မတ်မလီု၊ အဝ်ဂေတ် (၁၁)
တွဵုရးဍုၚ်မန် သၞာံဏံ သ္ပတံနူ ဂိတုဂျာန္နဝါရဳ စဵုကဵုဂိတုဂျူလာၚ် ပ္ဍဲပွိုၚ် (၇) ဂိတုဏံ ဟိုတ်နူယဲပုၚ်တုဲ ကောန်ၚာ် (၃)တၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်ဂၞၚ် ဌာနက္ဍိုက်က္ဍိုပ်ပရေၚ်ထတ်ယိုက် ကေုာံ ပရေၚ်လွဳလွတ်ညးဍုၚ်ကွာန် တွဵုရး ကံၚ်ဇြဳပၞာန်ရ။
ပရေၚ်ကၠောံထၞာန်ယဲပုၚ် အလုံမွဲတွဵုရးဍုၚ်မန်ဂှ် ညးဒးဒှ်လဝ်ယဲ ဗ္ဒာဲ (၁၂၀၀) နွံကၠုၚ်တုဲ ပ္ဍဲကဵုဂှ် နူပွိုၚ်ဍုၚ်မတ်မလီု ညးက္တဵုဒှ်လဝ်ယဲ (၂၃၉) တၠ၊ နူပွိုၚ်ဍုၚ်ပံၚ် ညးက္တဵုဒှ်လဝ်ယဲ (၁၈၈) တၠ ဒးဒုၚ်ကၠောံထၞာန်လဝ်ယဲ လၟိဟ်ဂၠိုၚ်အိုတ်ရ။
ပၞောဝ်ညးဒှ်လဝ်ယဲတအ်ဂှ် ကောန်ၚာ် နူပွိုၚ်ဍုၚ်ပံၚ်မွဲတၠ၊ ကောန်ၚာ် နူပွိုၚ်ဍုၚ်ဇြပ်ဗု မွဲတၠ ကေုာံ ကောန်ၚာ် နူပွိုၚ်ဍုၚ်ကျာ်ထဝ် မွဲတၠ ဒးချိုတ်လဝ်ရ။
အတိုၚ်ပရေၚ်ဒးဒှ်လဝ်ယဲမ္ဂး ပ္ဍဲဂိတုဂျောန် ကေုာံ ဂိတုဂျူလာၚ်ဂှ် ညးဒးဒှ်လဝ်ယဲ သာဂၠိုၚ်ကၠုၚ်တုဲ ပ္ဍဲကွာန်လ္ၚဵု ကေုာံ အရာပ်လ္ၚဵုဂှ်မ္ဂး ကောန်ၚာ်သၟတ် ဗွဲမဂၠိုၚ် ဒးဒုၚ်ကၠောံထၞာန်လဝ်ယဲ ဗွဝ်ကဵုဗွဝ်နွံရ။
ဆ္ဂး လက်ထက်ကံၚ်ဇြဳပၞာန် ဟိုတ်နူပရေၚ်ပရဟ်ဒုၚ်စဵုဒၞာယဲပုၚ် ဇြဟတ်ဍိုန်စှ်ေဒၟံၚ်ဂှ်ရ ညးဒးက္တဵုဒှ်လဝ်ယဲ ဂၠိုၚ်တိုန်ကၠုၚ်ဒၟံၚ်တုဲ ပ္ဍဲရုၚ်ဂဥုဲ ပေၚ်ကၟိုဟ်ဒၟံၚ်ရဂှ် သြၚ်လောန်တိုၚ်(မ်) ဂၠိုက်ဂၠာဲ ဂွံတီကေတ်လဝ်ရ။
အခိၚ်လၟုဟ်ဏံ ဟိုတ်နူဒှ်ရာသဳ ယဲပုၚ်က္တဵုဒှ်ဂၠိုၚ်ဒၟံၚ်ဂှ်ရ ယဝ်ရကောန်ၚာ်တအ် ဇကုက္တဴကၠုၚ်မ္ဂး ဒးထ္ၜးပ္ဍဲရုၚ်ဂဥုဲ၊ ဗ္ဒမ်ဂဥုဲကြပ်ညောန် ဗွဲမဂတာပ်အခိၚ်တုဲ ယဝ်ရဟွံဂွံဒုၚ်လွဳလွတ် ဗွဲမဂတာပ်အခိၚ်မ္ဂး ယဲသ္ကာတ်မြဟ်တိုန်ကၠုၚ်မာန်တုဲ စဵုကဵုဒးအိုတ်လမျီု ဟိုတ်နူဒှ်ကၠုၚ်မာန်ဒၟံၚ်ဂှ်ရ သွက်ဂွံဒးသ္ပသတိဗွဲတၟေၚ် အ္စာဂဥုဲတအ် ဗတိုက်ဖ္အောဝ်လဝ်ရ။
တွဵုရးဍုၚ်မန်ဂှ် ပ္ဍဲသၞာံ ၂၀၂၂ တုဲကၠုၚ်တေံ ညးက္တဵုဒှ်လဝ်ယဲပုၚ် စဵုကဵု (၂၀၀၀) နွံကၠုၚ်လဝ်တုဲ ပ္ဍဲကဵုဂှ် ကောန်ၚာ်သၟတ်မွဲတၠ ဒးချိုတ်လဝ်ရဂှ် ဌာနက္ဍိုက်က္ဍိုပ်ပရေၚ်ထတ်ယိုတ်ညးဍုၚ်ကွာန် တွဵုရး ကံၚ်ဇြဳပၞာန် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai