ပ္ဍဲပေါဲဗတိုက် ဒဵုလက်ဟတ် ဗြဝတဳ လ္ပာ်ကံၚ်ဇြဳပၞာန် ပရေၚ်ဇီုကပိုက် ပြဟ်လလုဲလဝ်ဂၠိုၚ်ဒၟံၚ်

ဗြဝတဳ၊ အဝ်ဂေတ်(၁၈)

သွက်ဂွံက္လေၚ်သီကေတ် ဗဒိုပ်ကုန်တိုၚ်တာဝါ ဒဵုလက်ဟတ် မၞုံဗ္ဒာဲဍုၚ်ဗြဝတဳ တွဵုရးကရေၚ်မာန်ပၠန်ဂှ် ဒပ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် သ္ကာတ်တ်မြဟ်ဟ်ဂှ် ကြဴနူနူပရေၚ်ဇီုကပိုက် ဒးပြဟ်လလုဲလဝ် ဂၠိုၚ်ဒၟံၚ်တုဲ ကလေၚ်ဆုတ်တိတ်အာဒပ်ရောၚ်ဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ဒပ်ပံၚ်ကောံ ကံၚ်ဇြဳပၞာန် BGF ဂှ် တုဲကၠုၚ် ပ္ဍဲဂိတုအဝ်ဂေတ် စၟတ်တ္ၚဲ (၁၅)တေံ သုၚ်စောဲပန်ရီုကဵုလွဟ်ဇၞော် ပန်ရီုကဵုက္ၜၚ်ကျာတုဲ ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲဗဒိုပ်တိုၚ်တာဝါ ဒဵုလက်ဟတ်တုဲ ပေါဲဗတိုက်တအ် ထပ်ဒှ်သ္ကာတ်မြဟ်ဒၟံၚ်ကဵုဒပ်ပံၚ်ကောံ ဒပ်ပၞာန်ဗၠးၜးကောန်ဂကူရေၚ် KNLA ရ။

ပ္ဍဲပေါဲဗတိုက်ဂှ် နူလ္ပာ်ကံၚ်ဇြဳပၞာန် ပါလုပ်သီုသ္ကိုပ်ဗိုလ်မွဲတၠ၊ ဗိုလ်ဇၞော်မွဲတၠ ပံၚ်လၟိဟ် (၁၅) တၠဒးချိုတ်လဝ် ဒးလဝ်ဘဲဝပ် (၂၁) တၠတုဲ သီဂွံလဝ်လွဟ်လက်နက် နူကံၚ်ဇြဳပၞာန် ဗွဲမဂၠိုၚ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ (၁၆) ရ။

ပ္ဍဲပေါဲဗတိုက်ၜါလ္ပာ်ဂှ် ဒပ်ကံၚ်ဇြဳပၞာန် ကၠောန်လဝ်ပရေၚ်ဗတိုက်ပန်ကဵုက္ၜၚ်ကျာ (၆) ဝါ ကေုာံ ပန်ဖျေံလဝ်လွဟ်ဇၞော် (၃၀၀) ဝါပြၚ်ဂှ်ရ လ္ပာ်ဒပ်ပံၚ်ကောံ KNLA သ္ဂံၚ် (၂) တၠ ဒးပြဟ်လလုဲလဝ်တုဲ ဇီုကပိုက်ဒးလဝ်ဘဲဝပ် (၅)တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ဂှ် ပ္ဍဲတ္ၚဲဂှ်ဟေၚ် နူကဵုတံဒဵုလက်ဟတ် က္လေၚ်ဆုတ်တိတ်ဒပ် ပ္ဍဲဗဒိုပ် ဒပ်မၚ်ပယျဵု (BGF) မေတ္တာလေန်မျိုၚ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ဗဒိုပ်တိုၚ်တာဝါဒဵုလက်ဟတ် မၞုံဗ္ဒာဲဍုၚ်ဗြဝတဳ တိဍာ် KNU ဒပ်မဟာ (၆) ပၟိက်ဇၞော်ဒၟံၚ် သွက်ဗျူဟာပၞာန် ကံၚ်ဇြဳပၞာန်ဂှ် ပ္ဍဲဂိတုဂျူလာၚ် စၟတ်တ္ၚဲ (၂၁) တုဲကၠုၚ်တေံ ကရောၚ်ပၞာန်ကဝ်ဗရာ KNLA ၊ ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ် ဗတိုက်သီကေတ်လဝ်ရ။

သွက်ဂွံက္လေၚ်သီကေတ် ဗဒိုပ်တိုၚ်တာဝါ ဒဵုလက်ဟတ်ဂှ် ပ္ဍဲဂိတုအဝ်ဂေတ်မံက်တုဲကၠုၚ်ဏံလေဝ် ကံၚ်ဇြဳပၞာန် ပ္တိတ်ဒၟံၚ်ဇြဟတ် သ္ကာတ်တ်မြဟ်ဟ်တုဲ စဵုကဵုပွိုၚ်ၜါသတ္တာဟပြၚ် က္လေၚ်သီကေတ်ဗဒိုပ်ဂှ် ဟွံမာန်ဏီဖိုဟ်ရ။

နူလ္ပာ်ဒပ်ကံၚ်ဇြဳပၞာန် ဂစာန်ပ္တိတ်ဒၟံၚ်ဇြဟတ် သွက်ဂွံက္လေၚ်သီကေတ်ဗဒိုပ်ဂှ် ဒုအကြာပ်ဒပ်မွဲတၠ ကေုာံ ကောန်ဒပ်မွဲတၠ လုပ်ဖျေံလဝ်လွဟ် ဇရေၚ်ဒပ်ပံၚ်ကောံ KNLA သီုလွဟ်ဇၞော်ဍောတ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Cobra Column