အခိၚ်ပရေၚ်ဒိဓဗတ်ကွတ်နဲပညာ ကုအမေရိကာန် သၠုၚ်တိုန်ဒၟံၚ်ဂှ် အလဵုအသဳကြုက် သၞောတ်ဗ္ၜတ်ထောံ ပရေၚ်ပလံၚ်ပ္တိုန်ဒရုၚ် ဍုၚ်သ္အာၚ်

ဗေကျေန်၊ အဝ်ဂါတ် (၂)

အခိၚ်ဇြဟတ်ပရေၚ်ဆက်ဆောံ ကုကၟိန်ဍုၚ်အမေရိကာန် ကြံၚ်မ္ၚိုဟ်ကၠုၚ်ဒၟံၚ် ပ္ဍဲအရာကွတ်နဲပညာတံဂှ် ထိၚ်ဒက်အာ ပရေၚ်ပလံၚ်ပ္တိုန်ဍုၚ်သ္အာၚ် ဒရုၚ် ကေုာံ ကပေါတ်ဆက်စပ်ဂမၠိုၚ်တံဏောၚ်ဂှ် အလဵုအသဳကြုက် ဟီုဂးလဝ်ရ။

ဒးသၞောတ်ဗ္ၜတ်ထောံ သာ်ဏံဂှ်ဝွံ ဟိုတ်နူမိက်ဂွံစဵုဒၞါ “ပရေၚ်ဂီုကၠီု ကေုာံ ဒတုဲဖဵုကၟိန်ဍုၚ်” ရောၚ်ဂှ်လေဝ် ဟီုဂးလဝ်ရ။

ပ္ဍဲအရာသၞောတ်ဗ္ၜတ် လ္တူကပေါတ်ကိရိယာတံဂှ် စက်အေန်ဂျေန်ကြုက်လ္ၚဵုတံ၊ လေသာတံ၊ ကိရိယာဆက်စၠောံ ကေုာံ သၞောတ်ဒစဵုဒစးဒရုၚ်တံ ပါလုပ်တုဲ တၚ်သၞောတ်ဗ္ၜတ်ဏံဝွံ ပ္ဍဲဂိတုသေပ်တေမ်ဗာ (၁) ဏံ စတုဲလမျီုလုပ်အာဏောၚ်ဂှ် ဌာနဝန်ဇၞော်ကူသာန်သွံရာန်ကြုက် ဟီုဂးလဝ်ရ။

ပရေၚ်ထိၚ်ဒက်သာ်ဏံဂှ်ဝွံ အာဇီုကပိုက်ဒၟံၚ်ကဵု လ္တူမၞိဟ်မိက်ဂွံရာန်ဒရုၚ်တံရ။ တုဲပၠန် ဒရုၚ်သွက်ဂွံရပ်စပ်စကာ နကဵုတၚ်ရန်တၟံပရေၚ်ပၞာန်တံဂှ်လေဝ် အခေါၚ်ပလံၚ်ပ္တိုန်ဟွံမွဲပုဟ်ဂှ် သၞောတ်ဗ္ၜတ်လဝ်ရ။

အတိုၚ်ဂလာန် ညးမၞုံအခေါၚ်ဟီုဂးပရေၚ်ကူသာန်သွံရာန်ကြုက်ဂှ်မ္ဂး သၟိၚ်တၠအဝဵုကြုက်တံဝွံ ကဵုလဝ်ပရိုၚ် ကုကၟိန်ဍုၚ် ကေုာံ ဒေသ မဆေၚ်စပ်တံတုဲယျဂှ် ဂွံတီကေတ်ရ။

ကြုက်ဝွံ ပိုၚ်ပြဳလဝ် ကမၠောန်ပရေၚ်ကၠောန်ပ္တိတ်ဒရုၚ် အဇာဇၞော်တုဲ ဂွံပလံၚ်ပ္တိုန်လဝ် ဗွဝ်ဖျာဍုၚ်သ္အာၚ်ဗွဲမဂၠိုၚ်ဂၠၚ် ပါလုပ်သီုကဵုကၟိန်ဍုၚ်အမေရိကာန်ရ။

စပ်ကဵုကိစ္စသၞောတ်ဗ္ၜတ်ထောံ ပရေၚ်ပလံၚ်ပ္တိုန်ဒရုၚ်တံ သာ်ဏံဂှ်တုဲ တၚ်သၟာန် နူကဵုဌာန်ပရိုၚ်ရာ်တာဂှ် ဌာနကူသာန်သွံရာန်ပရေၚ်ပိုန်ဒြပ် ကေုာံ ဌာနက္ဍိုက်ပ်ပရေၚ်စဵုဒၞါတံ ကလေၚ်သှ်ကဵုလဝ်ဂှ် ဟွံမွဲရ။

ပ္ဍဲကဵုကောန်ဂရိတ် အမေရိကာန် သၞာံ ၂၀၁၉ တေံ ပွမရာန်ကေတ် ဒရုၚ် ကေုာံ ကပေါတ်ဆက်စပ် နူကဵုဍုၚ်ကြုက်တံ ဟွံသေၚ်မ္ဂး ပွမရပ်စပ်စကာတံဂှ် ကေၚ်သၞောတ်ဗ္ၜတ်လဝ်ကီုရ။

ဒရုၚ် မကၠောန်ပ္တိတ် နူကဵုကမ္ပဏဳဖျေံသ္ဇိုၚ်ကြုက် DJI (၅၀) တၟံကၠံဂှ် သွံတြးဒၟံၚ် ပ္ဍဲဍုၚ်အမေရိကာန်တုဲ ရပ်စပ်စကာဒၟံၚ် ပ္ဍဲကဵုအေဂျေန်ဇြဳဂီုကၠီုညးဍုၚ်ကွာန်တံ သၠဲသၠဲလးလးရ။

DJI ဂှ် ဒ္ဂေတ်ဗက်သၞောဝ်ဥပဒေ ကေုာံ နဲသၞောဝ်ဥပဒေတံဂှ်တုဲ အတိုၚ်တၚ်နွံပၟိက် နဲဥပဒေ ပရေၚ်ထိၚ်ဒက်ဗၞိက်ပလံၚ်ဍုၚ်သ္အာၚ် ကြုက်တံဂှ်လေဝ် လ္ၚတ်အာဏောၚ်ဂှ် ဟီုဂးလဝ်ရ။

“ပိုယ်တံဝွံ သွက်တၚ်ရန်တၟံပရေၚ်ပၞာန်တုဲ ကၠောန်ပ္တိတ်လဝ် ကပေါတ်ကိရိယာပိုယ်တံဂှ် ဟွံမွဲတုဲ အပ္ဍဲပဋိပက္ခပရေၚ်ပၞာန် ဍုၚ်မွဲကုမွဲဂှ် သွက်ဂွံရပ်စပ်ဗၞိက်တိတ်နူပိုယ်တံမာန်ဂှ်လေဝ် ဟွံသၠဲပ္တိတ်ဗွဝ်ဖျာပုဟ်” ဂးတုဲ ညးတာလျိုၚ် နူကဵု DJI ဟီုဂးလဝ်ရ။

ပ္ဍဲသၞာံ ၂၀၂၂ ဂိတုမာတ်ချ်တေံ ဂကူဂျာမာန် မၞိဟ်သွံကပေါတ်တြးမွဲတၠဂှ် DJI ဝွံ တၚ်နၚ်ဒၞါဲဒတန်ပရေၚ်ပၞာန်ယူကရုၚ်တံဂှ် လှဲပြံၚ်ပအပ်ကဵုလဝ် ဇရေၚ်ရုယှာရောၚ် တၚ်စောဲစပ်သာ်ဏံလေဝ် ကေၚ်မံက်လဝ်ရ။

အပ္ဍဲဂိတုတုဲကၠုၚ်တေံ လ္ပာ်အမေရိကာန်တံ ကြဴနူလလောၚ်တြး သွက်ဂွံထိၚ်ဒက် ပရေၚ်ပလံၚ်ပ္တိုန်သတ္တု မရပ်စပ်ဂၠိုၚ် ပ္ဍဲအရာကၠောန်ပ္တိတ်ဂတှ်ေချေပ် ပ္ဍဲကဵုဍုၚ်ကြုက်တံတုဲဂှ် တၚ်တာဒၞါ ပရေၚ်ပလံၚ်ပ္တိုန်ဒရုၚ်ဍုၚ်သ္အာၚ် အလဵုအသဳကြုက်တံဂှ် မံက်တိတ်ကၠုၚ်လဝ်ရ။

Ref: Reuters