ကၠာဟွံစိုပ်ကောံဓရီု G-20 ပ္ဍဲအိန္ဒိယ ဟိုတ်နူပဋိပက္ခပရေၚ်ဘာသာတုဲ ဒးဂဗဒၟံၚ်အခက်ခုဲ

နယူဒေလဳ – အဝ်ဂေတ် (၆)

ပ္ဍဲကၟိန်ဍုၚ်အိန္ဒိယ သွက်ဂွံဒုၚ်တဲကၠောန်ဗဒှ်ကောံဓရီု G-20 မွဲကရောံကဵု သ္ကိုပ်ဝန်ဇၞော်မိုဝ်ဒဳ ပ္တိတ်ဒၟံၚ်ဇြဟတ်ဂှ် ဟိုတ်နူပဋိပက္ခပ္ကီုပရာပ် ပရေၚ်ဘာသာ က္တဵုဒှ်ကၠုၚ် အကာဲအရာပရေံဒၟံၚ်တုဲ ဒးဂဗဒၟံၚ်ကဵု တၚ်ခက်ခုဲရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၉) ကၠုၚ်စိုပ်ဂတဏံ သမ္မတအမေရိကာန် ဂျိုဝ်ဗိုၚ်ဒါန် ကေုာံ က္ဍိုပ်သ္ကိုပ်ကြုက်ယှဳတအ် သွက်ဂွံကၠုၚ်စိုပ် ပ္ဍဲဗ္ဒာဲသၞေဟ်က္ၜၚ်ကျာကၟိန်ဍုၚ်နာနာနယူဒေလဳ နွံဒၟံၚ်ဂှ် ဟိုတ်နူပဋိပက္ခ ဟိန္ဒူကဵုမောဿလေန်တုဲ ဒးချိုတ်လဝ် (၆)တၠရ။

စပ်ကဵုပဋိပက္ခက္တဵုဒှ်လဝ် လ္တူဍုၚ်ဇၞော်တုဲ ဟိုန်နူသ္ကိုပ်ဝန်ဇၞော်မိုဝ်ဒဳ ရမျှာၚ်သ္ၚိဒၟံၚ်ဂှ်ရ လ္ပာ်ဒိုဟ်ဨသာန်ကၟိန်ဍုၚ် ခရာ(၂၅၀၀၀) ကဳလောမဳတာ ပ္ဍဲတွဵုရးမဏိပူရဂှ် အကာဲအရာ သာပရေံဒၟံၚ်ရ။

သမ္မတဗိုၚ်ဒါန်ကဵု က္ဍိုပ်သ္ကိုပ်ဒဳမဝ်ကရေတ်တေတ်တၞဟ်တအ်ဂှ် ပ္ဍဲကဵုကၟိန်ဍုၚ် လၟိဟ်မၞိဟ်ဂၠိုၚ်အိုတ် လ္တူဂၠးကဝ်ဏံ မွဲဍုၚ် ညံၚ်ဂွံဓမံက်ဟီုပ္တိတ် စပ်ကဵုအခေါၚ်အရာမၞိဟ်တုဲ ပရေၚ်ကဵုဒၟံၚ်ဇြဟတ်ဓရိုဟ်လေဝ် နွံရ။

ပဋိပက္ခပရေၚ်ဘာသာ ကေုာံပရေၚ်ကောန်ဍုၚ်အရၚ်တအ်ဂှ် နူကဵုအကာဲအရာညာတ်ကေတ်လဝ် ကၟိန်ဍုၚ်အိန္ဒိယ နဒဒှ်အရာဒးရုဲစှ် ဆေၚ်စပ်ကဵုပရေၚ်ကၠောန်ပ္တိတ် သွက်ပရေၚ်ဓလိုက်တမ်ရိုဟ် ဟၟဲကဵုအန္တရာယ်ဂှ် က္တဵုဗဒှ်ကဵုလညာတ်ပရေံမာန်ဒၟံၚ်ရဂှ် ဟီုသ္ဂးလဝ်ရ။

ဌာနဝန်ဇၞော်ဍုၚ်သ္အာၚ်အိန္ဒိယဂှ် ပ္ဍဲကောံဓရီုညးစၞး G-20 တအ်တိုန်စိုပ်ဂှ် မ္ၚးနူဍုၚ်နယူဒေလဳ ကုမ္ပဏဳ Microsoft ကေုာံ Alphabet’s Google မဒှ်ကမၠောန်ဆေၚ်ရာကဵုဂၠးကဝ်နွံဒၟံၚ်ဂှ်တုဲ ဒပ်ဂီုကၠီုတအ် မၚ်ရံၚ်ကျောဝ်ဒၟံၚ် ပ္ဍဲဂူရူဂရာမ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် တုဲကၠုၚ် မွဲၜါတ္ၚဲတေံလေဝ် ပ္ဍဲပေါဲရေၚ်ပရေၚ်ဘာသာဟိန္ဒူ ကြဴနူပဋိပက္ခဟိန္ဒူကဵု မောဿလေန်က္တဵုဒှ်တုဲဂှ် ပ္ဍဲဍုၚ် မၞုံတွဵုရးဂူရူဂရာမ်ကဵု တွဵုရးရာဟာတအ် ပရေၚ်ကြံၚ်မ္ၚိုဟ် ဆက်ဒှ်ဒၟံၚ် အဆက်က်ရ။

က္ဍိုပ်သ္ကိုပ်ဗော်ကောန်ဂရေတ်မွဲတၠဂှ်မ္ဂး ပရေၚ်ပိုၚ်ခြာ လ္တူကမၠောန်ကၟိတ် ကေုာံ ပရေၚ်ဖောအ်ဗြေဝ်တဴတက် သာနွံကၠုၚ်တုဲ သွက်ဂွံသောၚ်ကလးပြဒ္ဒညာ သၞောတ်ပါ်ဆီအုပ်ဓုပ်ကၟိန်ဍုၚ်ဂှ် ဒှ်ပရေၚ်တာဒၞာ ဇၞော်အိုတ်ရဂှ် ဟီုသ္ဂးလဝ်ရ။

ကၟိန်ဍုၚ်အိန္ဒိယ ပ္ဍဲမဏိပူရ အကြာဂကူမၞိဟ်လၟိဟ်အောန်ကဵု ဂကူမၞိဟ်လၟိဟ်ဂၠိုၚ် ညးလုပ်ဘာသာဟိန္ဒူတအ်ဂှ် ဒးဆေၚ်ဒၟံၚ်မုက်ကဵု ပဋိပက္ခ တၠုၚ်လအာဏံရ။

ဟိုတ်နူပရေၚ်ပ္ကီုပရာပ်တုဲ အုပ်ဓလီုအာဒၟံၚ် လ္တူကောံဓရီု G-20 ညံၚ်ရဴသၞိၚ်ရဂှ် တၠပညာဆိုက်ဗ္ဒက် ဖျေံသ္ဇိုၚ်နယူဒေလဳတအ် ဟီုသ္ဂးလဝ်တုဲ အကာဲအရာဏံ သွက်ဂွံဆေၚ်အာမုက် ပရေၚ်တၞဟ်ခြာဟွံတုပ်သၟဟ်အိန္ဒိယ ဗွဲမဂၠိုၚ်ဂှ် လ္တူပရေၚ်အုပ်ဓုပ်မိုဝ်ဒဳ ကေုာံ အစောန်စရာဲဍာ်ဒကေဝ် ဓမံက်ပြာကတ်ကဵုဟွံမာန်ရဂှ် ပရေၚ်သ္ၚဳဂၠိပ်ပါ်ပါဲလေဝ် နွံဒၟံၚ်ရ။

Ref,CNA