နေဗျဳဒဝ်၊ အဝ်ဂါတ် (၁၃)
က္ဍိုပ်သ္ကိုပ်ပၞာန် မသီကေတ်လဝ်အဝဵုကၟိန်ဍုၚ် နကဵုဇြဟတ်လွဟ်လက်နက်ဂှ်ဝွံ မ္ၚးနူလ္ပာ်ပရေၚ်ပၞာန်ဂှ် ပ္ဍဲကဵုဒၞါဲအုပ်ဓုပ်တံဂှ်လေဝ် ကဵုကၠုၚ်ဒၞါဲ ကုသ္ကိုပ်ဗိုလ်ပၞာန်တံ ဂၠိုၚ်ကၠုၚ်ဂှ် ညးခါတ်အကာဲပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵုဟိုတ်ဍုၚ်ကွာန်ဟွံညိၚ်ဝတ် ကံၚ်ဇြဳပၞာန် မထပ်ပပဵုလဝ်အာယုက်ကာလကာတၟေၚ် ပွိုၚ် (၆) ဂိတု နူကဵုဂိတုအဝ်ဂါတ် (၁) စဵုကဵုဂိတုဖေဖဝ်ဝါရဳ (၃၁) ဂှ် ကလေၚ်ဒက်ပ္တန်လဝ် ဂကောံကံၚ်ဇြဳပၞာန်ပၠန်ရ။
ပ္ဍဲကဵုဂကောံကံၚ်ဇြဳပၞာန် မကလေၚ်ဒက်ပ္တန်လဝ် (၁၈) တၠဂှ် သ္ကိုပ်ဗိုလ်ပၞာန် နူကဵုဒပ်ပၞာန်တံ ပါလုပ်ဒၟံၚ် စဵုကဵု (၉) တၠတုဲ ပအပ်ကဵုလဝ်ညးတံ အဝဵုသၠုၚ်အိုတ်တံရ။
သ္အာၚ်နူဂှ်ပၠန် ပ္ဍဲကဵုကမ္မတဳအုပ်ဓုပ် ကဆံၚ်ကၟိန်ဍုၚ် မကလေၚ်ဒက်ပ္တန်လဝ်တၟိ အပ္ဍဲဂိတုဂျူလာၚ် သတ္တာဟပထမဂှ်လေဝ် ပအပ်ကဵုလဝ်တာလျိုၚ် ကုသ္ကိုပ်ဗိုလ်ပၞာန်ဂမၠိုၚ် နဒဒှ်ဥက္ကဌရ။
ပ္ဍဲကဵုကမ္မတဳကောပ်ကာဲသြန်ဍုၚ်သ္အာၚ် မကလေၚ်ဒက်ပ္တန်လဝ်တၟိဂှ်ကီု ပ္ဍဲကဵုကမ္မတဳစၟဳတ်ပရေၚ်ဗၞိက်ဂေတ်ဂြိပ်ဂွံဒှ်လၟေၚ်ၚ်တံဂှ်လေဝ် ပအပ်ခါန်ကၞက်လဝ် သ္ကိုပ်ဗိုလ်ပၞာန်တံတုဲ နဒဒှ်ဥက္ကဌ ကမ္မတဳတံဏံဂှ် ကဵုလဝ်တာလျိုၚ် ကုဒုသ္ကိုပ်ဗိုလ်ဇၞော် မိုဝ်မျေတ်ထောန် မၞိဟ်ပတှ်ေက္ဍိုပ်သ္ကိုပ်ပၞာန်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူဖေတာန်ဂှ် ကဵုဒၞါဲကုသၞာဲဒဴနူကဵုဒပ်ပၞာန်တံဂှ်ဝွံ ပ္ဍဲလ္ပာ်ပရေၚ်ပၞာန်တံသၟးဟွံက ပ္ဍဲကဵုဒၞါဲကောပ်ကာဲအုပ်ဓုပ်တၞဟ်ဟ်တံဂှ်လေဝ် ဒှ်သဘဴလုပ်ကေတ်ဒၞါဲတုဲ ကၠောန်ကၠုၚ် ပရေၚ်အုပ်ဓုပ်ပၞာန် ကၠးကၠးခၠေဲခၠေဲရဂှ် ထံက်ထ္ၜးလဝ်ရ။
“ညအ်ဂှ် လ္ပာ်ပရေၚ်ပၞာန်သၟးဟွံကပုဟ်၊ ပ္ဍဲကဵုကမၠောန်ကောပ်ကာဲအုပ်ဓုပ်တံဂှ်လေဝ် ဒှ်သဘဴလုပ်ကေတ်ဒၞါဲကီုရ။ ဒးဟီုမ္ဂး ပရေၚ်အုပ်ဓုပ်ပၞာန်ဂှ် ကၠောန်ကၠုၚ်ကၠးကၠးဖ္ဍးဖ္ဍးရ။ တော်ကဵုကောန်အရာပ်တၞဟ်မ္ဂး မၞိဟ်ဍေံတံရ ကၠောန်မာန်ဏောၚ်၊ မၞိဟ်ဍေံတံရ ဖျေံစိုတ်ဂွံဏောၚ်။ ညအ်ဂှ် ဒှ်အရာကဵုဒၞါဲ အပ္ဍဲကဵုဂကောံဍေံတံ ညံၚ်ဂွံဂီုကၠီုတုဲ အကြာဍေံတံရေၚ်သ္ကအ် ညံၚ်ဂွိုအ်ဒှ်လညာတ်ပြးထ္ကးဂှ်လေဝ် ပါရ။ ဒၞါဲတံဂှ် တြးတုဲကဵုလဝ်ရ။ ပ္ဍဲကဵုဒပ်ပၞာန်မွဲဓဝ်မ္ဂး ဗွိုၚ်ဍေံဍန်တုဲ ဟိုတ်ဂှ်ရ ပ္ဍဲကဵုကမၠောန်ကောပ်ကာဲတၞဟ်ဟ်တံ၊ ဌာနဝန်ဇၞော်တၞဟ်ဟ်တံ၊ ညံၚ်ဂွံရပ်လဝ် အရာတံဏံသီုဖအိုတ် နူကဵုသ္ၚောဲသ္ၚောဲဂှ်ကီု၊ စပ်ကဵုပရေၚ်ညဳသၟဟ်အပ္ဍဲဒပ် ညးမွဲကုညးမွဲ ညံၚ်ဂွိုအ်ဒးဒုၚ်စသိုၚ် ကၠဟ်လဝ်ဂှ် ဒှ်သဘဴတြးကဵုလဝ်ဒၞါဲရ။ အကြာဍေံတံရေၚ်သ္ကအ် ဒှ်သဘဴညးသၠေံအဲ အဲသၠေံညးရ။ အဲညာတ်သာ်ဏံရ” သာ်ဝွံ သ္ဂးရ။
နကဵုကံၚ်ဇြဳပၞာန် ပါလုပ်ကၠုၚ် ပ္ဍဲကဵုလ္ပာ်စဳရေၚ်သၞောဝ်ဓဝ် သီုကဵုဌာနအလဵုအသဳမဆေၚ်စပ်ဂမၠိုၚ် လ္ဂောံကဵုသၞောဝ်သ္ဇိုၚ်ဍုၚ်မ္ဂး ဒပ်ပၞာန်အခေါၚ်ကၠောန်ဟွံမွဲတံဂှ်ဝွံ ရန်တၟံလဝ် သွက်ဂွံထိၚ်ဒဝ် ညးယိုက်ဝန်ကောန်အရာပ်တံဂှ်တုဲ နဒဒှ်ဖဵုအဆက်လက္ကရဴဂှ် အကြာဒပ်ပၞာန်ကဵု ညးယိုက်ဝန်ကောန်အရာပ်တံဂှ် ပရေၚ်ဆက်ဆောံတံ သာပရေံကၠုၚ်မာန်ရောၚ် ဥူဖေတာန် သ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ကဵုလဝ်တာလျိုၚ် ကုသ္ကိုပ်ဗိုလ်၊ ဗိုလ်ဇၞော် ကေုာံ သၞာဲဒဴနူကဵုဒပ်ပၞာန်တံ ပ္ဍဲကဵုဌာနအလဵုအသဳလ္ပာ်အရာပ်တံ တာလျိုၚ်သၠုၚ်အိုတ်ဂှ်တုဲ ထ္မံက်ကၠုၚ်ရုပ်ရဴ သၞောတ်အုပ်ဓုပ်ပၞာန်ဗိုန်န်ခိုၚ်ၚ်ရောၚ်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်ရ။
ပ္ဍဲဍုၚ်ဗၟာဂှ် ဟိုတ်နူပရေၚ်ပၞာန်သီအဝဵုတုဲ ဂကောံဒပ်ရပ်လွဟ်ညးဍုၚ်ကွာန် မံက်ကၠုၚ် ၅၀၀ ပြၚ်တုဲ သွက်ပရေၚ်အုပ်ဓုပ်ပၞာန် ကေုာံ ပရေၚ်သၞောတ်တၠအဝဵုပၞာန်ဂွံသရိုဟ်စှ်ေအာဂှ် ပံၚ်တောဲကဵု ဂကောံရပ်လွဟ်ကောန်ဍုၚ်အရၚ်တံတုဲ ပၠန်ဂတးဗ္တိုက်ပ္တိတ်ဒၟံၚ် ဒပ်ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု-MOI
sanlontai