ဂဂဝ် – အဝ်ဂေတ်(၁၅)
ရးဒေသမဂွေ၊ ပ္ဍဲကွာန်ပျူသဝ်ထဳဗူ လေတ်လှသွေ မၞုံဗစပ်ဂဂဝ် ရးသေတ်ဂါၚ်ကဵု ကလေတအ်ဂှ် ဟိုတ်နူကပေါတ်အရပ်စပ်မၞိဟ် ကေုာံ ဘဲကၞောဝ်က္တဵုဒှ်ဒၟံၚ်တုဲ ညံၚ်ဒပ်ပၞာန်ဂွံဂြးကဵုတိဍာ်ဂှ် ကျာ်ဇၞော်ပျူသဝ်ထဳမွဲဇကု အာတ်မိက်လဝ်ရ။
ပ္ဍဲဂိတုအဝ်ဂေတ် စၟတ်တ္ၚဲ(၈)တ္ၚဲကၠုၚ်တေံ အာတ်လဝ်အရီုဗၚ်ဒပ်ကံၚ်ဇြဳပၞာန်တုဲ ဂကောံသ္ၚိကၟိန်ပျူသဝ်ထဳ (၇၀၀၀) အိန်ထံၚ်ပြၚ် ဒးဆေၚ်ဒၟံၚ်မုက်ကဵု အခက်ခုဲရဂှ် ဟီုသ္ဂးလဝ်ရ။
“ပျူသဝ်ထဳ နူကွာန်ပံၚ် စှ်ကွာန်ပြၚ် ကၠောဝ်ဒၟံၚ်ဂှ် ဒှ်ဒၟံၚ်လအ်ရ။ လှုဲနွံလေဝ် ရာန်ဟွံဂွံပုဟ်။ သ္ကုတ်လ္ပာ်ဂှ် PDF တအ် ဇြဟတ်ခိုဟ်ဒၟံၚ်။ ဒၟာနူဂှ်ရ အာတ်လဝ်အရီုဗၚ်ဒပ်ပၞာန်ရ” ဂှ် ညးဂွံဒုၚ်လဝ်တဲ လိက်အာတ်မိက်ပျူသဝ်ထဳတအ်မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကွာန်အာတ်လဝ်အရီုဗၚ်ကံၚ်ဇြဳပၞာန်ဂှ် ဒှ်ကွာန်ကျောက်ပျုက်၊ ကျာန်တာ၊ အေန်ကျောန်၊ ကျောက်ဇြဳ၊ မန္တာ၊ သာယျာဝတဳ၊ လေဝ်ဂျဳ (ဗၟံက်)၊ လေဝ်ဂျဳ (ပလိုတ်)၊ မျောၚ်ခေန်ယာန်၊ ယှိုဲမေတ္တာ၊ ကုက္ကာ ကေုာံ ဟံသာဝတဳ ပ္ဍဲဗစပ်ပွိုၚ်ဍုၚ်ဂဂဝ်ကဵု ပွိုၚ်ဍုၚ်ကလေရဂှ် ဂွံတီကေတ်ရ။
ကွာန်ပျူသဝ်ထဳတအ်ဂှ် အာရာန်ကေတ်ဒၟံၚ်ဖျာ ပ္ဍဲပွိုၚ်ဍုၚ်ကလေဝ်တုဲ ပ္ဍဲမွဲဒမြိပ်ဂၠံၚ်ဂှ် ဟိုတ်နူဒပ်စဵုဒၞာညးဍုၚ်ကွာန်တအ် အုပ်ဓုပ်လဝ်တိဍာ်တုဲ ဒးဒုၚ်ဆဵုဂဗဒၟံၚ်ကဵု ပရေၚ်ဒးဒုၚ်ရပ် ကေုာံ ဒးဒုၚ်သီကပေါတ်ကညောတ်ရဂှ် ဓမံက်လဝ် ပ္ဍဲလိက်အာတ်လဝ်အရီုဗၚ် ကံၚ်ဇြဳပၞာန်ဂှ်ရ။
သ္အာၚ်နူဂှ်ပၠန် ပ္ဍဲဒေသဂှ် ကၠေၚ်စက်မွဲဂါလာန် စဵုကဵု (၆၀၀၀၀)ဒ္ကေဝ်၊ သဂြာမွဲပသာ စဵုကဵု (၄၀၀၀၀)ဒ္ကေဝ် ၜိုန်ရၚုဟ်နွံဒၟံၚ်ကီုလေဝ် ရာန်ကေတ်ဟွံဂွံ ကပေါတ်ဗၞိက်ပိုတ်သ္ကုတ်ဒၟံၚ်တုဲ ကပေါတ်အသုၚ်စောဲမၞိဟ် ပိုတ်သ္ကုတ်ဒၟံၚ်ဗီုဏံဂှ် စဵုကဵုပွိုၚ် (၆)ဂိတုပြၚ် နွံကၠုၚ်ဒၟံၚ်ယျဂှ် ဂွံတီကေတ်ရ။
ဟိုတ်နူဒးဆဵုဂဗဒၟံၚ်ကဵု အခက်ခုဲသာ်ဏံတုဲ နကဵုကံၚ်ဇြဳပၞာန် ညံၚ်ဂွံဂြးကဵုတိဍာ် ပ္ဍဲဂိတုသေပ်တေမ်ဗာဏံကီု ယဝ်ရဟွံရေၚ်တၠုၚ်ဂြးကဵုတိဍာ်မ္ဂး ဒးဆေၚ်မုက်ကဵု ဘဲကၞောဝ်ရောၚ်ဂှ် ဟီုသ္ဂးလဝ်ရ။
ပ္ဍဲကွာန်ပျူသဝ်ထဳ မၞုံပ္ဍဲဗစပ်ဂဂဝ်ကဵု ကလေ ရးဒေသမဂွေဂှ် ညးဗတိုက်ပၞာန်မာန် ၜိုန်နွံဒၟံၚ် ဗွိုၚ်(၈၀၀)ကီုလေဝ် ဟိုတ်နူလွဟ်လက်နက်ဟၟဲတုဲ သွက်ဂွံဗ္ဂပ်ကဵုလွဟ်လက်နက်ဂှ်လေဝ် ကျာ်ဇၞော်ကလေ နွံယၟု နာဲဣန္ဒောဘာသ က္ဍိုပ်သ္ကိုပ်ပျူသဝ်ထဳဂှ် အာတ်မိက်လဝ်ရ။
သ္ကုတ်လကြဴနူ ဒပ်ပၞာန်သီအဝဵုကၟိန်ဍုၚ်တုဲ ဟိုတ်နူမူဝါဒကံၚ်ဇြဳပၞာန်ဗၠေတ်မှာတုဲ ညးဍုၚ်ကွာန်တအ် ဒးဆေၚ်ဒၟံၚ်မုက်ကဵုအခက်ခုဲတုဲ အခိၚ်လၟုဟ်ဏံ ပျူသဝ်ထဳ ညးထံက်ဂလာန်ကဵု ဒပ်ပၞာန်တအ်လေဝ် ဟွံက္လိဂွံပရေၚ်စဵုဒၞာ နူကံၚ်ဇြဳပၞာန်ရဂှ် ညးသ္ၚဳဂၠိပ်ပါ်ပါဲတအ် သ္ၚဳဂၠိပ်လဝ်အိုတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – လကျာ်ပျူသဝ်ထဳ ထံက်ဂလာန်ဒပ်ပၞာန်မွဲဇကု (ဗီုတြေံ)
sanlontai