ၜဳကလေၚ်၊ အဝ်ဂါတ် (၁၁)
ပ္ဍဲတွဵုရးဍုၚ်မန် ပပ္တံနူဂိတုအဝ်ဂါတ်မံက်ဏံတုဲ ဟိုတ်နူဍာ်ဇၞော်ဍာ်ကလိုပ် မက္တဵုဒှ်ဒၟံၚ်ဂှ်တုဲ ညးဍုၚ်ကွာန်ဒးဘဲဍာ် ၁၀၀၀၀ ပြၚ်ဂှ် ဒးဆုဲပြံၚ်လဝ် ဇရေၚ်ဗ္ဒိုပ်ဟံၚ်ပြာ်ယာယဳတံရောၚ်ဂှ် ညးဒေသတံကဵု ညးတာလျိုၚ် ဂကောံဟံၚ်ပြာ်ပရေၚ်မၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဗြဲဂူဆက်ဒၟံၚ်တုဲ ပ္ဍဲကဵုပွိုၚ်ဍုၚ်ၜဳကလေၚ်၊ ကျာ်ထဝ်၊ ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ဍာ်ဇၞော်ဍာ်ကလိုပ်တံ က္တဵုဒှ်ဒၟံၚ်တုဲ ပ္ဍဲကဵုဏံ ပွိုၚ်ဍုၚ်ၜဳကလေၚ်ဝွံ ဒးဒုၚ်စသိုၚ်ဒၟံၚ် ဘဲဒဏ်ဍာ်ဇၞော်တံ ပရေံအိုတ်ရ။
ဟိုတ်နူပရေၚ်ဍာ်ဇၞော် ပွိုၚ်ဍုၚ်ၜဳကလေၚ်ဂှ်တုဲ သ္ၚိကၟိန် နူကဵုအရာပ်လ္တူဍုၚ်တံကဵု အရာပ်တိသဝ်ဝ် ဗ္ဒါဲ ၂၀၀၀ ၊ လၟိဟ်မၞိဟ် ၁၀၀၀၀ ပြၚ်ဂှ် ဒးဆုဲပြံၚ်လဝ် ပ္ဍဲကဵုဗ္ဒိုပ်ဟံၚ်ပြာ်ယာယဳ ၂၇ ဗ္ဒိုပ်တံရ။
ဆ္ဂး ညးကၠုၚ်စိုပ်ရီုဗၚ် ဇရေၚ်ညးဍုၚ်ကွာန်ဒးဘဲဍာ်တံဂှ် စဵုကဵုဟွံမွဲအောန်ဒၟံၚ်တုဲ နွံပၟိက်ဒၟံၚ်ကဵု ဇွောံမစၞစ ကေုာံ အရီုဗၚ်ဍာ်သုၚ်တံ သၠုၚ်ဒၟံၚ်ရောၚ်ဂှ် ညးတာလျိုၚ် ဂကောံဟံၚ်ပြာ်ပရေၚ်မၞိဟ်မွဲတၠ ဟီုရ။
ပ္ဍဲကဵုဍာ်ဇၞော် ပွိုၚ်ဍုၚ်ကျာ်မြဟ်ဂှ် ဘာဗ္တောန်လိက် ၉ မ ဒးကၟာတ်လဝ်ယာယဳကီုလေဝ် ညးဒေသတံဂှ် ဆုဲပြံၚ်ကဵုလဝ် ဇရေၚ်ဗ္ဒိုပ်ဟံၚ်ပြာ်တံဟွံမွဲတုဲ ဒးဆုဲပြံၚ်ဒၟံၚ် နကဵုအစဳဇန်ဇကုဇကုတံရ။
ဟိုတ်နူပရေၚ်ဍာ်ဇၞော်ဍာ်ကလိုပ် ပွိုၚ်ဍုၚ်ကျာ်ထဝ်ဂှ်တုဲ သွက်ရဲဒးဘဲဍာ် ညးဍုၚ်ကွာန်ဒေသ နူကဵုအရာပ်တိသဝ်ဝ် ၂၀၀ ပြၚ်တံဂှ် ဒးပံက်လတ် ဗ္ဒိုပ်ဟံၚ်ပြာ် ၃ ဗ္ဒိုပ်ရ။
အပ္ဍဲဍာ်ဇၞော် ပွိုၚ်ဍုၚ်ၜဳကလေၚ်ဂှ် ပ္ဍဲကဵုဂိတုအဝ်ဂါတ် ၉ တေံ ဟိုတ်နူဂၠံၚ်ကာမတ်မလီု−လ္ဂုၚ် ကေုာံ ဂၠံၚ်ကွဳပၟတ်တံ ဍာ်ကၠောံလဝ်တုဲ ဒးကၟာတ်လဝ်ယာယဳကီုလေဝ် ပ္ဍဲကဵုဂိတုအဝ်ဂါတ် စၟတ်တ္ၚဲ (၁၀) အခိၚ်နူဂယးဂှ် ကလေၚ်အာကၠုၚ်မာန်ယျဂှ် ဂွံတီကေတ် နူကဵုညးဒေသတံရ။
ပ္ဍဲကဵုပရေၚ်ဍာ်ဇၞော် တွဵုရးဍုၚ်မန်ဂှ် နူကဵုကံၚ်ဇြဳပၞာန် ရီုဗၚ်ရေၚ်တၠုၚ်ကဵု စဵုကဵုဟွံမွဲအောန်ဒၟံၚ်တုဲ ပရေၚ်ပါ်ပါဲတံလေဝ် နွံဒၟံၚ်တုဲ သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ် ဥူအံၚ်ကျဳတုၚ်ဂှ်လေဝ် ဒဵုကဵုအခိၚ်လၟုဟ် စိုပ်ကၠုၚ်ဇရေၚ်ညးဍုၚ်ကွာန်ဒးဘဲဍာ်တံ ဟွံမွဲဏီပုဟ်ဂှ် ညးဍုၚ်ကွာန်ဒးဘဲဍာ်တံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai