ဒပ်ကံၚ်ဇြဳပၞာန် ကလိလောန်ကၠုၚ် ပရေၚ်ဖံက်ပ္ကဝ်အခေါၚ်အရာမၞိဟ် ပ္ဍဲတိဍာ် KNU ဂှ် ဒှ်ကၠုၚ်ပရေံအိုတ်

ညံၚ်လေဝ်ပေန်၊ အဝ်ဂါတ် (၆)

ပ္ဍဲကဵုတိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဗွဲကြဴဏံ ဒပ်ကံၚ်ဇြဳပၞာန် မ္ၚးနူစွံကၠုၚ်ပွန်ဗ္တိုက် ကၠုၚ် လ္တူညးဍုၚ်ကွာန်ကောန်အရာပ်တံဂှ် သီုကဵုကလိလောန်ကၠုၚ်ဒၟံၚ် ပရေၚ်ဖံက်ပ္ကဝ်အခေါၚ်အရာ မၞိဟ်တံ ပရေံအိုတ်ရောၚ်ဂှ် ဂကောံအခေါၚ်အရာမၞိဟ်ကရေၚ် KHRG ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုတိဍာ်အုပ်ဓုပ် KNU ဂှ် ဟိုတ်နူကရောၚ်ပၞာန်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ ဆက်က္တဵုဒှ်ဒၟံၚ် ပေါဲဗ္တိုက်ဆေၚ်မုက် ကုဂကောံဒပ်ပံၚ်ကောံ ဒပ်စဵုဒၞါကောန်ဂကူကရေၚ် KNDO ၊ ဒပ်ပၞာန်ဗၠးၜးကောန်ဂကူကရေၚ် KNLA တံ ဗွဲမသ္ကာတ်မြဟ်ရ။

အပ္ဍဲပေါဲဗ္တိုက်တံဏံဂှ် ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံဂှ်တုဲ ပန်ပှော်စုတ်လွဟ်ဇၞော် အပ္ဍဲကမၠောန်ဝါဗ္ၚ ကေုာံ ပ္ဍဲကဵုကွာန်တံဂှ်ကီု၊ ဗ္တိုက်ကဵုတရဴကျာတံကီု၊ ပွဖံက်ပ္ကဝ်အခေါၚ်အရာမၞိဟ်တံဂှ်လေဝ် ကလိလောန်ဒၟံၚ် အဆက်က်ရ။

အတိုၚ်တၚ်လလောၚ်တြး KNU ဂှ်မ္ဂး ဒပ်ကံၚ်ဇြဳပၞာန်ဝွံ ပရေၚ်ဗ္တိုက်တရဴကျာ စွံပွန်လ္တူညးဍုၚ်ကွာန် ကောန်အရာပ်တံဂှ်ကီု၊ ပရေၚ်ပန်ပှော်လွဟ်ဇၞော်၊ ပရေၚ်ရပ်ဒက် နဒဒှ်ဇွောံစဵုဒၞါပၞာန်တံသၟးဟွံက ပရေၚ်ရပ်ဒက်ပျဲပျာံ ဂစိုတ်ဂယိုၚ်တံဂှ် မွဲဂိတုမ္ဂး အောန်အိုတ် ပရေၚ်ဖံက်ပ္ကဝ်အခေါၚ်အရာမၞိဟ်ဂှ် ကလိလောန်ဒၟံၚ် (၃၀၀) ဟွံအောန်ရ။

ဒပ်ကံၚ်ဇြဳပၞာန်ဝွံ ပ္ဍဲကဵုဒေသဒပ်မဟာ (၂) ၊ ဒပ်မဟာ (၃) ဒၞါဲပေါဲဗ္တိုက်သ္ကာတ်မြဟ်ဒၟံၚ်တံဂှ် သာတုဲကလိလောန်ကၠုၚ်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ်တံဂှ်တုဲ ဗွဲတၟေၚ် စံၚ်ပလီုပလာ် ပိုန်ဒြပ်အရပ်ရာညးဍုၚ်ကွာန်တံဂမၠိုၚ် မပ္တံကဵုသ္ၚိဒၟံၚ် ကေုာံ သြောံစာတ်တံဂှ် ဆက်ကၠောန်သ္ပကၠုၚ် ဒၟံၚ်ရောၚ် ညးဒုၚ်တာလျိုၚ်ပရေၚ်ဆဝ်မ္ၚုဟ် ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူ ဟီုရ။

“ပြဟ်ဟ်ဏံ လ္ပာ်ဒပ်မဟာ ၂၊ ဒပ်မဟာ ၃ တေံဂှ်လေဝ် ပရေၚ်ထ္ပက်ပၞာန်တံ၊ ပရေၚ်ဗ္တိုက်တံ အခေါၚ်အရာမၞိဟ်တံဂှ် သာတုဲဝးပ္ကဝ်ကၠုၚ်ဒၟံၚ်ရ။ ပရေၚ်ဗ္တိုက်တရဴကျာ၊ ပရေၚ်ဗ္တိုက်လွဟ်ဇၞော်၊ ညးဍုၚ်ကွာန်ဒေသ ကောန်ကွာန်တံလေဝ် ဇီုကပိုက်ကလိဂွံဝပ်တံ နွံတုဲ အရာမဆောံ လေၚ်လမျီုတံလေဝ် ဒးဂဗဒၟံၚ်ရ။ ဒးဒုၚ်စသိုၚ်ဒၟံၚ် ပရေၚ်ရပ်ဒက် ဟွံမွဲကဵုဗဗွဲဓဝ်တံရ။ ပရေၚ်မံၚ်စံၚ်ဆုဲပြံၚ်ဒၞါဲတံဂှ် လေပ်ဂဗတဴရ။ ဒပ်မဟာ ၁၊ ဒပ်မဟာ ၅၊ ဒပ်မဟာ ၆ တံဂှ် ပဋိပက္ခရပ်လွဟ်တံ နွံကၠုၚ်ရ။ ပရေၚ်ဗ္တိုက်တရဴကျာတံ၊ ပရေၚ်ဗ္တိုက် နကဵုလွဟ်ဇၞော်တံ၊ ပလီုပလာ်ပိုန်ဒြပ်ကောန်ကွာန်တံ၊ ဗွဲတၟေၚ် စံၚ်ပလီုပလာ်သ္ၚိဒၟံၚ်တံရ။ ဟိုတ်နူပရေၚ်ဗ္တိုက်လွဟ်ဇၞော် ကဵုက္ၜၚ်ကျာတံဂှ်တုဲ ဘာဗ္တောန်လိက်၊ ဗ္ဒမ်ကဵုဂဥုဲ ကေုာံ စမြိုၚ်ပရေၚ်ဘာသာတံ ဆက်တုဲဒးဇီုကပိုက်လီုလာ်တံ နွံဒၟံၚ်တုဲ ပရေၚ်ရပ်ဒက်ဟွံမွဲကဵုဗဗွဲဓဝ်၊ ပရေၚ်ပၠံၚ်ၜးတံဂှ်လေဝ် ဆက်တုဲက္တဵုဒှ်ဒၟံၚ်ရောၚ်” သာ်ဝွံ ဟီုရ။

ဟိုတ်နူပရေၚ်ဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ ပ္ဍဲကဵုတိဍာ်အုပ်ဓုပ် KNU ဂှ် လၟိဟ်ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်ဂှ်ဝွံ ​ၜိုတ် ၆ ကိုဋ်ပြၚ် နွံကၠုၚ်တုဲ သွက်ညးပါဲဒဴဘဲပၞာန်တံဂှ် ဆက်တုဲနွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ်ရ။

ညးဍုၚ်ကွာန်ပါဲဒဴဘဲပၞာန် မဒးဒုၚ်ဖံက်ပ္ကဝ်ဒၟံၚ်အခေါၚ်အရာမၞိဟ်တံဂှ်ဝွံ ဟိုတ်နူဒှ်အခိၚ်ကသီုဂှ်တုဲ အရာမနွံပၟိက် အရီုအဗၚ် မပ္တံကဵုဖ္ဍာန်ဒဒၚ်၊ ဇွောံမစၞစ ကေုာံ ဂဥုဲဇဗတံဂှ် သာတုဲသၠုၚ်တိုန်ကၠုၚ်ရ။

ညးဒုၚ်တာလျိုၚ်စန်ဒက်ဆဝ်မ္ၚုဟ် KHRG သဝ်နန္ဒသူဂှ် ပ္ဍဲကဵုညးဍုၚ်ကွာန် ဒးဒုၚ်ဝးပ္ကဝ်အခေါၚ်အရာ မၞိဟ်တံဂှ် ညးဗြဴဂမၠိုၚ်၊ ညးမၞုံကဵုဒၟုၚ်ဒၠေၚ်၊ မၞိဟ်ဇၞော်ဇၞော် ကောန်ၚာ်တံဂှ် သွက်ညးတံအိုဿီု သ္ဂောံကဵုပရေၚ်ရေၚ်တၠုၚ် ပရေၚ်ထတ်ယုက်တံဂှ် သာတုဲခက်ခုဲကၠုၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အခိၚ်ကသီုသာ်ဏံမ္ဂး သွက်ညးဗြဴ၊ သွက်ညးမၞုံကဵုဒၟုၚ်ဒၠေၚ် ကေုာံ ကောန်ၚာ်သၟတ်၊ ညးအာယုက်ဇၞော် ဇၞော်တံဂှ် သာတုဲတၚ်ကော်ဆဴတံဂၠိုၚ်ရ။ ဗွဲတၟေၚ် ပရေၚ်ရေၚ်တၠုၚ် ပရေၚ်ထတ်ယုက်တံဂှ် သာတုဲနွံပၟိက်ဒၟံၚ်ရ။ လ္ပာ်တေံ လ္ပာ်ဏံ သွက်ဂွံရေၚ်တၠုၚ်ကဵုဂှ် နွံပၟိက်ရ။ သွက်ညးဍုၚ်ကွာန် မဒးဒုၚ်ဝးပ္ကဝ်လဝ် အခေါၚ်အရာမၞိဟ်တံဂှ်လေဝ် ညံၚ်ဂွံဂွံကၠုၚ်ဗဗွဲဓဝ် ညံၚ်ဂွံဂွံကၠုၚ်အရီုဗၚ် ပရေၚ်ဗ္စာရဏာမၞိဟ် မနွံပၟိက်ဒၟံၚ်ဗွဲတၟေၚ်တံဂှ်လေဝ် သာတုဲ သွက်ဂွံဘိုၚ်ပူဗိုၚ်ကဵုဂှ် နွံပၟိက်ဒၟံၚ်ရောၚ်” သာ်ဝွံ သ္ဂးရ။

အပ္ဍဲဂိတုဂျူလာၚ်တုဲကၠုၚ်တေံ ပ္ဍဲကဵုတိဍာ်ဒပ်မဟာ (၂) ခရိုၚ်တံၚ်ဥူ KNU ဂှ် ဒပ်ကံၚ်ဇြဳပၞာန် ဟိုတ်နူထ္ပက်ဒၟံၚ်ပၞာန် ဗွဲမသ္ကာတ်မြဟ်ဂှ်ရ က္တဵုဒှ်လဝ် ပေါဲဗ္တိုက် ကုဒပ်ပံၚ်ကောံ KNLA တံ ဗွဲမသ္ကာတ်မြဟ်တုဲ အပ္ဍဲပေါဲဗ္တိုက်တံဂှ် ဒပ်ကံၚ်ဇြဳပၞာန်တံ ကလိလောန်လဝ် ပရေၚ်ဗ္တိုက်တရဴကျာ လ္တူကွာန်ရးဂမၠိုၚ်ဂှ် ဟွံအောန်နူကဵု (၃၀) ဝါရ။

သ္အာၚ်နူဂှ်ပၠန် အပ္ဍဲခရိုၚ်ညံၚ်လေဝ်ပေန် ဒပ်မဟာ (၃) ဂှ်လေဝ် ဟိုတ်နူပရေၚ်ဗ္တိုက်စွံပွန် ဒပ်ကံၚ်ဇြဳပၞာန်တုဲ ကောန်အရာပ်ဇီုကပိုက်ချိုတ်ဂျိုၚ် ကလိဂွံဝပ်တံ နွံဒၟံၚ်တုဲ ပ္ဍဲကဵုဏံ ညးဗြဴ ကေုာံ ကောန်ၚာ်သၟတ်တံ ပါလုပ်ဒၟံၚ်တုဲ စမြိုၚ်သ္ၚိဌာန်တံလေဝ် ဒးဇီုကပိုက်လီုလာ်လဝ်တုဲ ညးဍုၚ်ကွာန်ဒေသ နူကဵုကွာန်ဗွဲမဂၠိုၚ်ဂၠေၚ် ဂၠိုၚ်ကဵုဠက်ဂှ်လေဝ် ဒးဂြိပ်ဒဴပါဲဒဴဒၟံၚ်ဘဲပၞာန်ရ။

အလဵုအသဳဍုၚ်နာနာတံကဵု ဂကောံနာနာ ပါလုပ်သီုကဵုကုလသမဂ္ဂတံဂှ် သွက်ဂွံသၠဲပ္တိုန်ကေတ်ဒုဟ် ကုဒပ်ကံၚ်ဇြဳပၞာန် မကလိလောန်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ် လ္တူညးဍုၚ်ကွာန်ကောန် အရာပ်တံ နကဵုဂၠံၚ်ဍာန်မစိုပ်တရဴတံဂှ် ပ္ဍဲဂိတုမေတေံ KNU ထပ်အာတ်မိက်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KHRG/KPSN