ကောန်ဒပ်ကံၚ်ဇြဳပၞာန် (၂) တၠ လုပ်စိုပ်ဖျေံလွဟ် ဇရေၚ်ဂကောံဒပ်ပံၚ်ကောံ KNLA

ဗြဝတဳ၊ အဝ်ဂါတ် (၁၂)

ကောန်ဒပ်သၟဝ်တဲ ၝောံဒပ် ၄၄ ကံၚ်ဇြဳပၞာန် မထ္ပက်ကၠုၚ်ပၞာန် သွက်ဂွံကလေၚ်သီ ကုန်ဗ္ဒိုပ်ဒဵုလက်ခါတ် မၞုံဗ္ဒါဲဍုၚ်ဗြဝတဳ တွဵုရးကရေၚ် (၂) တၠ ပ္ဍဲဂိတုအဝ်ဂါတ် (၈) တေံ လုပ်စိုပ်ပံၚ်တောဲလဝ် ဇရေၚ်ဂကောံဒပ်ပံၚ်ကောံ KNLA တံ နကဵုလွဟ်ဇၞော်လွဟ်ဍောတ်တံဂှ် KNU ဗဟဵု လလောၚ်ပ္တိတ်လဝ်ရ။

ဒုအကြာပ်ဒပ် ဇြဝ်မျဵုခိုၚ် ကေုာံ ကောန်ဒပ် အံၚ်မျဵုဇြဝ်တံ (၂) တၠ နူကဵုတမ်ဒပ်ခမရ (၁၁၈) သၟဝ်တဲၝောံဒပ် (၄၄) ကံၚ်ဇြဳပၞာန်ဂှ်ဝွံ ဟိုတ်နူဟွံဒးစိုတ် သၞောတ်အုပ်ဓုပ်ဍဵုဍိုက်ဟွံမွဲကဵုဗဗွဲဓဝ် ဒပ်ကံၚ်ဇြဳပၞာန်ဂှ်တုဲ စဵုကဵုပၠန်ဂတးတုဲဒှ် သွက်ဂွံလုပ်အာပေါဲဗ္တိုက် ဗ္တိုက်ပ္တိတ်အာ သၞောတ်တၠအဝဵုပၞာန်ဂှ် ကၠုၚ်စိုပ်ပံၚ်လဝ်တဲရောၚ် သ္ဂးရ။

နူကဵုကောန်ဂကောံဒပ်ကံၚ်ဇြဳပၞာန် မကၠုၚ်စိုပ်ပံၚ်တောဲလဝ် ဇရေၚ်ဂကောံဒပ်ပံၚ်ကောံ KNLA (၂) တၠဂှ် မၠံက်တဲကောန်မာန်ဒိုဝ် ၆၀ မမ မွဲဇကိုအ်၊ မကမ် ၆၀ မမ ၅ မ၊ MA-2 မွဲဇကိုအ်၊ ဖျေဲလွဟ် ၅ မ ကေုာံ မကမ် MA-2 ၁၅၀ ဒကောၚ် လွဟ်လက်နက်မကမ်သာ်ဏံတံ ပါလုပ်ရ။

ကောန်ဒပ်ကံၚ်ဇြဳပၞာန် (၂) တၠ မလုပ်စိုပ်ဖျေံကၠုၚ်လွဟ် ဇရေၚ်ဂကောံဒပ်ပံၚ်ကောံ KNLA ဂှ် သ္ကိုပ်ပြုပြေၚ်ပၞာန် ဗိုလ်ဒါဗဝ် နူကဵုကရောၚ်ပၞာန်ကဝ်ဗရာဂှ် ဖျေံလဝ်လာဘ်သြန်ၝာတ်သေံ ၅၀၀၀၀ ဂှ် ထ္မံက်ထ္ၜးလဝ်ရ။

ပ္ဍဲဂိတုဂျူလာၚ် (၂၀) တေံ ဒပ်ပံၚ်ကောံ KNLA ဒပ်မဟာ (၆) တံ စလုပ်စိုပ်ဗ္တိုက်လဝ် ကုန်ဗ္ဒိုပ်တာဝါတိုၚ် ဒဵု(လက်ခတ်) ဒပ်ကံၚ်ဇြဳပၞာန် မၞုံတိဍာ်ဒပ်မဟာ (၆) KNU ဗ္ဒါဲဍုၚ်ဗြဝတဳ မဒှ်ဒၞါဲဒတန် သွက်ပရေၚ်ပၞာန်တံဂှ်တုဲ ပ္ဍဲဂိတုဂျူလာၚ် ၂၁ ဂှ် လုပ်သီလဝ် ဗ္ဒိုပ်ဂှ်ဒတုဲတုဲ လ္ပာ်ကံၚ်ဇြဳပၞာန် ဇီုကပိုက်ချိုတ်ဗွဲမဂၠိုၚ်ဂၠေၚ်တုဲ ကလေၚ်ဆုတ်ကလေၚ်အာလဝ်ရ။

အပ္ဍဲပေါဲဗ္တိုက်ကုန်ဗ္ဒိုပ်ဒဵု(လက်ခတ်) ဂှ် သီဂိုၚ်ဂွံလဝ် လွဟ်လက်နက်မကမ် နူကဵုဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ်တုဲ သ္ကိုပ်တမ်ဒပ် ကေုာံ ဒုသ္ကိုပ်တမ်ဒပ် နူကဵုတမ်ဒပ်ကံၚ်ဇြဳပၞာန် ခမရ (၂) ဟွံဂွံအမိၚ်မွဲသာ် မဆုတ်အာလဝ်ဒပ် အပ္ဍဲပေါဲဗ္တိုက်ဂှ် ကံၚ်ဇြဳပၞာန် ကဵုလဝ်ဒုဟ်ဖျေံလဝ်ထံၚ် ပ္ဍဲကဵုထံၚ်စာတ်ဍုၚ်ကျာ်ထဝ် နကဵုဂဗုတ်ဒစဵုဒစးအဝဵုဂှ် သ္ကိုပ်ပြုပြေၚ်ပၞာန်ကဝ်ဗရာ ဗိုလ်ဒါဗဝ် သ္ပဒတန်ဟီုဂးလဝ်ရ။

ဒပ်ကံၚ်ဇြဳပၞာန်ဝွံ သွက်ဂွံကလေၚ်သီဂွံ ဗ္ဒိုပ်တာဝါတိုၚ် ဒဵုလက်ခတ် ဗ္ဒါဲဍုၚ်ဗြဝတဳ မစှ်ေကဵုဗျူဟာ လ္ဂောံကဵုပရေၚ်ပၞာန် မဒးဆောံလေၚ်အာဂှ်တုဲ ဗပေၚ်ကၠေံဇြဟတ်ဒပ်၊ ဇြဟတ်လွဟ်လက်နက်တုဲ နကဵုတၚ်စၞောန် သ္ကိုပ်ၝောံဒပ် (၄၄) တိုက်ရိုက်ဂှ် စနူဂိတုဂျူလာၚ် ၂၄ တေံတုဲ နူကဵုတမ်ဒပ် ခမရ (၂) ၊ ခမရ (၁၁၈) နကဵုဇြဟတ်ဒပ် (၁၀၀) ပြၚ်ဂှ် ထ္ပက်ဒၟံၚ်ပၞာန်ရ။

ပရိုၚ်−သြၚ်လောန်တိုၚ်(မ်)

ဗီု−KNU