လ္တူကောန်ထံၚ်ပရေၚ်ဍုၚ်ကွာန် သီုလ္တူဂကောံသ္ၚိကၟိန်ညးတအ် ဒပ်ပၞာန်ကၠောန်သ္ပဒၟံၚ် ပွဟၟဲကဵုသၞောတ်သၞောဝ် ညံၚ်ဍုၚ်သၟိၚ်တၠဟၟဲ

လဂုၚ်၊ အဝ်ဂေတ်(၉)

လ္တူကောန်ထံၚ်ပရေၚ်ဍုၚ်ကွာန် ကေုာံ လ္တူဂကောံသ္ၚိကၟိန်ညးတအ် ပ္ဍဲထံၚ်စာတ်ကီု ဒၞာဲဗဒိုပ်ထၚ်ဒဝ်ဒပ်ပၞာန် ယၟုပရေံဒယှ်ဒၟံၚ် နူသီကေတ်အဝဵုကၟိန်ဍုၚ် ဗွဲအဓမ္မတုဲဂှ် ကၠောန်သ္ပဒၟံၚ် ဒ္ဂေတ်ပြဝဟၟဲကဵုသၞောဝ်သၞောတ် ပမာညံၚ်ဍုၚ်ဟၟဲကဵုသၟိၚ်တၠရဂှ် AAPP လလောၚ်တြးလဝ် လိက်ဒုၚ်စဳရေၚ် ပ္ဍဲဂိတုအဝ်ဂေတ် စၟတ်တ္ၚဲ(၇)ရ။

ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP)ဂှ် သ္ပတံနူဒပ်ပၞာန်ထပ်သီကေတ်အဝဵု မွဲအလန်ပၠန်တုဲ ပရေၚ်ဆဵုဂဗဘ ကောန်ထံၚ်ပရေၚ်ဍုၚ်ကွာန်တအ် ဒးဆဵုဂဗလဝ်ဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် “ဍုၚ်ဟၟဲသၟိၚ်တၠ” သောဲသောဲဗြောဲဗြောဲရ။

လိက်ဒုၚ်စဳရေၚ်ဂှ် သၟာန်သၟုက်လဝ် ကောန်ထံၚ်ပရေၚ်ဍုၚ်ကွာန် ကလေၚ်ဗၠးတိတ်ကၠုၚ် (၃၀)တၠ နူထံၚ်စာတ်အၚ်စိၚ် ယၟုပရေံဒယှ်ဒၟံၚ်ကီု သီုထံၚ်တၞဟ် မပ္တံထံၚ်မျေတ်ဂျဳနာ၊ ဗိက်၊ ဘာအၚ်၊ တံၚ်ဥူ၊ တယျေတ် ကေုာံ သာယျာဝတဳ၊ ဂကောံသ္ၚိကၟိန်ညးတအ် ကေုာံ ညးဒးပါဲတိတ်နူဍုၚ် ဟိုတ်နူပရေၚ်ဂီုကၠီုတအ်တုဲ တၚ်ဂွံဆဵုညာတ်ကေတ်လဝ်ဂှ် ပ္တိုန်လဝ်စၟတ်သမ္တီရ။

အတိုၚ်လိက်ဒုၚ်စဳရေၚ် AAPP မ္ဂး ပရေၚ်ရပ်စပ်ဟၟဲကဵုသၞောဝ်သၞောတ် သီုဝရာန်ဟၟဲမွဲသာ်ကီု ညးဒးဒုၚ်ရပ်လဝ် ပရိုၚ်ကၞာၚ်ကၠေံကၠက် အဆက်စၠောံဟွံဂွံမွဲသာ်တုဲ ဒးဒုၚ်ထိၚ်ဒက်လဝ် နူအခိၚ်ပြဟ်ဟ်တေံသီုဖအိုတ်ဂှ် ဒးတတ်ကၠောံလဝ် ပရေၚ်စၟဳစၟတ်ညးသ္ကအ်ရ။

ပ္ဍဲပရေၚ်စၟဳစၟတ်ဂှ် ဒးဆဵုဂဗဒးဒုၚ်လဝ် ပရေၚ်ပျဲပျာဲဍဵုဍိုက် ဗီုပြၚ်ဟွံတုပ်သၟဟ်ဂၠိုၚ်ကဵုဂကူတုဲ ဗွဲမဂၠိုၚ်ဂှ် ဒးဆဵုဂဗလဝ် ပရေၚ်ဍဵုဍိုက် ဆေၚ်ကဵုသွာၚ်ရုပ်ဝတ္ထု၊ သွာၚ်စိုတ်ဓာတ်ရဂှ် AAPP ဟီုသ္ဂးလဝ်ရ။

ပ္ဍဲလၟေၚ်ကမၠောန်ရုၚ်သၞောဝ်ဓဝ်ဂှ် ဂကောံသ္ၚိကၟိန်ညးတအ် လုပ်ပ္ဍဲထံၚ်တုဲ ဟွံကဵုလဝ်အခေါၚ်ဆဵုဂဗ ကုကောန်ထံၚ်ပရေၚ်ဍုၚ်ကွာန်ရဂှ် လိက်ဒုၚ်စဳရေၚ် AAPP ဂှ် ဓမံက်ထ္ၜးလဝ်ရ။

ပ္ဍဲထံၚ်စာတ်လေဝ် ဟွံလ္လိဂွံစၞစသုၚ် ကေုာံ ပရေၚ်မၚ်မွဲ ပရေၚ်ထတ်ယိုတ် ဍိုက်က်ပေၚ်ၚ်ကီု၊ ပေါဲထ္ၜးဆန္ဒပ္ဍဲထံၚ်စာတ်ကီု၊ စကာကဵုကၠောကမၠောန် ဗွဲအဓမ္မကီု၊ ပြံၚ်ပဆုဲ ထံၚ်စာတ်သ္ၚောဲခြာ ကေုာံ ဘပဠကရေပ်ဓရတ်အာတ်မိက်သြန်လေဝ် နွံဒၟံၚ်ရ။

ကောန်ထံၚ်က္လေၚ်ဗၠးတိတ်ကၠုၚ်တအ်ဂှ် ဒးဆေၚ်ဒၟံၚ်မုက်ကဵု တၚ်ကော်ချဴ သွာၚ်ရုပ်ဝတ္ထု ကေုာံ သွာၚ်ပရေၚ်စိုတ်ဓာတ်တုဲ ဟိုတ်နူညးပိုၚ်ပြဳအဝဵုတအ် မၚ်ရံၚ်ကျောဝ်ဒၟံၚ် လၟိုန်အခၚ်ဂှ်ရ ဒးက္လေၚ်ဒုၚ်ရပ်ပၠန်ဏောၚ်ဂှ်လေဝ် ဒးဖေက်ဂၟံက်ဒၟံၚ်ရ။

ဖိုလ်အဆက်ဂှ် သွက်ဂွံဂြိပ်တိတ်ဍုၚ်မ္ၚး ဒးဒုၚ်ကဵုဒၟံၚ်ဇြဟတ်ဓရိုဟ်တုဲ ဒးဆေၚ်ဒၟံၚ်မုက်ကဵု တၚ်ကော်ချဴအဆက်တောဲကြဴ ပွမဆုဲပြံၚ်မံၚ်တန်တဴတုဲ ပရေၚ်ဆက်စပ်ဇီုကပိုက်ဒး လ္တူဂကောံသ္ၚိကၟိန်တအ်လေဝ် နွံရဂှ် လိက်ဒုၚ်စဳရေၚ် AAPP ဓမံက်ထ္ၜးလဝ်ရ။

အခိၚ်ဒးဒုၚ်ရပ်ကီု သီုအခိၚ်ဒးဒုၚ်ရပ်ဒက်ထိၚ်ဒဝ်လဝ်ဂှ် ပါဲနူကရေပ်ဓရတ်ကေတ်သြန် နူကောန်ထံၚ်ပရေၚ်ဍုၚ်ကွာန်တအ် ကေုာံ ဂကောံသ္ၚိကၟိန်ကောန်ညးတအ်တုဲ ပရေၚ်ၜုၚ်တက် လ္တူဂကောံသ္ၚိကၟိန်ညးတအ်လေဝ် ဒးဆဵုဂဗလဝ်ရဂှ် ကောန်ထံၚ်ပရေၚ်ဍုၚ်ကွာန် AAPP သၟာန်သၟုက်လဝ်ဂှ် ဟီုသ္ဂးလဝ်ရ။

အခိၚ်လၟုဟ်ဏံ ပ္ဍဲမွဲကာလဒပ်ပၞာန်သီအဝဵု ညးချဳဒရာၚ်ဒဳမဝ်ကရေဇြဳ ကေုာံ ညးဍုၚ်ကွာန် ၃၈၀၀ ပြၚ် ဒးဒုၚ်ပြိုက်ဂစိုတ်လဝ်တုဲ အပံၚ်မၞိဟ်ဒးဒုၚ်ရပ်လဝ် ၂၄၂၀၀ ပြၚ် နွံကၠုၚ်ဒၟံၚ်ဂှ် ၁၉၇၀၀ ပြၚ် ဒးဒုၚ်ထိၚ်လဝ်ဏီဖိုဟ်ရဂှ် AAPP လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – AAPP