မတ်မလီု၊ အဝ်ဂါတ် (၁၂)
ကံၚ်ဇြဳပၞာန် ဖန်ဖက်ဟွံဒးတုဲ ကြဴနူၚုဟ်မးသၠုဲဗၟာ စှ်ေကၠုၚ်ဆက်က်တုဲဂှ် ၚုဟ်သြန်ၝာတ်သေံလေဝ် သၠုၚ်တိုန်ကၠုၚ်ဒၟံၚ်ဂှ် သၟာဗၞိက်သေံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူၚုဟ်သြန်ၝာတ်သေံ သၠုၚ်တိုန်ကၠုၚ်တုဲဂှ် ကမၠောန်လှာဲလှုဲဗွဲမဂၠိုၚ် ဒးဒေါအ်ဒေၚ်လဝ်တုဲ မၚ်ကျောဝ်ဒၟံၚ် ၚုဟ်သၠုဲတိုန်စှ်ေရောၚ်ဂှ် ဂွံတီကေတ် ဇရေၚ်ညးကၠောန်ကမၠောန်လှာဲလှုဲတံရ။
သၟာဗၞိက်ပယျဵုမွဲတၠဂှ် ၚုဟ်သြန်ၝာတ်သေံဝွံ နူကဵုတၠကမၠောန် ရုၚ်ဝေၚ်ၛှၚ် ဟွံလုပ်သၞောဝ် မဍုက်ကေဝ်ကဵု ကံၚ်ဇြဳပၞာန်တံ ရာန်ကေတ်သြန်ၝာတ်သေံ ဗွဲမဂၠိုၚ်ဂၠေၚ်တုဲ ဟိုတ်နူသၠုၚ်ပ္တိုန်ၚုဟ်တုဲ သွံတြးဒၟံၚ် အပ္ဍဲဗွဝ်ဖျာတံဂှ်ရ ၚုဟ်မးသၠုၚ်တိုန်ကၠုၚ်ရောၚ်ဂှ် ဟီုရ။
“ သြန်ၝာတ်တံဂှ်တှ်ေ မၞိဟ်ရာန်တုဲ ဝေၚ်ဒၟံၚ်တံ ပ္ဍဲကဵုပယျဵုဂှ် နွံတၟာဂလိုၚ်ဏောၚ်၊ ဒှ်ဒၟံၚ်တၠကမၠောန် စုက်ဒၟံၚ်ကဵု နစကတံဖအိုတ်ဏောၚ်၊ တၠကမၠောန်မၞုံဒၟံၚ်ပ္ဍဲဗြဝတဳတံဂှ်တှ်ေ ဝေၚ်ဒၟံၚ်ဇၞော်ဇၞော်ဟဂှ်ရ။ ဂကောံသၟာဗၞိက်ဗြဝတဳဂမၠိုၚ်ဟီုမ္ဂး အလဵုဍေံတံ ဝေၚ်ဒၟံၚ်ဏောၚ်။ ဒှ်ဒၟံၚ်ပြသၞာ အလဵုအသဳထိၚ်ဒက် လှုဲတိတ်နူရုၚ်ဝေၚ်ၛၚ်တံ ဟွံမာန်ဏောၚ်။ မၞိဟ်တံဂှ် သ္ဇက်ဂွံဝေၚ်ဟွံမွဲရပုဟ်၊ ပရဲဟွံမွဲရပုဟ်။ မိက်ဂွံသ္ဂးဂှ်တှ်ေ ညံၚ်ဂွံပရဲဒၟံၚ်အရိုဟ်တ္ၚဲဂှ် မုပရောတီဟာ၊ ရာန်လဝ်သြန်ၝာတ် ၜိုတ်(၁၀၀) ပြကောဋိကိုဋ်ၝာတ် နကဵုၚုဟ် (၉၆) ဒ္ကေဝ်ဂှ်တုဲ မၞိဟ်ဏံမွဲ နူကဵုရုၚ်ဝေၚ်ဏံဂှ် တ္ၚဲယးဂတတေံ သၠုၚ်ပ္တိုန်ၚုဟ်သြန်ၝာတ်ဂှ်တုဲ သြောံပ္တိတ် (၁၀၀) ပြကောဋိကိုဋ်ဏံ ပ္ဍဲကဵုပယျဵု နကဵုၚုဟ် (၁၁၀) ရ။ ရပ်လဝ်ဂၠိုၚ်ၚ်သာ်ဏံတုဲ မၞိဟ်သွံပ္တိတ်ဒၟံၚ်တံဂှ် ဒးထိၚ်မာန်ဏောၚ်၊ နူကဵုတၠကမၠောန်တံဂှ် ရပ်လဝ်သြန်ၝာတ်တုဲ ကလေၚ်သွံဒၟံၚ် နကဵုၚုဟ်သၠုၚ်ၚ်ဏောၚ်။ မွဲတ္ၚဲဓဝ် ပ္တိတ်တမ် (၁၀၀) မ္ဂး ညံၚ်ဂွံကလေၚ်ပရဲ (၁၀) ကိုဋ်လွာဲဂှ်ဂှ် ဍေံတံကၠောန်ဒၟံၚ်။ တၠကမၠောန်တံဏံဂှ် အလဵုအသဳထိၚ်ဟွံမာန်ပုဟ် ဒှ်ဒၟံၚ်ရ။ ကေတ်လဝ်လှုဲတုဲ တီတီရဂှ် ဟွံရပ် ဒှ်ဒၟံၚ်ဗီုဏံရ” သာ်ဝွံ သ္ဂးရ။
ဟိုတ်နူသြန်ၝာတ်သေံ သၠုၚ်တိုန်ကၠုၚ်ကီုလေဝ် လ္ပာ်ကံၚ်ဇြဳပၞာန်ဂှ် ထိၚ်ဒက်ရေၚ်တၠုၚ်ကဵုကီု ကေတ်ကဵုဒုဟ်ကီုဂှ် ဟွံမွဲဏီဂှ်ရ ၚုဟ်မးသြန်ၝာတ် ထပ်တုဲသၠုၚ်တိုန်ကၠုၚ်မာန်ရောၚ် ညးဆက်ဟီုရ။
ဟိုတ်နူအသိၚ်အလိုန်သြန်ၝာတ်သေံတုဲ ကပေါတ်ဗၞိက်သ္ဇိုၚ် တိတ်နူဍုၚ်သေံတံဝွံ တန်တဴကဵုလ္တူဂကူအဇာကပေါတ်ဗၞိက်တံတုဲ မွဲဂကူမ္ဂး နူကဵု ၅၀၀၀ ဒ္ကေဝ်ဂှ် ၚုဟ်သၠာ်တိုန်ကၠုၚ် စဵုကဵု ၁၀၀၀၀ ဒ္ကေဝ်ပြၚ်ရ။
ကရောံၚုဟ်သြန်ၝာတ်ဂှ် ဗွဝ်ဖျာၚုဟ်ထဝ်အပ္ဍဲဍုၚ်ဂှ်လေဝ် ထဝ်ဒကောၚ်မဳဠေန် မွဲဒကေဝ်ဂှ် ၃၇ ကိုဋ်ဒ္ကေဝ်ပြၚ်၊ ဒဝ်ဠာအမေရိကာန်ဂှ်လေဝ် မွဲဒဝ်ဠာဂှ် ၚုဟ်သၠုၚ်တိုန်ကၠုၚ် စဵုကဵု ၃၅၀၀ ဒ္ကေဝ်ပြၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ တၞဟ်နသ္ဂောံမၚ်ကျောဝ် ပွမရပ်စပ်စကာသြန်ဍုၚ်သ္အာၚ်တံဂှ်ဂးတုဲ ပ္ဍဲဂိတုဂျူလာၚ် ၅ တေံ ဒက်ပ္တန်လဝ် ကမ္မတဳကောပ်ကာဲ ပရေၚ်ရပ်စပ်သြန်ဍုၚ်သ္အာၚ် နူကဵုသ္ကိုပ်ပၞာန်ဇၞော်ဂမၠိုၚ် မသ္ကိုပ်သ္ကဂှ်ရ။
ကမ္မတဳဂှ်ဂှ် ဒုသ္ကိုပ်ဗိုလ်ဇၞော် မိုဝ်မျေတ်ထောန် မဒှ်မၞိဟ်ပတှ်ေ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ကေတ်လဝ်တာလျိုၚ် နဒဒှ်ဥက္ကဌတုဲ ဒက်ပ္တန်လဝ် နကဵုကောန်ကမ္မတဳ ၆ တၠ ပါလုပ်သီုကဵုဥက္ကဌတိုက်သြန်ဗဟဵုရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai