ပၞာန်ညးဍုၚ်ကွာန် ဒုၚ်ဩဇာကံၚ်ဇြဳပၞာန် ရပ်လဝ် ညးဒေသမူသေဝ် (၄) တၠ၊ ဒးဒုၚ်ဂစိုတ်လဝ်မွဲတၠ

မူသေဝ် – အဝ်ဂေတ်(၁၅)

တွဵုရးသေံသၟဝ်ကျာ၊ ညးဒေသနူဍုၚ်မူသေဝ်ပန်တၠဂှ် ဂကောံပၞာန်ညးဍုၚ်ကွာန် ဒုၚ်ဩဇာကံၚ်ဇြဳပၞာန်တအ် ရပ်ဒက်ပျဲပျာံလဝ်တုဲ ပြိုက်ဂစိုတ်လဝ်မွဲတၠရဂှ် ဒပ်ပၞာန်တအာၚ် (TNLA) လလောၚ်တြးလဝ် ပရိုၚ်ရ။

ရပ်ကေတ်ဏာလဝ် ညးဒးဒုၚ်ရပ်လဝ်တအ် နကဵုတၚ်စောတ်စောဲ ဒှ်ကောန်ဒပ် TNLA ကၟာတ်လဝ်မုက်ကဵုယာတ်တုဲ ဟွံဗ္စစၞ ပွိုၚ်(၂)တ္ၚဲပေၚ်ၚ် ၜုၚ်တက်ထၞက်စာဲလဝ်ရဂှ် ဟီုသ္ဂးလဝ်ရ။

ဂကောံပၞာန်ညးဍုၚ်ကွာန် ဒုၚ်ဩဇာကံၚ်ဇြဳပၞာန်ဂှ် ပၞောဝ်ကဵုညးဍုၚ်ကွာန် ရပ်ကေတ်ဏာလဝ်ပန်တၠဂှ်မ္ဂး ပြိုက်ဂစိုတ်လဝ် ညးတြုံ အာယုက် (၂၄)သၞာံမွဲတၠတုဲ မၞိဟ်သှ်ေ ဒးလဝ်ဘဲဝပ်သ္ကာတ်မြဟ် (၃)တၠဂှ်လေဝ် ကၟာတ်လဝ်မတ်ကဵုယာတ်တုဲ ကၠုၚ်ကၠဟ်ထောံလဝ် ပ္ဍဲဂအုံအမှိက် ဗ္ဒာဲကွာန်မာန်မိုၚ်ရဂှ် ဂွံတီကေတ်ရ။

ပ္ဍဲဂိတုဂျူလာၚ် တုဲကၠုၚ်တေံကဵု ဂိတုအဝ်ဂေတ်မံက်ဏံ အကြာ TNLA ကဵု ကံၚ်ဇြဳပၞာန် ပေါဲဗတိုက်ဒှ်လဝ် ပ္ဍဲပွိုၚ်ဍုၚ်မူသေဝ်တုဲဂှ် ဂကောံပၞာန်ညးဍုၚ်ကွာန် ရပ်ဒပ်ပျဲပျာံၚ်ဒၟံၚ်ညးဒေသကွာန်မိုၚ်သေတ်ကဵု ကွာန်မာန်ကာန် ဂကောံကွာန်ဏာမ်ကာတ်ရ။

ကောန်ဒပ်ကံၚ်ဇြဳပၞာန်ဂှ် ပ္ဍဲဒၞာဲပေါဲဗတိုက်က္တဵုဒှ်ဒၟံၚ်ကီု သီုဒၞာဲပေါဲဗတိုက်ဟွံက္တဵုဒှ်တအ်ဂှ် ရပ်ဒပ်ဒၟံၚ်ညးဍုၚ်ကွာန် ဗွဲအဓမ္မကီု၊ ပျဲပျာံပြိုက်ဂစိုတ်ဒၟံၚ် သီုဖံက်ပ္ကဝ်ဒၟံၚ်အခေါၚ်အရာမၞိဟ် က္လိလောန်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး TNLA ရ။

ပရိုၚ် – သြၚ်လောန်တိုၚ်(မ်)

ဗီုရုပ် – TNLA