ကံၚ်ဇြဳပၞာန်ကဵုအခေါၚ်တုဲ ကောန်သ္ဂံၚ်ဒပ်ဗော်ဍုၚ်မန်တၟိ ဂေတ်ကၠုၚ်ဂီုကၠီုဒေသ သၠဲသၠဲလးလး

ကအ်ကြိက်၊ အဝ်ဂါတ် (၁၃)

ကောန်သ္ဂံၚ်နူကဵုဒပ်ပၞာန်ဗၠးၜးကောန်ဂကူမန် ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော်မွဲဂကောံဂှ်ဝွံ ကံၚ်ဇြဳပၞာန်ကဵုအခေါၚ်တုဲ ကၠောန်သ္ပဂေတ်ကၠုၚ်ဂီုကၠီုဒေသ သၠဲသၠဲလးလးဂှ် ဂွံတီကေတ် ဇရေၚ်ညးဒေသတံရ။

ကောန်ဂကောံဒပ် ဒပ်ပၞာန်ဗၠးၜးကောန်ဂကူမန် MNLA ဝွံ အပ္ဍဲအကြာတ္ၚဲတံဏံ ပ္ဍဲကဵုကွာန်မန်လ္ၚဵု မၞုံပွိုၚ်ဍုၚ်ကအ်ကြိက်၊ တွဵုရးကရေၚ် မဒှ်တိဍာ်အုပ်ဓုပ်ခရိုၚ်သဓီုဂှ်ကဵု ပ္ဍဲကဵုကွာန်မန် မၞုံပွိုၚ်ဍုၚ်ကျာ်မြဟ်၊ တွဵုရးဍုၚ်မန်တံဂှ် ထပ်သၠဲပ္တိုန်ဂေတ်ကၠုၚ်ဂီုကၠီုဒေသတံရ။

ကောန်သ္ဂံၚ်ဒပ်ဗော်ဍုၚ်မန်တၟိဂမၠိုၚ်ဝွံ စနူဂိတုဂျူလာၚ် သတ္တာဟဒုတိယတုဲကၠုၚ်တေံတုဲ ပ္ဍဲကဵုကွာန်မန်လ္ၚဵုလ္ၚဵု နူကဵုပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ်တံဂှ်ကီု သီုကဵုမွဲဒမြိပ်ဂၠံၚ်ကွဳစက်မုဟ်ဍုၚ်−ဇြပ်ဗုတံဂှ် စဂေတ်လဝ်ဂီုကၠီု နကဵုကယျိုၚ်ပၞာန်ပေၚ်ၚ်ရ။

ဗော်ဍုၚ်မန်တၟိဝွံ တုဲကၠုၚ်နူဂိတုဂျူလာၚ် သတ္တာဟပထမတေံတုဲ ကြဴနူအာစိုပ်ဆဵုဂဗကဵု ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန် (NSPNC) ပ္ဍဲနေဗျဳဒဝ်တုဲဂှ် ပ္ဍဲကဵုကွာန်မန်ဂမၠိုၚ်ဂှ် ကောန်သ္ဂံၚ် ဒပ်သၟဝ်တဲဂမၠိုၚ် စဂေတ်ကၠုၚ်ဂီုကၠီုဒေသတံရ။

လ္တူပရူပရာ ဗော်ဍုၚ်မန်တၟိ ဂေတ်ဂီုကၠီုဂှ် ညးဍုၚ်ကွာန်မန်လ္ၚဵုတံ ထံက်ဂလာန်ဒုၚ်တၠုၚ်တံ နွံကီုလေဝ် ညးဍုၚ်ကွာန် မပါလုပ်ဒၟံၚ် ပ္ဍဲကဵုပၠန်ဂတးတံ ဒစဵုဒစးပါ်ပါဲဒၟံၚ်တံ နွံဒၟံၚ်ရ။

“ညးဍုၚ်ကွာန်မန် မကၠောန်ဒၟံၚ်ပၠန်ဂတးလၟုဟ်တံဂှ် ကၠောန်ဗီုဏံဂှ် ဟွံကဵုဇြဟတ်ပုဟ်။ ညးတံ ညာတ်ဒၟံၚ် ပံၚ်ကဵုစကစတုဲ ကၠောန်ဒၟံၚ်တုဲ ဟီုဂးဒၟံၚ် လ္တူလပှ်ကျာတံဂှ်နွံရ။ ညးဍုၚ်ကွာန်မန်လ္ၚဵုတံပၠန်ဂှ် အရာတံဏံဂှ် ဒုၚ်တၠုၚ် ဒုၚ်တဲတုဲ သွက်ဂွံဆက်ကၠောန်ကဵုဂှ် ထပ်အာတ်မိက်ဒၟံၚ်တံလေဝ် နွံရ” သာ်ဝွံ ညးဍုၚ်ကွာန်မန်မွဲတၠ ဟီုရ။

ပ္ဍဲကဵုကွာန် ကောန်ဒပ်ဗော်ဍုၚ်မန်တၟိတံ မဂေတ်ဒၟံၚ်ဂီုကၠီုတံဂှ်ဝွံ ကွာန်ပံၚ်တောဲအုပ်ဓုပ်ဒၟံၚ်ကဵု ဂကောံဗော်သွးကောန်ဂကူကရေၚ် (KNU) တံလေဝ် ပါလုပ်ဒၟံၚ်တုဲ ပ္ဍဲကဵုသၞာံဏံမံက်တေံဂှ်လေဝ် ပ္ဍဲကဵုကွာန်မန် မၞုံအပ္ဍဲပွိုၚ်ဍုၚ်ကအ်ကြိက်တံဂှ် ဒပ်ပံၚ်ကောံ KNU တံကဵု ကံၚ်ဇြဳပၞာန်တံ ပေါဲဗ္တိုက်သ္ကာတ်မြဟ်လဝ်ဏီရ။

ဟိုတ်ဂှ်ရ ညးဒေသမၞုံအပ္ဍဲကွာန်မန်တံ ဂၠိုၚ်ကဵုကၠံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်နွံတုဲ ဟိုတ်နူပရေၚ်ပန်ပှော်လွဟ်ဇၞော်တုဲ သ္ၚိတူလီုလာ်ဆောံလေၚ်တံလေဝ် က္တဵုဒှ်လဝ်ရ။

ကံၚ်ဇြဳပၞာန်ကဵုလဝ်အခေါၚ်တုဲ ပ္ဍဲကဵုကောန်သ္ဂံၚ်ဗော်ဍုၚ်မန်တၟိတံ ချဳဒရာၚ်ဂေတ်ကၚ် လ္ဂောံကဵုပရေၚ်ဂီုကၠီုတံဂှ် ညံၚ်ဂွိုအ်ဂဗဆေၚ်မုက်ကဵု ဂကောံဇြဟတ်ပၠန်ဂတးတံဂှ် ကၠောန်လဝ်ပရေၚ်သဳကၠဳပ္ညဳပ္ညပ်တံ နွံမာန်ရောၚ် ညးမစုက်လုက်ကဵု ဗော်ဍုၚ်မန်တၟိတံ ဟီုဂးဒၟံၚ်အိုတ်ရ။

နကဵုသြၚ်လောန်တိုၚ်(မ်) စပ်ကဵုကောန်သ္ဂံၚ်ဒပ်ပၞာန်ဗၠးၜးကောန်ဂကူမန်တံ ဂေတ်ဂီုကၠီုဒေသဂှ်တုဲ ၜိုန်ရဆက်စၠောံလဝ်ဖုၚ် ဇရေၚ်ညးဒုၚ်တာလျိုၚ်ကာအပ္ဍဲဍုၚ် ဗော်ဍုၚ်မန်တၟိ နာဲဗညာလဴ (၃) ဝါဟွံကကီုလေဝ် ဟွံဂွံလဝ်အဆက်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်မန်တံဂှ် ပြဝလၟုဟ်ဝွံ နကဵုဗော်ဍုၚ်မန်တၟိ ဟွံပါလုပ်ကၠုၚ် ပ္ဍဲကဵုပၠန်ဂတးက္ညၚ်ဏံဂှ် ဒှ်ချဳဒရာၚ် လ္ဂောံကဵုမဟာဗျူဟာ ပရေၚ်ဆက်ဆောံညးဍုၚ်ကွာန်ကဵု ဒှ်သဘဴဟံၚ်သိက္ခာပရေၚ်ဍုၚ်ကွာန်၊ ပရေၚ်ပၞာန်တံရောၚ်ဂှ်လေဝ် ပါ်ပါဲဒၟံၚ်တံ နွံဒၟံၚ်ရ။

သ္အာၚ်နူဂှ်ပၠန် နကဵုဗော်ဍုၚ်မန်တၟိ ပရေၚ်သဳကၠဳဆဵုဂဗ ကုကံၚ်ဇြဳပၞာန် နွံကၠုၚ်စဵုကဵု (၆) ဝါကိတ်တ်ဂှ် လ္တူပွမဂေတ်ဂီုကၠီု အပ္ဍဲဒေသမန်တံသာ်ဏံဂှ် ညံၚ်ဂွိုအ်ဒှ်လေံဒုက်ဒပ်ပၞာန်ဂှ်လေဝ် ကဵုသတိထံက်ထ္ၜးဒၟံၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−NMSP