သဓီု၊ အဝ်ဂေတ်(၂)
တွဵုရးဍုၚ်မန် ပ္ဍဲပွိုၚ်ဍုၚ်သဓီု ဂိတုဂျူလာၚ် စၟတ်တ္ၚဲ (၃၁)အခိၚ်ဗ္တံဂှ် ဗြဲဇၞော်တြိုပ်ဂူတုဲ ဟိုတ်နူကျာသ္ကာတ်မြဟ် လပိုက်လွိၚ်လဝ် တၞံဆုအာယုက်ဇၞော် ဒေါံစှ်ေလဝ်တုဲ ညးဒေသ (၅)တၠ ဒးလဝ်ဘဲဝပ်ရဂှ် ဂွံတီကေတ် နူဂကောံရီုဗၚ်ဟံၚ်ပြာ်ပရေၚ်မၞိဟ်တအ်ရ။
ဟိုတ်နူကျာသ္ကာတ်မြဟ် လပိုက်တုဲ တၞံဓိဌာန်အာယုက်ဇၞော် ဒေါံကၟိုၚ်စှ်ေ လ္တူသ္ၚိဒၟံၚ်မၞုံပ္ဍဲလိုၚ်ခါန် သၞေဟ်ကွဳပၟတ် အရာပ်အောၚ်ကျေန် ပွိုၚ်ဍုၚ်သဓီုတုဲ မၞိဟ်တြုံ (၂) တၠကေုာံ ညးဗြဴ (၃) တၠ အပံၚ်လၟိဟ် ညးမဒှ်ဂကောံအိန်ထံၚ် (၅) တၠ ဒးလဝ်ဘဲဝပ်ရ။
မၞိဟ်ဇီုကပိုက်ဒးလဝ်ဘဲဝပ်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန် ခရိုၚ်သဓီု နအရီုဗၚ်ဂကောံရီုဗၚ်ဟံၚ်ပြာ်မၞိဟ်တုဲ ဟွံဒးဒှ်ဓဝိၚ်ကဵု အန္တရာယ်လမျီုရဂှ် ဟီုသ္ဂးလဝ်ရ။
တ္ၚဲဂှ် အခိၚ်ဇိုၚ်သဝ်တ္ၚဲ ပ္ဍဲအရာပ်တုၚ်ကုမ် ဍုၚ်သဓီု တၞံဆုလ္ၚဵုဒေါံကၟိုၚ်စှ်ေတုဲ သ္ၚိဒၟံၚ် (၂) မ ၜိုန်ရဇီုကပိုက် လီုလာ်လဝ်ကီုလေဝ် မၞိဟ်ဇီုကပိုက်ဒးလဝ်ဘဲဝပ် ဟၟဲရဂှ် ဂွံတီကေတ်ရ။
ဟိုတ်နူဗြဲဂူတြိုပ်စှ်ေတုဲ ပ္ဍဲအရာပ်အောက်ကျေန်၊ နာန်ခေဝ်၊ တုၚ်ကုမ်၊ ဘၚ်ဍိုၚ် ဍုၚ်သဓီု သီုပ္ဍဲကွာန်လ္ၚဵု ဍာ်ဇၞော်လဝ် က္တဵုဒှ်လဝ်ရ။
ဟိုတ်နူဗွိုၚ်ကျာဓရိုဟ် က္တဵုဒှ်ဒၟံၚ်လၟုဟ်တုဲ ပ္ဍဲတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သြဳ မဒှ်ဒေသသ္ကုတ်သၠုၚ်ကျာ ကၟိန်ဍုၚ်ဗၟာဂှ် ဗြဲတြိုပ်ဂူစှ်ေဇၞော်ကဵုဇြဟတ်ကီု သီုကဵုဒးသ္ပသတိကဵု အန္တရာယ်တိဒဵုလာ်စှ်ေ ဗွဲတၟေၚ်ရဂှ် ဌာနစမ်ၜတ်ဗြဲကျာ လလောၚ်တြးလဝ်ရ။
အလုံမွဲတွဵုရးဍုၚ်မန် ဟိုတ်နူပရေၚ်ဍာ်ဇၞော် က္တဵုဒှ်လဝ် ပ္ဍဲဂိတုဂျူလာၚ် တတိယသတ္တာဟ တုဲကၠုၚ်တေံတုဲ မၞိဟ်(၄)တၠ ပါလုပ်သီုကောန်ၚာ်သၟတ် (၃)တၠ ဒးဗၠိုက်ဍာ် ချိုတ်လဝ်တုဲ ညးဒေသဂၠိုၚ်ကဵုလ္ၚီ ဒးလဝ်ဘဲဒဏ်ဍာ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai