တၞၚ်သြဳ၊ အဝ်ဂေတ်(၃)
ရးဒေသဇၞော်တၞၚ်သြဳ၊ အာစိုပ်ဗတိုက်လဝ် တံဒပ်ခမရ ၅၆၁ ဖျေံသ္ဇိုၚ် ပွိုၚ်ဍုၚ်တၞၚ်သြဳကေုာံ ရုၚ်ပရေၚ်ဂီုကၠီုသွာၚ်ပၞာန်(စရဖ) တအ် နလွဟ်ဇၞော်ဍောတ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။
တံဒပ်ပၞာန်တိုက်ကံၚ်ဇြဳပၞာန် ခမရ ၅၆၁ ဖျေံသ္ဇိုၚ်ကွာန်ညံၚ်ပေန်ကွေန် ပွိုၚ်ဍုၚ်တၞၚ်သြဳဂှ် ပ္ဍဲဂိတုအဝ်ဂေတ် စၟတ်တ္ၚဲ (၁) တုဲကၠုၚ် အခိၚ်ဒေါဝ်တ္ၚဲဂှ် ဒပ်ပံၚ်ကောံ ဒပ်စဵုဒၞာဒေသတအ် အာစိုပ်ဗတိုက်လဝ်ရ။
ဟိုတ်နူပရေၚ်ဗတိုက်ပန်ဏံ ပရေၚ်ပန်ပှ်ောၜါလ္ပာ် က္တဵုဒှ်လဝ် ဗ္ဒာဲပွိုၚ် (၂၀) မိနေတ်တုဲဂှ် ပရေၚ်ဇီုကပိုက်ဒး လ္ပာ်ဒပ်ပံၚ်ကောံတအ် မမိက်ကဵုမွဲမွဲဟၟဲတုဲ ဆုတ်ကလေၚ်တိတ်ကၠုၚ်မာန်လဝ်ရဂှ် ညးတာလျိုၚ်ဒပ်ဒမၠုက်ဗေတ်မလိုက်မွဲတၠ ဟီုသ္ဂးလဝ်ရ။
တ္ၚဲဏံ အခိၚ်ဇိုၚ်သဝ်တ္ၚဲဂှ်လေဝ် ဒပ်ပံၚ်ကောံတအ် အာစိုပ်ဗတိုက်လဝ် ရုၚ်ပရေၚ်ဂီုကၠီုသွာၚ်ပၞာန် (စရဖ) ကေၚ်ကာပၞာန်ပွိုၚ်ဍုၚ် ကံၚ်ဇြဳပၞာန် နကဵုလွဟ်ဇၞော်ရ။
ပ္ဍဲပရေၚ်ဗတိုက်လဝ် တံဒပ်ကံၚ်ဇြဳပၞာန်ကဵု ရုၚ်စရဖဂှ် ပရေၚ်ဇီုကပိုက် လ္ပာ်ကံၚ်ဇြဳပၞာန်ၜိုန်နွံကီုလေဝ် ဃောလ္ၚတ်ဂၠိုက်ဂၠာဲဒၟံၚ် အကာဲအရာဗလးမုက်တိ သောဲသောဲဗြောဲဗြောဲရဂှ် ဟီုသ္ဂးလဝ်ရ။
ကြဴနူဒးဒုၚ်ဗတိုက်လဝ်တုဲ ဟိုတ်နူပန်ဖျေံနၚ်လွဟ်ဇၞော် နူတံဒပ်ကံၚ်ဇြဳပၞာန်ကြာန်န်ဂှ် သ္ၚိဒၟံၚ်ညးဍုၚ်ကွာန် မၞုံဍုၚ်တၞၚ်သြဳ (၂) မ ဇီုကပိုက် ဒးလီုလာ်လဝ်ရဂှ် ညးဒေသတအ်ဟီုသ္ဂးလဝ်ရ။
ရးတၞၚ်သြဳဂှ် ပ္ဍဲဂိတုဂျူလာၚ်တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် လၟိဟ်ပေါဲဗတိုက်ၜါလ္ပာ် က္တဵုဒှ်လဝ် ဟွံအောန်နူ (၅၀) ဝါနွံတုဲ လ္ပာ်ကံၚ်ဇြဳပၞာန် ဒးဂိလဝ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန ပ္ဍဲဒေသဂှ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media
sanlontai