ဟိုတ်နူလဗိုတ်ကျာတိုၚ်ဝှောန် လာန် တုဲ ဒးပလီုလဝ် လၟေၚ်တရဴကျာဂျပါန် (၈၀၀) ပြၚ်

တိုဝ်ကျိုဝ်၊ အဝ်ဂါတ် (၁၆)

ဗွဲဒိုဟ်ပလိုတ် ဍုၚ်ဂျပါန်ဂှ် ဟိုတ်နူလဗိုတ်ကျာတိုၚ်ဝှောန်တုဲ တိလာ်က္တဵုဒှ်လဝ်တုဲ ပၟတ်ဓာတ်လလဳ ပိုတ်ပၠိုတ်လဝ်ဂှ်ရ လာၚ်တရဴကျာ (၈၀၀) ပြၚ် ဒးဒေါအ်ဇူလဝ်ရ။

သၟိၚ်တၠအဝဵုနူကဵုမဆေၚ်စပ်တံဂှ် ဒဒှ်ရလလောၚ်ပ္တိတ်လဝ် တၚ်ကဵုသတိ ဍာ်ဇၞော် ကေုာံ တိလာ်တံဂှ် ထ္မံက်ထ္ၜးလဝ် ပ္ဍဲကဵုဌာန်ပရိုၚ် NHK ရ။

လဗိုတ်ကျာတိုၚ်ဝှောန် မလုပ်စိုပ်ကၠုၚ် အပ္ဍဲၜဳပသိဝှေခ်ဂှ်ဝွံ ပ္ဍဲကဵုဒေသ မၞုံခြာဇမ္ၚောဲ ၄၀၀ ကဳလောမဳတာ နူကဵုဗွဲဒိုဟ်နေရတိဍုၚ်တိုဝ်ကျိုဝ်ဂှ် ကဵုတိလာ်က္တဵုဒှ်လဝ်ရ။

ပ္ဍဲကဵုစၟတ်သမ္တီ လာၚ်ဗလးရုပ်ရမျာၚ်တံဂှ် ပ္ဍဲကဵုၜဳကြုၚ်တံဂှ် ဍာ်ဇွောဝ်ဒၟံၚ် ကဵုအသိၚ်တုဲ သြၚ်ဗၚ်ဂမၠိုၚ် ကြပ်လာ်သရိုဟ်စှ်ေဒၟံၚ်ဂှ် ဂွံဆဵုလဝ်ရ။ ပ္ဍဲကဵုဍုၚ်နာရာဂှ် ပ္ဍဲကဵုသ္ၚိဒၟံၚ် ကေုာံ ဆေၚ်ဖျာသတိုဝ်တံ ဒးဗၠိုက်အာလဝ် သၟဝ်ဍာ်တံအိုတ်ရ။

Japan Airline ဂှ် လၟေၚ်တရဴညးတံ ၂၅၀ ပြၚ် ဒးပလီုလဝ်တုဲ ညးအာတရဴ ၂၅၈၀၀၀ ပြၚ် ဒှ်အာလဝ်အခက်အခုဲအိုတ်ရ။ နကဵုလာၚ်တရဴကျာ ANA ဂှ်လေဝ် ဒးပလီုလဝ် လၟေၚ်တရဴ ၃၁၀ ပြၚ်တုဲ ညးအာတရဴ ၂၄၆၀၀ ပြၚ် ဒှ်အာအခက်အခုဲရ။

ပ္ဍဲကဵုဍုၚ်ဂျပါန် သ္ကုတ်လဒေါဝ်ကဵု သ္ကုတ်ပလိုတ်တံဂှ် ပၟတ်ဓာတ်လလဳ ပိုတ်ပၠိုတ် က္တဵုဒှ်လဝ်တုဲ လၟိဟ်သ္ၚိ ၉၀၀၀၀ ပြၚ် ဒးဇီုကပိုက်လဝ်ရောၚ် ဂွံတီကေတ်ရ။

ဗြဲဂူ ဗွဲမသ္ကာတ်မြဟ်ဂှ်ကဵု ကျာသ္ကာတ်ပိုက်တံဂှ် ကဵုဂၠံၚ်ကၟာတ်က္တဵုဒှ်လဝ်တုဲ ပရေၚ်ရေၚ်တၠုၚ်ကွဳပၟတ် မၞုံအပ္ဍဲဒေသတံဏံဂှ်လေဝ် ဒးဒေါအ်ဇူလဝ်ရ။

တိုၚ်ဝှောန်လာန်ဝွံ ဒမြိပ်ကျာပိုက် မွဲနာဍဳ ၁၅၀ ကဳလောမဳတာ နွံတုဲ တတ်ကၠောံ ဗွဲဒိုဟ်ပလိုတ် တ္ကအ်အဓိကဂှ်တုဲ ဆုဲအာဒၟံၚ် လ္ပာ်ဒိုဟ်ဗာယပ် မွဲနာဍဳ နကဵု ၁၅ ကဳလောမဳတာရ။

ပ္ဍဲဂိတုအဝ်ဂါတ် (၁၆) ပြဟ်ဟ်ဏံ စိုပ်ကၠုၚ်ပ္ဍဲၜဳမှာသၟိတ် ဍုၚ်ဂျပါန်မာန်တုဲ မွဲဒမြိပ်ၜဳဒိုဟ်သၟဝ်ကျာဂှ် လဗိုတ်ကျာဏံ ဆက်နွံမာန်ရောၚ် ဒဒှ်ရချိၚ်ခယျလဝ်ဂှ် အေဂျေန်ဇြဳဗြဲကျာဂျပါန် ဟီုဂးလဝ်ရ။

အေဂျေန်ဇြဳဗြဲကျာဂျပါန်ဂှ် သွက်ဂွံစွံသတိဗွဲတၟေၚ် ကုတိလာ်၊ ဍာ်တိုန် ပ္ဍဲကဵုဒၞါဲတိသဝ်ဝ်တံ၊ ဍာ်ၜဳဍာ်ကြုၚ်ဟးတံ၊ ဍာ်ဇၞော်၊ ကျာသ္ကာတ်ပိုက်တံအိုတ်ဂှ်လေဝ် လလောၚ်ပ္တိတ်လဝ်ရ။

Ref: Reuters