ညံၚ်ပရေၚ်အုပ်ဓုပ်ပၞာန် ဂွံအိုတ်အးအာ ပံၚ်တောဲကဵုဂကောံဂမၠိုၚ်ဖအိုတ်ဏောၚ် ဥက္ကဋ္ဌ KNU ဟီု

ကအ်ကြိက်၊ အဝ်ဂေတ်(၁၃)

ညံၚ်လၟေၚ်ကမၠောန်ပရေၚ်အုပ်ဓုပ် ဂၠံၚ်တရဴသၞောတ်တၠအဝဵုပၞာန်သီုဖအိုတ် ဂွံအိုတ်အးအာမာန် မ္ၚးနူဂကောံပၠန်ဂတးကောန်ဍုၚ်အရၚ်၊ ဂကောံဗော်သွးဒဳမဝ်ကရေဇြဳတအ်တုဲ ပံၚ်တောဲကၠောန်ရေၚ်တၠုၚ်အာကဵု ဂကောံဒုၚ်သ္ဇိုၚ်ညးဍုၚ်ကွာန်တအ်ရောၚ်ဂှ် ဥက္ကဋ္ဌ ဗော်သွးကောန်ဂကူကရေၚ် (KNU ) ဟီုသ္ဂးလဝ်ရ။

ပ္ဍဲဂလာၚ်လၟိၚ် တ္ၚဲအာဇာနဲကောန်ဂကူကရေၚ် မရနုက်ကဵု (၇၃)ဝါ ကၠုၚ်စိုပ် ပ္ဍဲဂိတုအဝ်ဂေတ် စၟတ်တ္ၚဲ(၁၂)ဂှ် ဥက္ကဋ္ဌ ဗော်သွးကောန်ဂကူကရေၚ် (KNU) ပဒိုဝ်သဝ်ကွေဝ်ထူဝေန် ဟီုလၟိၚ်လဝ်ဒှ်တုဲ ဂကောံပၞာန်ဂှ် သုၚ်စောဲဝါဒမဟာဂကူဗၟာတုဲ ဒက်ပ္တန်ဒၟံၚ် သၞောတ်တၠအဝဵု ဒှ်ဂကောံဂၠာဲဒၟံၚ်ဒတုဲဖိုလ်ဇကု မွဲဂကောံရဂှ် ဟီုသ္ဂးလဝ်ရ။

သ္ပတံနူ သၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ(၁)တုဲ ဂကောံပၞာန် ထပ်ကေတ်ကၠုၚ်အဝဵုကၟိန်ဍုၚ် ဗွဲအဓမ္မမွဲလန်ပၠန်တုဲ ပ္ဍဲလ္တူကေတ်ကၠုၚ်အဝဵုကၟိန်ဍုၚ် ဟွံဗဗွဲဓဝ် ဗီုလၟုဟ်ဏံ ညးဍုၚ်ကွာန်တအ် ဒုၚ်တဲဟွံမာန် ဒစဵုဒစးကၠုၚ် နနဲကဲဂၠံၚ်ဍာန်နာနာသာ် စိုပ်အာကဆံၚ် ဒးပၠန်ဂတးရပ်လွဟ်တုဲ ညံၚ်ဂွံဗတိုက်သရိုဟ် ပရေၚ်ဒစဵုဒစးညးဍုၚ်ကွာန်ဂှ် ဂကောံပၞာန် သုၚ်စောဲကၠုၚ် ဒပ်ပၞာန်တုဲ ကၠောန်ကၠုၚ် နဲကဲပ္ကီုပရာပ် အတိုၚ်ပရေၚ်ပၞာန် အကာဲအရာပရေံပရေံရဂှ် ပဒိုဝ်သဝ်ကွေဝ်ထူဝေန် ဟီုသ္ဂးလဝ်ရ။

ဂကောံပၞာန်ဂှ် ပါဲနူလွဟ်လက်နက်ဇၞော်၊ မၠံက်ဇၞော်တုဲ သုၚ်စောဲက္ၜၚ်ကျာတုဲ ၜိုန်ရဗတိုက်ပန်ပှ်ောဒၟံၚ်ကီုလေဝ် နကဵုကောန်ဍုၚ်အရၚ် ညးဍုၚ်ကွာန်တအ် ဟွံဒုၚ်ကမျမွဲသာ် ပ္ဍဲအကာဲအရာလၟုဟ် ကောန်ဂကူကောန်ဍုၚ်အရၚ်သီုဖအိုတ်ဂှ် ပ္ဍဲပရေၚ်လၟေၚ်ဘဝအရိုဟ်ဒဒှ်တ္ၚဲ ဒးဆေၚ်ဒၟံၚ်မုက်ကဵု အခက်ခုဲ၊ ပရေၚ်ဒှ်ဓဝိၚ်ဂွိၚ်ဂွာဲ ကေုာံ ပရေၚ်ဖေက်ဂၟံက် ဗီုပြၚ်နာနာသာ်ရဂှ်လေဝ် ဟီုသ္ဂးလဝ်ရ။

ဂကောံပၞာန်သီအဝဵုဂှ် ဒးဒုၚ်ဒၟံၚ်ဇြဟတ်ဓရိုဟ် သွာၚ်နာနာတုဲ ဂကောံပၞာန် ဂိုၚ်ရပ်သုၚ်စောဲဒၟံၚ် ဝါမဟာဂကူဂှ် လ္တူကောန်ဂကူကောန်ဍုၚ်အရၚ် ကေုာံ ညးဍုၚ်ကွာန်တအ်ဂှ် ဆက်ကၠောန်သ္ပဒၟံၚ် ပရေၚ်ပ္ကီုပရာပ်ဍဵုဍိုက်ဖိုဟ်ဏီတုဲ ဆက်ဂိုၚ်ရပ်လဝ် ပရေၚ်အုပ်ဓုပ်ပၞာန် ​ဗ္ဂေတ်လီၜန်ဒၟံၚ် နနဲကဲပြယာဲစုၚ်ရဂှ် ဥက္ကဋ္ဌ KNU ဟီုသ္ဂးလဝ်ရ။

သ္အာၚ်နူဂှ်ပၠန် စန်ပကောံ ဂကောံဇြဟတ်ဗော်သွးအလုံအိုဿီုဂှ်တုဲ ကံကုသိုလ်ဒပ်ပၞာန်ဂှ် ကလေၚ်ပြံၚ်စၠောံစုတ် ပ္ဍဲတဲညးဍုၚ်ကွာန်တုဲ စဵုကဵုဒ္ဂေတ်သ္ပကၠောန်ဗက် အတိုၚ်ပၟိက်ဆန္ဒ ကောန်ဂကူကောန်ဍုၚ်အရၚ် ကေုာံ ညးဍုၚ်ကွာန်တအ်မာန်ဂှ် ဒးဆက်ပ္တိတ်အာဇြဟတ်ရောၚ်ဂှ် ဥက္ကဋ္ဌ KNU ပဒိုဝ်သဝ်ကွေဝ်ထူဝေန် ဗတိုက်ဖ္အောဝ်ဟီုလၟိၚ်လဝ်ရ။

ဒပ်ပၞာန်ဗၠးၜးကောန်ဂကူကရေၚ် (KNLA) မနွံဒၟံၚ် သၟဝ်ဗော်သွးကောန်ဂကူကရေၚ် (KNU)ဂှ်လေဝ် နကဵုက္ဍိုပ်သ္ကိုပ်ပၠန်ဂတး၊ သ္ဂံၚ်တအ်ဂှ် ဒးဝေၚ်ပါဲအာ ကမၠောန်ဒစဵုဒစးညးဍုၚ်ကွာန် အလုံသီုဖအိုတ်တုဲ တာလျိုၚ်ဝၚ်ကဵုလဝ် ဟွံတုဲဒှ်ဏီဂှ် ဆက်ဂတတုဲ သွက်ဂွံဆက်ယိုက်ဂၠေၚ်အာကီု၊ လ္တူဂၠံၚ်တရဴလၟေၚ်ကမၠောန်ဇကုဇကု ညံၚ်ဂွံဒတူလာၚ်အာ ပိုတ်တ်သ္ကုတ်တ်ဂှ် ပလံၚ်ဗစိုပ်လဝ် လိက်သဝဏ် အခန်ကၞာစၟတ်သမ္တီ တ္ၚဲအာဇာနဲကောန်ဂကူကရေၚ် မရနုက်ကဵု(၇၃)ဝါတုဲ ကဵုသမ္တီ ဟီုလၟိၚ်လဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU