ပ္ဍဲဒဳမအ်သဵု ပေါဲဗ္တိုက်တံ ကလေၚ်သ္ကာတ်မြဟ်ကၠုၚ်

ဒဳမအ်သဵု၊ အဝ်ဂါတ် (၉)

ပ္ဍဲတွဵုရးကရေၚ်ဍာဲ၊ ပွိုၚ်ဍုၚ်ဒဳမအ်သဵု သြၚ်ပလိုတ်ဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ကလေၚ်သ္ကာတ်မြဟ်ကၠုၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

စနူဂိတုအဝ်ဂါတ် (၂) တုဲကၠုၚ်တေံတုဲ နူစဗ္တိုက်ဗ္တိုဟ်လဝ်မာၚ် ကရောၚ်ပၞာန်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် (၃) ကရောၚ် နူကဵုလွိုၚ်ကဝ် လ္ပာ်သြၚ်ပလိုတ်ဒဳမအ်သဵုဂှ်တုဲဂှ် ပေါဲဗ္တိုက်တံ စက္တဵုဒှ်လဝ်ရ။

အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ပန်ပှော်လဝ် လွဟ်ဇၞော်တံတုဲ ဒရုၚ်ထံၚ်ပရိုၚ်တံ ပဝ်ယာန်လဝ်နွံဂှ် ဂကောံဇြဟတ်ပၠန်ဂတးတံ ဟီုရ။

သ္အာၚ်နူဂှ်ပၠန် လ္ပာ်ဂၠံၚ်ဇၞော်ဒဝ်ညေခူဂှ်လေဝ် ပေါဲဗ္တိုက်တံ သ္ကာတ်မြဟ်ကၠုၚ်ဒၟံၚ်ဂှ်ရ ညးဍုၚ်ကွာန်တံ ညံၚ်ဂွိုအ်သုၚ်စောဲဂၠံၚ်တံအိုတ်ဂှ် ဒပ်စဵုဒၞါကောန်ဂကူကရေၚ်ဍာဲ KNDF လလောၚ်ပ္တိတ်လဝ်ရ။

အပ္ဍဲပေါဲဗ္တိုက် မက္တဵုဒှ်လဝ် ပလိုတ်ဒဳမအ်သဵုဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်ဂျိုၚ်လဝ်တံ နွံကီုလေဝ် အကာဲအရာဗွဲလစှ်ေဂှ် ဟွံဂွံတီကေတ်ဏီပုဟ်ဂှ် ဂကောံဇြဟတ်ပၠန်ဂတးတံ ဟီုရ။

တွဵုရးကရေၚ်ဍာဲ ကြပ်ကဵုနေဗျဳဒဝ် ဒၞါဲဒတန်ရုၚ်ကံၚ်ဇြဳပၞာန်သီအဝဵုဖျေံသ္ဇိုၚ်ဂှ် လ္ပာ်ကံၚ်ဇြဳပၞာန်တံ ထ္ပက်ဒၟံၚ်ပၞာန်ဗွဲမသ္ကာတ်မြဟ်တုဲ ဟိုတ်နူပရေၚ်ဗ္တိုက်တရဴကျာတံကဵု ပရေၚ်ပန်ပှော်လွဟ်ဇၞော်တံတုဲ ကောန်အရာပ်ဇီုကပိုက်ချိုတ်ဂျိုၚ်တံ နွံဒၟံၚ်ရောၚ် ဂွံတီကေတ်ရ။

ပွမပန်ပှော်လွဟ်ဇၞော် နကဵုတရဴကျာတံသၟးဟွံက သီုကဵုကရောၚ်ပၞာန်ဗလးတိတံဂှ်လေဝ် ဂစိုတ်ဂယိုၚ်ဒၟံၚ်ညးဍုၚ်ကွာန်တံ နကဵုဂအုံဗွဝ်နွံဒၟံၚ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNDF B-10