သ္ၚိခါမ်သဳ ကောန်ဒပ် KRF မွဲတၠ ကံၚ်ဇြဳပၞာန် ကၟာတ်ဒၞာလဝ်

ကျာ်ထဝ်၊ အဝ်ဂေတ်(၁၈)

တွဵုရးဍုၚ်မန်၊ ဍုၚ်ကျာ်ထဝ်၊ အရာပ်သၟဝ်ကျာ၊ သ္ၚိခါမ်သဳ ကိုဝ်ယျေဝ်တွေညဳ ကောန်ဒပ် ဂကောံဇြဟတ်ပၠန်ဂတးကျာ်ထဝ် KRF မၞုံဂၠံၚ်မၚ်္ဂလာဂှ် ကံၚ်ဇြဳပၞာန် ကၠုၚ်ကၟာတ်ဒၞာလဝ်ရဂှ် ဂွံတီကေတ် နူညးဒေသကီု သီုညးတာလျိုၚ် PDF ခရိုၚ်သဓီုရ။

ဒပ်ကံၚ်ဇြဳပၞာန်၊ ဂကောံအုပ်ဓုပ်အရာပ်သၟဝ်ကျာ ပါလုပ်သီုဗၠာဲသၟိၚ်တအ်ဂှ် ပ္ဍဲဂိတုအဝ်ဂေတ် စၟတ်တ္ၚဲ (၁၇) အခိၚ်နူဂယး ၜိုတ် (၁၀)နာဍဳဂှ် ကၠုၚ်ကၟာတ်ဒၞာလဝ် သ္ၚိခါမ်သဳ ကိုဝ်ယျေဝ်တွေညဳ ကေၚ်မံၚ်ဒၟံၚ်ဂှ်ရ။

ကံၚ်ဇြဳပၞာန်ဂှ် ကၠာဟွံဂွံကၠုၚ်ကၟာတ်ဒၞာ သ္ၚိခါမ်သဳကိုဝ်ယျေဝ်တွေညဳဏီ လောန်ကၠုၚ်ၜိုတ် (၄) တ္ၚဲတေံလေဝ် ညံၚ်ဂကောံအိန်ထံၚ်တအ် ဂွံပါဲတိတ်ကဵု နူသ္ၚိဒၟံၚ်ဂှ် ကၠုၚ်ကဵုလဝ်သတိတုဲ ကၟာတ်ဒၞာလဝ် တ္ၚဲဏံရ။

ကိုဝ်ယျေဝ်တွေညဳဂှ် ကၠာဟွံဂွံသီအဝဵုဏီ ဒှ်ညးဍုၚ်ကွာန် မံၚ်တန်တဴဒၟံၚ် ၜိုဟ်ဟ် နကဵုကမၠောန်ပ္ကဴ ပသဲတြၚ်ပသဲ ပ္ဍဲသ္ၚိမွဲတၠတုဲ နူထ္ၜးဆန္ဒဒစဵုဒစး လ္တူပရေၚ်သီအဝဵုဂှ် ရုဲစှ်လဝ် ဂၠံၚ်တရဴရပ်လွဟ်ရ။

ညးဒှ်သမ္ဘာကိုဝ်ယျေဝ်တွေညဳလေဝ် ဒှ်အ္စာၝောံဗ္တောန်လိက်မွဲတၠတုဲ ဟိုတ်နူဒပ်ပၞာန်သီအဝဵုတုဲ ပါလုပ်ချဳဒရာၚ်ကၠုၚ် ပ္ဍဲပရေၚ်ချဳဒရာၚ်ပၠန်ဂတးဒစဵုဒစးအဝဵုဟွံပ္ကီုပရာပ် CDM ရ။

ဠဝ်ဗဳဒပ်ပၞာန်တအ်ဂှ် ကိုဝ်ယျေဝ်တွေညဳဏံ ဟိုတ်နူပါလုပ်လဝ် ပ္ဍဲပရေၚ်ဗတိုက်ပန်ကောန်ဒပ်ကံၚ်ဇြဳပၞာန် ပါလုပ်သီုပရေၚ်ဖံက်ခတိုဟ်ဗုံ ဆေၚ်ပုၚ်ဂေါတ်ယှေဝ်၊ ပန်ပှော်သၞေဟ်ကွဳစက်တိုန်ဒဵုကျာ်ဣသိယဵုဂှ်ရ ဒးဒုၚ်ကၟာတ်ဒၞာလဝ် သ္ၚိညးကေၚ်မံၚ်တန်တဴလဝ်ရဂှ် တြးဒၟံၚ်ဝါဒရ။

ကမၠောန်ပြဝကံၚ်ဇြဳပၞာန်ဂှ် ဒှ်ပါ်ဒကးဒၟံၚ်ဆီ အကြာကောန်ဒပ်ပၠန်ဂတးတအ်ကဵု ဂကောံကၟိန်အိန်ထံၚ်ညးတအ်တုဲ ဒှ်ပရေၚ်ဍဵုဍိုက် ပၠုပ်စုတ်ဒၟံၚ်စိုတ်ဖေက် ပ္ဍဲညးဍုၚ်ကွာန်တအ်ရဂှ် ညးဒေသမွဲတၠ ဟီုပါ်ပါဲလဝ်ရ။

ပ္ဍဲပွိုၚ်ဍုၚ်ကျာ်ထဝ်ဂှ် မွဲကာလသီအဝဵုဏံ သ္ၚိဒၟံၚ်ညးစၞးကၠတ်ထဝ် ဗော် NLD တအ်၊ ညးချဳဒရာၚ်ကတိုၚ် ကၟဟ်တအ် ကေုာံ ကောန်ဒပ် PDF တအ် ဟွံအောန်နူ (၂၀) မ ဒးဒုၚ်ကၟာတ်ဒၞာလဝ်တုဲ ဒးဒုၚ်သီကေတ်လဝ်ပရေၚ်ပိုန်ပြိဳတအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ချာန်နေဝ်တြးဝါဒကံၚ်ဇြဳပၞာန်