ဍာ်ဗု၊ အဝ်ဂေတ် (၁၁)
ရးဒေသဇၞော်တၞၚ်သြဳ၊ ပွိုၚ်ဍုၚ်ဍာ်ဗုဂှ် နူဒပ်ကံၚ်ဇြဳပၞာန် ဟိုတ်နူထ္ပက်လုပ်ကရောၚ်ပၞာန် သီုဇြဟတ်ပေၚ်ၚ်ဂှ်ရ ညးဍုၚ်ကွာန် (၃၀၀၀) ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် နူညးဒေသတအ်ရ။
ကရောၚ်ပၞာန် ကံၚ်ဇြဳပၞာန် ဇြဟတ်ဒပ် မၞုံ (၂၀၀) ပြၚ်ဂှ် သ္ပတံနူဂိတုအဝ်ဂေတ် စၟတ်တ္ၚဲ (၈) ပါ်လဝ် (၃)ကရောၚ်ပၞာန်တုဲ ထ္ပက်လုပ်ကၠုၚ်ပၞာန် ပ္ဍဲပွိုၚ်ဍုၚ်ဍာ်ဗုရ။
ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ညးဒေသ နူကွာန်ခမောက်ချောၚ်၊ ဝေတ်ချောၚ်၊ ဨကနိ၊ ယျၚေဝ်၊ ကုမ်အေန် ကေုာံ ကွာန်လာန်တဝ်တအ် (၃၀၀၀) ပြၚ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲ ကေုာံ အကြာဂြိုပ်ဂၞိၚ်ရ။
ဒပ်ကံၚ်ဇြဳပၞာန် ဂေတ်လၟေၚ်ကွာန်တုဲ ထ္ပက်လုပ်ကၠုၚ်ကရောၚ်ပၞာန်ဂှ် ညးဒေသ နူကွာန်ဝေတ်ချောၚ် (၆)တၠ၊ ညးဒေသ နူကွာန်ခမောက်ချောၚ် (၂)တၠ၊ ညးဒေသ နူကွာန်လေအ်ယှောၚ် (၁) တၠ အပံၚ်လၟိဟ် (၉)တၠ ရပ်ကော်ဏာလဝ် နဒဒှ်ဒေၚ်ဒုၚ်ဒၞာမၞိဟ်ရဂှ် ညးတာလျိုၚ်လလောၚ်ပရိုၚ်ပကဖ ပွိုၚ်ဍုၚ်ဍာ်ဗု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ် ကရောၚ်ပၞာန်တုဲ ပ္ဍဲဂိတုအဝ်ဂေတ် စၟတ်တ္ၚဲ (၁၀) အခိၚ်နူဂယးဂှ် အကြာကွာန်ဨကနိကဵု ကွာန်ခမောက်ချောၚ် ပေါဲဗတိုက်ၜါလ္ပာ် က္တဵုဒှ်လဝ်တုဲ ဟွံဂွံတီကေတ် အကာဲအရာသောဲသောဲဗြောဲဗြောဲဏီရဂှ် ဟီုသ္ဂးလဝ်ရ။
ပ္ဍဲဂိတုဂျူလာၚ် သတ္တာဟလကြဴအိုတ် တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲလ္ပာ်ကွာန်ခယျေန်ချောၚ်ကဵု ကွာန်ထွောတ်ဝဂှ် ရပ်ကေတ်ဏာ ညးဒေသ (၃၀) တၠပြၚ် နဒဒှ်ဒေၚ်ဒုၚ်ဒၞာမၞိဟ်တုဲ လအ်ဂွံပွိုၚ် (၅) တ္ၚဲဟေၚ် ဂွံက္လေၚ်ဗလးကဵုလဝ်ရ။
မွဲကာလဒပ်ပၞာန်သီအဝဵုဏံ ပ္ဍဲပွိုၚ်ဍုၚ်ဍာ်ဗုဂှ် အခိၚ်ဒပ်ကံၚ်ဇြဳပၞာန် ထ္ပက်လုပ်ကရောၚ်ပၞာန်ဂှ် ရပ်ကေတ်ဒၟံၚ်ကောန်ဒေသ နဒဒှ်ဒေၚ်ဒုၚ်ဒၞာမၞိဟ်ကီု၊ ကေတ်ဏာဒၟံၚ် ကပေါတ်ကညောတ် နွံၚုဟ်မး မၞုံပ္ဍဲသ္ၚိဌာန်ညးဍုၚ်ကွာန်တအ်ကီု သီုကလိလောန်ပန်ပှ်ော ပြိုက်ဂစိုတ်ဒၟံၚ် ကောန်အရာပ်ညးဍုၚ် ကွာန်သှ်ေၜက်ဒၟံၚ်ပ္ဍဲကွာန်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai