ဂျာကာတာ – အဝ်ဂေတ် (၁၆)
ညးဒုၚ်သစ္စာ (IS) ဒးဒှ်သၠေဟ်ပၟာ ချပ်ဇန်လဝ် သွက်ဂွံဗတိုက်ဌာန်ဂအုပ်ပရေၚ်ဂီုကၠီုဗၠာဲသၟိၚ် မွဲတၠဂှ် ဂကောံပလန်တဲပွပ္ကီုပရာပ် အေန်ဒေါနဳယှာ ရပ်လဝ်ရဂှ် လလောၚ်တြးလဝ်ပရိုၚ် ပ္ဍဲဂိတုအဝ်ဂေတ် စၟတ်တ္ၚဲ(၁၅)ရ။
ညးမၞုံအခေါၚ်ဟီုဂး ဂကောံပလန်တဲပွပ္ကီုပရာပ် ဒါန်သေတ်သ်(Densus 88) ကၟိန်ဍုၚ်အေန်ဒေါနဳယှာဂှ် အခိၚ်လုပ်စိုပ် ဂၠိုက်ဂၠာဲစၟဳစၟတ် တုဲကၠုၚ်ၜါပိတ္ၚဲ ပ္ဍဲမ္ၚးဍုၚ်ဂျာကာတာတေံဂှ် ဂွံဆဵုညာတ်ကေတ်လဝ် ပ္ဍဲမၞိဟ်ဂှ် အလာံ IS၊ ဗ္ကောဝ်မကမ် သီုလွဟ်လက်နက် (၁၆)ဒကိုအ်ရဂှ် ဟီုသ္ဂးလဝ်ရ။
ညးဒးဒှ်သံယသ မဒှ်သ္ဇိုၚ်ဝန်ကုမ္ပဏဳကွဳပၟတ်ကၟိန်ဍုၚ်ပိုၚ်ပြဳဂှ် ၜိုန်ရတိတ်ဟီုလဝ် ဇရေၚ်ညးပိုၚ်ပြဳအဝဵုတအ် အစဳဇန်ညးတေံ သွက်ဂွံဗတိုက်ဌာနဗၠာဲသၟိၚ်ကီုလေဝ် သောဲသောဲဗြောဲဂှ် ဟီုဂးလဝ်ဟၟဲရ။
ညးဒးဒှ်သံသယဂှ် ပ္တိုန်လဝ်ပရောပရော နွံဒၟံၚ်ပၟိက် IS ပ္ဍဲဇြောယှေဝ်မဳဒဳယာတုဲ သွက်ဝါဒတၞုၚ်တၞး နူတေဝ်လဳဂရာမ်မွဲကဆံၚ် ဂၠာဲဒၟံၚ်သြန်ဂအုံ နွံဒၟံၚ်ရဂှ် ဂွံတီကေတ်ရ။
“ပရေၚ်ချဳဒရာ ISIS ဟွံသေၚ်တှ်ေ ပရေၚ်ညးထံက်ဂလာန်ကဵု ISIS ကောံကလောံဒၟံၚ်ဂှ် ၜိုန်ရပိုဲ ဟွံဂွံဆဵုကေတ်နမတ်ကီုလေဝ် ဆလအ်လေဝ် ဒေါံအိုတ်အာဟွံသေၚ်ရ”ဂှ် ညးမၞုံအခေါၚ်ဟီုဂး ဟီုသ္ဂးလဝ်ရ။
သ္အာၚ်နူဂှ်ပၠန် ဟိုတ်နူသက်သဳသာဓကတုဲ ဒးအံသဝ်လဝ်ရဂှ်လေဝ် ညးဟီုထ္ၜးလဝ် ပ္ဍဲပေါဲသောၚ်ကလးပရိုၚ်ဏီရ။
“ရပ်လဝ် ညးမၞုံသံသယပရေၚ်ဆက်စပ်အောန်ဒၟံၚ်ဏံဂှ် နူကဵုသၞာံ ၂၀၂၃ စမံက်တေံ ပရေၚ်ချဳဒရာၚ် ပွပ္ကီုပရာပ်အောန်ကြဳစှ်ေတုဲဂှ် ပ္ဍဲကၟိန်ဍုၚ် ၜိုတ်ဍောတ်ဒၟံၚ်ကီုလေဝ် မၞိဟ်အာစိုပ်ဒၟံၚ်တၞုၚ်တၞး နွံတန်တဴဒၟံၚ်ဂှ် စဳပျး စၞောန်ထ္ၜးဒၟံၚ်ရ”ဂှ် ညးလ္ၚတ်သ္ၚဳဂၠိပ် ပရေၚ်ဂီုကၠီု ဂကောံကဵုကသပ် ကွောန်ကအ်ထ် မွဲတၠ ဟီုသ္ဂးလဝ်ရ။
ကၟိန်ဍုၚ်အေန်ဒေါနဳယှာ မောဿလေန်ဗွဲမဂၠိုၚ် ဒၟံၚ်တန်တဴဒၟံၚ်ဂှ် ပ္ဍဲသၞာံ ၂၀၀၂ တေံ နိုက်ကလာပ် မၞုံတ္ကအ်ဗာလဳ ၜါဆေၚ် ဒးဒုၚ်ဖံက်ခတိုဟ်တုဲ ပရေၚ်ဗတိုက်ဖံက်ခတိုဟ်ဂှ် ဒှ်ပရေၚ်သၟာပ္ကီုပရာပ်တအ် ဗတိုက်လဝ် အကာဲအရာပရေံအိုတ်တုဲ မၞိဟ် (၂၀၂)တၠ ဒးချိုတ်လဝ်တုဲ ဗွဲမဂၠိုၚ် ဒှ်ကောန်ဍုၚ်သ္အာၚ် ညးအာတရဴတအ်ရဂှ် ဂွံတီကေတ်ရ။
ပရေၚ်ဘပဠ သၟာပ္ကီုပရာပ်စိုပ်တၞုၚ်တၞးဂှ် အောန်ယအ်စှ်ေကၠုၚ်ဒၟံၚ် တီတီတုဲ ဟိုတ်နူကၠောန်သ္ပဒၟံၚ် ပရေၚ်ရပ်ဒက် ညးဒးဒှ်သံသယတအ်တုဲ ညးဒုၚ်သစ္စာ ဂကောံ IS တအ် အောန်ကြဳစှ်ေကၠုၚ်ရဂှ် ညးလ္ၚတ်ပါ်ပါဲတအ် သ္ၚဳဂၠိပ်လဝ်အိုတ်ရ။
Ref,CNA
sanlontai