သၚ်မွဲဇကု ဆၚ်စှ်ေ နူဒဒန်သြၚ်လောန်(မတ်မလီု)

မတ်မလီု – အဝ်ဂေတ်(၃)

တွဵုရးဍုၚ်မန်၊ နူဒဒန်သြၚ်လောန်(မတ်မလီု) သၚ်မွဲဇကု ဆၚ်စှ်ေအာ ပ္ဍဲက္ၜဳသြၚ်လောန်ရဂှ် ဂကောံရီုဗၚ်ဟံၚ်ပြာ်မၞိဟ် ဖျေံသ္ဇိုၚ်ဍုၚ်မတ်မလီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပရေၚ်ဒဒှ်ဂှ် တ္ၚဲဏံ ဂိတုအဝ်ဂေတ် စၟတ်တ္ၚဲ (၂) အခိၚ်နူဂယး ၜိုတ်(၁၁)နာဍဳ ဥူအာစိန္တကဵု ထပိုဲဇၞော်ဥူကောသလ္လ(က)ဥူကာန်ဖာန် နူဘာယှိုဲယေန်အေ၊ ဍုၚ်မုဟ်တၟံ၊ ပွိုၚ်ဍုၚ်ပံၚ်တအ် ညးၜါဇကု အခိၚ်ကၠုၚ်ထ္ၜးယဲ ပ္ဍဲရုၚ်ဂဥုဲမတ်မလီု ကဵုကွဳစက်သၠာပိဂှ် ထပိုဲဇၞော်ဥူကောသလ္လ ဆၚ်စှ်ေအာ နူဒဒန်ရ။

ထပိုဲဇၞော်ဥူကောသလ္လဂှ် ပ္ဍဲဒဒန်သြၚ်လောန်(မတ်မလီု) ဒယိုၚ်ဗ္ၜတ်ဍာ် စၟတ် (PR-11) ကဵု(PR-12) ဂှ် မိက်ဂွံအာပဿဴ ဟီုလ္တူကွဳစက် ဗဒေါံကွဳစက်သၠာပိတုဲ ကၠောံအာလ္ပာ်စကြံမၞိဟ်ကွာ် လ္ပာ်တဲပုၚ်ဒဒန် ဂၠံၚ်အာ နူမုဟ်တၟံ မတ်မလီုတုဲဂှ် တိုန်လ္တူဗလဲဒဒန်တုဲ ဆၚ်စှ်ေအာ က္ၜဳသြၚ်လောန်ရဂှ် ဂွံတီကေတ်ရ။

အခိၚ်လၟုဟ်ဏံ ထပိုဲဇၞော်ဥူကောသလ္လ ဆၚ်စှ်ေနူဒဒန်ဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ဂၠိုက်ဂၠာဲဒၟံၚ်ရဂှ် ညးလုပ်ဂကောံ ဂကောံရီုဗၚ်ဟံၚ်ပြာ်ပရေၚ်မၞိဟ် ဖျေံသ္ဇိုၚ်ဍုၚ်မတ်မလီုမွဲတၠ ဟီုကဵု ဌာန်ပရိုၚ်သြန်လောန်တိုၚ်(မ်)ရ။

ထပိုဲဇၞော်ဥူကောသလ္လ ဆၚ်စှ်ေအာပ္ဍဲက္ၜဳသၚ်လောၚ်ဂှ် ဌာနက္ဍိုက်က္ဍိုပ်ပလိုတ်ပၟတ်ကၟိန်ဍုၚ်ဗၟာ Rescue Team ကေုာံ ဂကောံရီုဗၚ်ဟံၚ်ပြာ်မၞိဟ်ကာတၟေၚ် ဖျေံသ္ဇိုၚ်ဍုၚ်မတ်မလီုတအ် ပံၚ်တောဲတုဲ ၜိုန်ရဗက်ဂၠာဲဒၟံၚ် ပ္ဍဲက္ၜဳသြၚ်လောန်ကီုလေဝ် စဵုကဵုလၟုဟ် ဂၠာဲဟွံဂဗဆဵုဏီရ။

ပရိုၚ်-သြၚ်လောန်တိုၚ်(မ်)

ဗီုရုပ် – CJ