ဒဝ်အံၚ်သာန်သုကျဳကဵု သမ္မတဥူဝေန်မျေတ်တအ် ကံၚ်ဇြဳပၞာန်ဖ္အောန်ယှအ်ဖျေံ ဒဏ်ထံၚ်လ္ၚဵု

နေပျဳဒဝ် – အဝ်ဂေတ်(၂)

ပၞောဝ်ကဵုဂဗုတ်စောဲစပ်လဝ် သမ္မတကၟိန်ဍုၚ် ဥူဝေန်မျေတ်ကဵု ညးကဵုက္သပ်ကၟိန်ဍုၚ် ဒဝ်အံၚ်သာန်သုကျဳတအ် ဟွံဗဗွဲဓဝ် ဖျေံလဝ်ဒဏ်ထံၚ်တုဲ ဂဗုတ်လ္ၚဵုဂှ် သ္ပကဵုလဝ်အခေါၚ် ဗၠးတိတ်သက်သာရဂှ် ကံၚ်ဇြဳပၞာန် လလောၚ်တြးလဝ်ရ။

အတိုၚ်သၞောဝ်လၟေတ်ရာဇဝတ် ၝောံပိုဒ် ၄၀၁- ပိုဒ်လ္ပာ်(၁) ကဵုလဝ်အခေါၚ်ဗၠးၜးသက်သာ ကုက္ဍိုပ်သ္ကိုပ်ကၟိန်ဍုၚ်ရဂှ် ကံၚ်ဇြဳပၞာန် လလောၚ်တြးလဝ် နူမဳဒဳယာမြဝတဳဒပ်ပၞာန်ရ။

ဂဗုတ်စောဲစပ်လဝ် လ္တူသမ္မတကၟိန်ဍုၚ် (၂)ဂဗုတ် သ္ပကဵုလဝ်အခေါၚ် ဗၠးၜးသက်သာကီု ပၞောဝ်ကဵုဂဗုတ် စောဲစပ်လဝ် ဒဝ်အံၚ်သာန်သုကျဳ ညးကဵုက္သပ်ကၟိန်ဍုၚ်ဂှ် ကံၚ်ဇြဳပၞန်သ္ပကဵုလဝ်အခေါၚ်ဗၠးၜးသက်သာ (၅)ဂဗုတ်ရ။

စဵုကၠာနူဟွံဂွံသ္ပကဵုအခေါၚ်ဗၠးသက်သာ နူဒုဟ်ဒဏ်ဏီဂှ် သမ္မတဥူဝေန်မျေတ် ဒးဒုၚ်ဖျေံလဝ်ဒဏ်ထံၚ် (၁၂)သၞာံ နကဵုဂဗုတ် (၈)ဂဗုတ်တုဲ ဒဝ်အံၚ်သာန်သုကျဳဂှ်မ္ဂး သွက်ဂဗုတ် (၁၉)ဂဗုတ် ဒးဒုၚ်ဖျေံလဝ်ဒဏ်ထံၚ် ပွိုၚ်(၃၃)သၞာံရဂှ် ဂွံတီကေတ်ရ။

အခိၚ်ကံၚ်ဇြဳပၞာန် သ္ပကဵုအခေါၚ်ဗၠးၜးတုဲဂှ် ဒဏ်ထံၚ်ညးကဵုက္သပ်ကၟိန်ဍုၚ် နူကဵု (၃၃)သၞာံဂှ် အောန်ယအ်စှ်ေအာ (၆)သၞာံကီု ဒဏ်ထံၚ်သမ္မတကၟိန်ဍုၚ် နူကဵု (၁၂)သၞာံဂှ် အောန်ယအ်စှ်ေအာ (၄)သၞာံရ။

ကံၚ်ဇြဳပၞန်သီအဝဵုဂှ် ပါဲနူဖ္အောန်ယှအ်ဖျေံဒုဟ်ဒဏ် က္ဍိုပ်သ္ကိုပ်ကၟိန်ဍုၚ်ၜါတၠဂှ် ကောန်ထံၚ် (၇၇၄၉)တၠ ဒးဒုၚ်ရပ်လဝ် အလုံမွဲကၟိန်ဍုၚ်လေဝ် ကဵုကၠုၚ်အခေါၚ်ဗၠးတိတ်တုဲ ကောန်ထံၚ်ဒးဒုၚ်ဖျေံလဝ်ဒဏ်ဂစိုတ်တအ်ဂှ်လေဝ် ပြံၚ်စၠောံလဝ် ဒဏ်ထံၚ်မွဲအာယုက်ရဂှ် လလောၚ်တြးလဝ်ရ။

သ္အာၚ်နူဂှ်ပၠန် ကောန်ဂကောံ MNDAA၊ TNLA ကေုာံ SSPP မဒှ်ဂကောံရပ်လွဟ်ကောန်ဍုၚ်အရၚ် (၁၅)တၠ သီုညးဆက်စပ် (၇၂)တၠ သ္ပကဵုလဝ်အခေါၚ်ဗၠးတိတ်ရဂှ် ကံၚ်ဇြဳပၞာန် လလောၚ်တြးလဝ်ရ။

ကြဴနူဒပ်ပၞာန်သီအဝဵု ကၟိန်ဍုၚ်ဗၟာတုဲ ကောန်ထံၚ်ပရေၚ်ကွာန် (၂)လက်ပြၚ် ဒးဒုၚ်ရပ်စပ်ထိၚ်ဒဝ်လဝ်တုဲ ဒးဒုၚ်ကလိလောန်ဖံက်ပ္ကဝ်ဒၟံၚ် အခေါၚ်အရာမၞိဟ် ပ္ဍဲထံၚ်ရဂှ် ဂကောံမၚ်မွဲရံၚ်စံၚ် ကောန်ထံၚ် ပရေၚ်ဍုၚ်ကွာန် AAPP ဓမံက်ထ္ၜးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Getty Images