တိုၚ်ပေ၊ အဝ်ဂါတ် (၁၀)
ဟိုတ်နူပရေၚ်ဒှ်ဓဝိၚ် ကုပရေၚ်ဂီုကၠီုတုဲ ပေါဲပြိုၚ်စမ်ၜတ်ဍာ်ဒကေဝ်အိုဝ်လာံပေတ် မကၠောန်အာ ပ္ဍဲကဵုသဳရဳယျာဂှ် ပါလုပ်အာဟွံသေၚ်ပုဟ်ဂှ် ဂကောံဗာန်သကေတ်ဗဝ်ထိုၚ်ဝါန် ဟီုဂးလဝ် ပ္ဍဲဂိတုအဝ်ဂါတ် (၉) တေံရ။
ဗွဲတၟေၚ် အာဍုၚ်ဇိုၚ်ဝုတ်ဒိုဟ်ဂမၠိုၚ်မ္ဂး ဟိုတ်နူဒးအာကဵု ဂၠံၚ်ကုန်သၟးဂှ်ရ နကဵုဂကောံဏံ သွက်ဂွံတတ်ၜက်ကၠောံ ပရေၚ်ဒှ်ဓဝိၚ် စပ်ကဵုဂီုကၠီု ဍုၚ်ဇၞော်ဒါမ်မာသာတ်ဂှ် ဒှ်ဟွံမာန်ဂှ်ရ သ္ဂုတ်သွာတ်လဝ်သာ်ဏံရောၚ် ဟီုဂးလဝ် ပ္ဍဲကဵုတၚ်လလောၚ်တြး ဂကောံဂှ်ရ။
“ကဵုက္ဍိုပ်ကဵု ဂီုကၠီုကောန်ဂကောံတံဂှ်တုဲ သ္ဂုတ်သွာတ်လဝ် သွက်ဟွံဂွံပါလုပ် ပ္ဍဲပေါဲပြိုၚ်ဏံရ” သာ်ဝွံ ပါလုပ် ပ္ဍဲကဵုတၚ်လောၚ်တြးဂှ်ရ။
ကၟိန်ဍုၚ်တ္ကအ် မအုပ်ဓုပ်ဒၟံၚ် ဗွဲမဗဗွဲကဵုဒဳမဝ်ကရေဇြဳဂှ် ဍုၚ်ကြုက် မစၟတ်လဝ် နဒဒှ်တွဵုဒၞက်ဍေံပိုၚ်ဂှ်ကဵု သွက်ဂွံပါဲဒလေတ် ပြသၞာပရေၚ်ဍုၚ်ကွာန်တံဂှ်တုဲ ပ္ဍဲကဵုပေါဲပြိုၚ်အိုဝ်လာံပေတ်ဂှ် လုပ်ပြိုၚ်အာ နဒဒှ် “ကြုက်တိုၚ်ပေ” တုဲ ထိုၚ်ဝါန်ဝွံ သွက်ဗာတ်သကေတ်ဗဝ်ဂှ် မွဲဝါမှ ဟွံကေၚ်ကလိဂွံလဝ် တဆိပ်ကြာအိုဝ်လာံပေတ်ဏီဂှ် ဂွံတီကေတ်ရ။
ပေါဲစမ်ဍာ်ဒကေဝ် ဗာတ်သကေတ်ဗဝ်ဂှ် ကၠောန်ဗဒှ်အာ ပ္ဍဲဍုၚ်သဳရဳယျာ နူကဵုအဝ်ဂါတ် (၁၂) စဵုကဵု (၂၀) မဒှ်ရ။
ကြဴနူသမ္မတ ဘာယှာအေဝ်−အာသာတ် ပါ်ထ္ကးပကီုပရာပ် ညးထ္ၜးဆန္ဒဗွဲမၜိုဟ်လလမ် မၞုံပၟိက်ကုဒဳမဝ်ကရေဇြဳ ပ္ဍဲသၞာံ ၂၀၁၁ တေံတုဲဂှ် နူကဵုမဝ်သကိုဝ်ဂှ် ထံက်လဝ်ဂလာန်ကဵုဇြဟတ် ကုအာသာတ်တုဲ လ္ပာ်ဒစဵုဒစးဂှ် နူကဵုဝါယှေန်တာန် ထံက်လဝ်ဂလာန်တုဲ သ္ကဵုပၞာန်အပ္ဍဲဍုၚ် က္တဵုဒှ်လဝ်ရ။
မၞိဟ်ဂၠိုၚ်ကဵုပြကောဋိကိုဋ် ဒးဂြိပ်တိတ်နူ သဳရဳယျာတုဲ ဂၠိုၚ်ကဵုပြကောဋိကိုဋ်တံပၠန်ဂှ်လေဝ် ဒးထောံလသာသ္ၚိဒၟံၚ် ဒးဂြိပ်ဒဴဒၟံၚ် အပ္ဍဲဍုၚ်ရ။ ကရောံအာသာတ် ကလေၚ်ထိၚ်ဒက်ဂွံ ဍုၚ်သဳရဳယျာ ဒၞါဲဗွဲမဂၠိုၚ်ဂၠေၚ်ဂှ် ပေါဲဗ္တိုက်တံလေဝ် ဒေါအ်ဒေၚ်အာကီုရ။
Ref: CNA
sanlontai