ၜဳကလေၚ် – အဝ်ဂေတ်(၃)
တွဵုရးဍုၚ်မန်၊ ဍာ်က္ၜဳ ၜဳကလေၚ်ဂှ် လ္တူနူဗ္ၜတ်အပိုၚ်ခြာဒှ်ဓဝိၚ်ဍုၚ်ဂှ် လောန်ၜက်စိုပ်ဒၟံၚ် ကဝ်ကပေပြၚ်ရဂှ် ဌာနစမ်ၜတ်အကာဲအရာဗြဲကျာကံၚ်ဇြဳပၞာန် လလောၚ်တြးလဝ်ပရိုၚ် တၚ်ၜတ်ဗၞတ် ပ္ဍဲဂိတုအဝ်ဂေတ် စၟတ်တ္ၚဲ (၂)အခိၚ်နူဂယး (၇)နာဍဳရ။
ဍာ်က္ၜဳဂှ် ဂတနူဏံ (၁)တ္ၚဲမ္ဂး ဟိုတ်နူဆက်ဂၠိုၚ်တိုန်ကၠုၚ် လ္တူနူဗ္ၜတ်အပိုၚ်ခြာဒှ်ဓဝိၚ် စဵုကဵု (၁)ပေပြၚ်မာန်ဒၟံၚ်ဂှ်ရ ညံၚ်ညးမမံၚ်တန်တဴဒၟံၚ် ပ္ဍဲဗ္ဒာဲမွဲဗွိုၚ်က္ၜဳ ကေုာံ ပ္ဍဲဒၞာဲတိသဝ် ပွိုၚ်ဍုၚ်ၜဳကလေၚ်တအ် ဂွံသ္ပသတိဗွဲတၟေၚ်တုဲ မံၚ်တန်တဴအာဂှ် ဗတိုက်ဖ္အောဝ်လဝ်ရ။
အခိၚ်လၟုဟ်ဏံ ဟိုတ်နူဗြဲတြိုပ်ဂူဒၟံၚ် သ္ကာတ်မြဟ်ဂှ်ရ တ္ၚဲဏံဂိတုအဝ်ဂေတ် စၟတ်တ္ၚဲ (၂) အခိၚ်နူဂယးဂှ် ကွာန်ပ္ဍဲပွိုၚ်ဍုၚ်ၜဳကလေၚ်လ္ၚဵု ဍာ်ဇၞော်ဗၠိုက်ဍာ် က္တဵုဒှ်ဒၟံၚ်ဂှ်ရ နွံဒၟံၚ်ပၟိက်ကဵု အရီုဗၚ်ကာတၟေၚ်ရဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ကဵုလဝ်သမ္တီရ။
ကၟိန်ဍုၚ်ဗၟာ ပ္ဍဲရးဒေသ ကေုာံတွဵုရးတအ်ဂှ် ဗြဲဇၞော်မာန်တုဲ၊ ပ္ဍဲဒေပြၚ်က္ၜဳတအ် ဗြဲဇၞော်ကျာထတ်မာန်ဒၟံၚ်ရဂှ် ဌာနစမ်ၜတ် အကာဲအရာဗြဲကျာကံၚ်ဇြဳပၞာန် လလောၚ်တြးလဝ် ပရိုၚ်ရ။
သ္ပတံနူ ဂိတုဂျူလာၚ် စၟတ်တ္ၚဲ (၂၈)တုဲကၠုတေံ ဟိုတ်နူဗြဲဂူစှ်ေ အဆက်ဟွံပိုတ်သ္ကုတ်တုဲ ပ္ဍဲပွိုၚ်ဍုၚ်ကျာ်ထဝ်၊ ပံၚ်၊ မုဟ်ဍုဟ်၊ ဇြပ်ဗု ကေုာံ ပွိုၚ်ဍုၚ်ရေဝ်တအ် ဍာ်ဇၞော်ဒၟံၚ်တုဲ ဒးပဆုဲပြံၚ်လဝ် ညးဍုၚ်ကွာန်ဒးဘဲဒဏ်ဍာ်တအ် နဒဒှ်ကာတၟေၚ် နွံရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် တတိယသတ္တာဟဂှ်လေဝ် ဟိုတ်နူဍာ်ဇၞော်လဝ် အလုံမွဲတွဵုရးဍုၚ်မန်တုဲ မၞိဟ် (၄)တၠ ပါလုပ်သီုကောန်ၚာ်သၟတ် (၃)ဒးချိုတ်လဝ်ကီု ညးဒေသဂၠိုၚ်ကဵုလ္ၚီ ဒးလဝ်ဘဲဒဏ်ဍာ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai