ၜဳကလေၚ်၊ အဝ်ဂါတ် (၆)
ဟိုတ်နူပရေၚ်ဍာ်ဇၞော် မက္တဵုဒှ်ဒၟံၚ် ပ္ဍဲကဵုပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ နွံပၟိက်ဒၟံၚ်ကဵု စၞစသုၚ်သ္ဇိုၚ်တံကဵု အရီုဗၚ်ဍာ်သုၚ်တံ ကာတၟေၚ်ရောၚ်ဂှ် ညးဒေသဂမၠိုၚ် ကေုာံ ဂကောံဟံၚ်ပြာ်မှာဇန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုအဝ်ဂါတ်မံက်တုဲကၠုၚ်တေံတုဲ ပ္ဍဲကဵုပွိုၚ်ဍုၚ်ၜဳကလေၚ်ဂှ် ဗြဲဂူဒၟံၚ်ဟွံပိုတ်သ္ကုတ်ဂှ်ကီု ဗ္ၜတ်ဍာ်ၜဳ ၜဳကလေၚ်လေဝ် လောန်ၜက်ကၠုၚ် ဗ္ၜတ်ဍာ်ဒးဂွိၚ်ဂှ်တုဲ အလုံမွဲပွိုၚ်ဍုၚ် ဍာ်ဇၞော်ဍာ်ကလိုပ်တံ က္တဵုဒှ်ဒၟံၚ်ရ။
ဟိုတ်နူပရေၚ်ဍာ်ဇၞော်ဍာ်ကလိုပ်ဂှ်တုဲ အရာပ်လ္တူဍုၚ်ၜဳကလေၚ် (၅) အရာပ်၊ လၟိဟ်ကွာန်အပံၚ် ၜိုတ် (၂၀) တံဂှ် ဍာ်ဗၠိုက်ဒၟံၚ်တုဲ ညးဍုၚ်ကွာန်ဒးဘဲဍာ် ဂၠိုၚ်ကဵုဠက် ဒးဆုဲပြံၚ်လဝ် ကာတၟေၚ်ရ။
သွက်ညးဍုၚ်ကွာန်ဒးဘဲဍာ်တံဂှ် ဒးပံက်လဝ် ဗ္ဒိုပ်ဟံၚ်ပြာ်ယာယဳ ၂၄ ဗ္ဒိုပ် ပ္ဍဲကဵုဘာဗ္တောန်လိက် မၞုံအရာပ်သၠုၚ်ၚ် လ္တူဍုၚ်ၜဳကလေၚ်တံဂှ်ကဵု ဘာလကျာ်တံဂှ်ရ။
ၜိုန်ရညးဍုၚ်ကွာန်ဒးဘဲဍာ်တံ ဂၠိုၚ်ကၠုၚ်ကီုလေဝ် ဟိုတ်နူမၞိဟ်ကၠုၚ်စိုပ်ရီုဗၚ် အောန်ဒၟံၚ်ဂှ်ရ တၚ်နွံပၟိက် သွက်ဇွောံမစၞစ ကေုာံ ဍာ်သုၚ်တံ သၠုၚ်တိုန်ကၠုၚ်မံၚ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန်တံရ။
“အရာပ်လ္တူဍုၚ်ပိုယ်တံဂှ် ပြေပြံၚ်ဒၟံၚ်ညိဏီ။ ကွာန်လ္ၚဵုလ္ၚဵုတံဂှ်တှ်ေ ဟွံပြေပြံၚ်ပုဟ်။ ညးတံလေဝ် ဆုဲပြံၚ်အာ ဒၞါဲမကြပ်ကဵုဇကုတံဂှ်အိုတ်ရ။ ဍာ်ဗၠိုက်လ္ပာ်ကွာန်ရးတံဂှ် သာဂၠိုၚ်ရ။ ဟွံလောဲသွာပုဟ်။ စၞစသုၚ် ကေုာံ ဍာ်သုၚ်တံဂှ် နွံပၟိက်ဒၟံၚ် တၟာဂလိုၚ်ဏောၚ်” သာ်ဝွံ သ္ဂးရ။
ဍာ်ဇၞော်ဍာ်ကလိုပ်ဂှ်ဝွံ ပ္ဍဲကဵုကွာန် သ္ကုတ်ဗၟံက်ပွိုၚ်ဍုၚ်ၜဳကလေၚ် မဒှ်ကွာန်ဂကောံဗော်သွးကရေၚ် KNU တံ မထိၚ်ဒက်လဝ်ဂှ် က္တဵုဒှ်ဒၟံၚ်ပရေံအိုတ်တုဲ ဒးဒုၚ်စသိုၚ်ဒၟံၚ် ဘဲဒဏ်ဍာ်ဗၠိုက်အလုံကွာန်မွဲရ။
ဆ္ဂး ဘဲဍာ်ၜဳကလေၚ်ဂှ် လ္ပာ်ကံၚ်ဇြဳပၞာန် ရီုဗၚ်ရေၚ်တၠုၚ်ကဵု စဵုကဵုဟွံမွဲ အောန်ဒၟံၚ်တုဲ ညးဍုၚ်ကွာန်တံဝွံ ဒးရီုဗၚ်ဒၟံၚ်ညးသ္ကအ် နကဵုအစဳဇန်ဇကုဇကုရ။
ဂကောံအလဵုအသဳတွဵုရးဍုၚ်မန် သၟဝ်ပၠတရဴ သ္ကိုပ်ဝန်ဇၞော် ဥူအံၚ်ကျဳတုၚ် ကံၚ်ဇြဳပၞာန်မခါန်ကၞက်လဝ်ဂှ်လေဝ် ကၠုၚ်စိုပ်လဝ်ဟွံမွဲတုဲ နူကဵုဌာနပရေၚ်မၞိဟ် ကေုာံ ပရေၚ်ကလေၚ်ပ္တန်ပ္တူတံဂှ်လေဝ် ဒဵုကဵုအခိၚ်လၟုဟ် ကၠုၚ်ကဵုလဝ်အရီုဗၚ် ဟွံမွဲပုဟ်ဂှ် ညးဒေသတံ ဟီုရ။
ဟိုတ်နူပရေၚ်ဍာ်ဇၞော်ဍာပ်ကလိုပ် ပွိုၚ်ဍုၚ်ၜဳကလေၚ်ဂှ်တုဲ ဂၠံၚ်ကာမတ်မလီု−လ္ဂုၚ်ဂှ် ဍာ်ကၠောံက္တဵုဒှ်လဝ်တုဲ ကွဳစက်ဖ္ဍိုက်ဗၞိက်ၜါဖ္ဍိုက် ဂၠံက်ကလိတ်ပ္ကပ်အာတုဲ ဗၠိုက်အာလဝ်ဍာ်ရ။
ဆ္ဂး ဂၠံၚ်မတ်မလီု−လ္ဂုၚ်ဂှ်ဝွံ စနူဂိတုအဝ်ဂါတ် (၅) အခိၚ်လဒေါဝ်တ္ၚဲ (၁၂) နာဍဳဂှ်တုဲ ကွဳစက်ယာန်တံ ကလေၚ်အာကၠုၚ်ဂွံဒၟံၚ်ယျဂှ် ဂွံတီကေတ်ရ။
ဌာနက္ဍိုက်ပ်စၞောန်ပ္ညုၚ်ဗြဲကျာဂှ် နူကဵုတွဵုရးဍုၚ်မန်ဂှ် ၜဳၜဳကလေၚ်၊ နူကဵုတွဵုရးချေၚ်ဂှ် ၜဳဏယျေန်၊ နူကဵုတွဵုရးကရေၚ်ဂှ် ၜဳ(သောၚ်ရၚ်း) ကေုာံ ၜဳသၚ်လောန်တံ ဆက်လောန်ၜက်ဒၟံၚ် နူကဵုဗ္ၜတ်ဍာ်မဒးဂွိၚ်တံရောၚ်ဂှ် ပ္ဍဲဂိတုအဝ်ဂါတ် (၅) အခိၚ်နူဂယးတေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ
sanlontai