု သ္ကိုပ်ဝန်ဇၞော်ပါကေဿတာန်တြေံ အဳမရာန်ခါမ်တံဂှ်လေဝ် စပ်ကဵုပရေၚ်ဗ္တိုဟ်ထ္ကးဂှ်တုဲ ဟီုဗျိပၠုတ်လဝ် လ္တူဇာဇၞိက်ပရေၚ်မၞိဟ်တံကီုရ။

Ref: Reuters