ရောမ – အဝ်ဂေတ် (၁၃)
ပေါဲလက်ဗန် သေဋ္ဌဳတေတ်သလာ အဳလောန်မာက်သ်ကဵု မာက်ဇြူကာဗာတ် မဒှ်တၠ Facebook တအ်ဂှ် သွက်ဂွံကၠောန်ဗဒှ်အာ ပ္ဍဲဒၞာဲဒယှ်ပြာကတ် နကဵုအပြုပြေၚ်ခေတ်ရောမ ပ္ဍဲအဳတလဳခေတ်တြေံ နွံဒၟံၚ်ရဂှ် ညးစဳဇန်တအ် ဟီုလဝ် ပ္ဍဲဂိတုအဝ်ဂေတ် စၟတ်တ္ၚဲ (၁၁)ရ။
ဝန်ဇၞော်ပရေၚ်ယေန်သၞာၚ် ကၟိန်ဍုၚ်အဳတလဳဂှ် ဓမံက်ထ္ၜးလဝ်နဒဒှ်ပေါဲဇၞော် လုပ်ဝၚ်စၟတ်သမ္တီ နသြန်ဂအုမ် ဇၞော်ကဵုဇြဟတ် ဓမံက်ထ္ၜးလဝ်တုဲ စပ်ကဵုကၠောန်ဗဒှ်ပေါဲတုဲ တက်လဝ်ကျာ ဟီုလဝ်ဂလာန်ကဵုမာက်သ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ဆ္ဂး သၟာပရေၚ်ဍုၚ်ကွာန်ဒစဵုဒးအဳတလဳဂှ်မ္ဂး စပ်ကဵုပေါဲလက်ဗန် တၠပညာ နဲကဲကွတ်ပညာကဵု သၟာမဳဒဳယာဇြောယှေဝ်တုဲ ဟီုပျုတ်ဗ္ဒေက်လဝ်ရ။
“သွက်ဗဳလျာန်နာၜါတၠ မိက်ဂွံကၠောန်ဒၟံၚ်ညံၚ်သၟတ်လ္တူအာယုက်စှ်သၞာံ ဍေံတအ်ကဵုဍေံတအ် ဒိုဟ်ဟ်ဓီုဓီုဂှ် သုၚ်စောဲ အာဲကၟာဲယေန်သၞာၚ်အဳတလဳ ဂွံမာန်ဒၟံၚ်ဏောၚ်ဟီုဂှ် နကဵုအဲ ဒးအံသဝ်ရ”ဂှ် ဝန်ဇၞော်ကွတ်စက်တြေံ ကေုာံ က္ဍိုပ်သ္ကိုပ်ဗော်တြေံ ကာလိုဝ်ကေယ်လာန်ဒါ ဟီုသ္ဂးလဝ်ရ။
သ္အာၚ်နူဂှ်ပၠန် အရာလ္ၚဵုဂှ် သွက်ဂွံသွံတြး ဗွဲမလ္ဂူတပ်တးဟွံသေၚ်တုဲ ပ္ဍဲကဵုဏံ မွဲဂှ် ဒှ်ဂုဏ်သိက္ခာ ကေုာံ ပရောဝၚ်ကၟိန်ဍုၚ်မွဲရဂှ် ညးဟီုသ္ဂးလဝ်ရ။
မွဲအခိၚ်တေံ ဒုၚ်တဲကၠောန်ဗဒှ်အာ ပ္ဍဲဍုၚ်ရောမတြေံ ကိုဝ်ဇြဳယာမ်ဏောၚ် ၜိုန်ရမာက်သ် ဟီုလဝ်ကီုလေဝ် ပေါဲလက်ဗန် အဳတလဳပါဲတးလဝ်ဂှ် ဒှ်ဗလးခေတ်ရောမကၠာတေံ မွဲမွဲဂကူ နွံရဂှ် ဂွံတီကေတ်ရ။
“အရာနွံ ပ္ဍဲဓရီုကမ္မရာသီုဖအိုတ်ဂှ် ဒှ်အပြုပြေၚ်ဍုၚ်တြေံရောမဏောၚ်။ ဒၟာနူဂှ်ရ ဟွံဂတာပ်ခေတ်လးလးပုဟ်။ ကဵုသ္ကိုပ်ဝန်ဇၞော်အဳတလဳ သီုဝန်ဇၞော်ပရေၚ်ယေန်သၞာၚ်တအ်လေဝ် ဒှ်တက်လဝ်ကျာရ။ ညးတအ်တုပ်လဝ်စိုတ် သွက်အရာဏံရ”ဂှ် ဂအုပ်သၞာဲဒဴ ရေၚ်တၠုၚ်ဖိုလ်တေတ်သလာ ဟီုသ္ဂးလဝ်ရ။
ပ္ဍဲအဳတလဳဂှ် အခန်ကၞာဂကူလဵုမွဲဟွံဟီု ပ္ဍဲဒၞာဲအာဲကၟာဲကၟိန်ဍုၚ်ဂှ် သ္ပရှ်ေသှ်ေ စဵုဒၞာအာရောၚ် ဝန်ဇၞော်ပရေၚ်ယေန်သၞာၚ် ဟီုသ္ဂးလဝ်ရ။
“ကၠောန် ပ္ဍဲဍုၚ်ရောမဟွံသေၚ်ပုဟ်။ ဗွဲတၟေၚ်တှ်ေ သြန်ယူရော ဗ္ၜတ်ဗွဲမဂၠိုၚ်ဂၠေၚ် ဂွံကၠုၚ် ဂၠိုၚ်ကဵုပြကောဋိကိုတ်ဂှ်လေဝ် သွက်ဂွံသၠးပွးထံက်ပၚ်အာ ပ္ဍဲရုၚ်ဂဥုဲကောန်ၚာ်အဳတလဳ ညံၚ်ကပေါတ်အထံက်အရီု သွက်ဂွံဗတိုက်သရိုဟ်ယဲကောန်ၚာ်ကီု သီုကမၠောန်သုတေသန ဇြဟတ်ဂွံခိုဟ်တိုန်အာမာန် ရန်လဝ်ရ”ဂှ် ဓမံက်လဝ်ပ္ဍဲတၚ်လလောၚ်တြးဝန်ဇၞော်ရ။
“ရာဇာဝၚ် ကေုာံ သုတေသနတြေံတြဟ်၊ အာဲကၟာဲအနုပညာ သီုယေန်သၞာၚ် ပိုဲဂှ် သွက်ဂွံသၠုၚ်ပ္တိုန် နသၞောတ်ဗ္ၜတ် အလုံဂၠးကဝ်မွဲလေဝ် ဒှ်ဏောၚ်”ဂှ် ဟီုသ္ဂးလဝ်ရ။
Ref,Reuters
sanlontai