မတ်မလီု – အဝ်ဂေတ်(၁၈)
တွဵုရးဍုၚ်မန်၊ ပ္ဍဲဂၠံၚ်ဇၞော်ကၟိန်ဍုၚ် မတ်မလီု- ရေဝ် – ထဝါဲဂှ် ဒပ်ပံၚ်ကောံ KNLA/PDF တအ် ကေတ်ကဵုဒၟံၚ်ဂီုကၠီု သွက်ညးဍုၚ်ကွာန်အာတရဴတအ် အရိုဟ်ဒဒှ်တ္ၚဲတုဲ စၟဳစၟတ်ဒၟံၚ်ရဂှ် ဒုရုၚ်ဒေသပၞာန်လ္ပာ်၊ ဒေသပၞာန်လ္ပာ် စၟတ်-၃ ရးဒေသသၠုၚ်ကျာ လလောၚ်တြးလဝ်ပရိုၚ် ပ္ဍဲဂိတုအဝ်ဂေတ် စၟတ်တ္ၚဲ (၁၆) ဂှ်ရ။
စၟဳစၟတ်ဒၟံၚ် သွပ်ပရေၚ်ဂီုကၠီုတိဍာ်ကေုာံ ပရေၚ်အုပ်ဓုပ်တိဍာ်ဂှ် နကဵုညးဍုၚ်ကွာန်တအ် ဟိုတ်နူပံၚ်တောဲရေၚ်တၠုၚ်လဝ်ကဵု ဗွဲမဗုအးဂှ်ရ ဒဒှ်ရတၚ်ဂုဏ်ဂှ် သ္ကိုပ်ဒပ် ပ္ဍဲဗလးမုက်တိတအ် ဟီုသ္ဂးလဝ်ရ။
ပ္ဍဲဂိတုအဝ်ဂေတ် စၟတ်တ္ၚဲ (၁၆)တုဲကၠုၚ်တေံဂှ် ပ္ဍဲဗ္ဒာဲဇြပ်အောၚ်သုခ ဗွိုၚ်အောၚ်တပျေ မၞုံပွိုၚ်ဍုၚ်ရေဝ်ဂှ် နူ(၉)နာဍဳနူဂယး စဵုကဵုအခိၚ်ဒေါဝ်တ္ၚဲ (၁၂)နာဍဳဂှ် ကောန်ဒပ်ပံၚ်ကောံတအ် စၟဳစၟတ်ရေၚ်တၠုၚ်လဝ် ကောန်ဒပ်ကံၚ်ဇြဳပၞာန် သုၚ်စောဲကွဳစက်ကောန်အရာပ်တုဲ ပရေၚ်အာကၠုၚ်ဒၟံၚ် နွံ ဟၟဲကီု ပ္ဍိုက်ပ္တိုန်လဝ် မၞိဟ်၊ ကပေါတ်ကညောတ် ဆက်စပ်ကဵုကံၚ်ဇြဳပၞာန် နွံဟၟဲကီု စၟဳစၟတ်လဝ်ရဂှ် ဒေသပၞာန်လ္ပာ် စၟတ်-၃ ရးဒေသသၠုၚ်ကျာ ကဵုလဝ်သမ္တီရ။
နကဵုယာဉ်ကွဳစက် အာကၠုၚ်ဒၟံၚ် ပ္ဍဲဂၠံၚ်မတ်မလီု၊ မုဟ်ဍုၚ်၊ ရေဝ်၊ ဇြပ်ဗု၊ ထဝါဲ၊ ဗိက်တအ်ဂှ် အခိၚ်ကောန်ဒပ် KNLA တအ် စၟဳစၟတ်မ္ဂး ညံၚ်ဂွံဒုၚ်စၟဳစၟတ် နစိုတ်ဗုဗုအးအးကီု၊ ညံၚ်ဟွံဂွံပ္ဍိုက်ဏာနၚ် မၞိဟ်/ကပေါတ်ကညောတ်ဆက်စပ်ကဵုကံၚ်ဇြဳပၞာန်ကီုဂှ်လေဝ် ဟီုလဝ်ရ။
နကဵုညးဍုၚ်ကွာန်တအ်ဂှ် ညံၚ်ဟွံဂွံဍိုက်ပါဗက်ကၠုၚ် ယာဉ်ကွဳစက်ကံၚ်ဇြဳပၞာန်ပိုၚ်ကီု နကဵုယာဉ်ကွဳစက် ဂကောံရပ်လွဟ်ကောန်ဍုၚ်အရၚ်တၞဟ်တအ် သုၚ်စောဲဒၟံၚ်တအ်ဂှ်လေဝ် သွက်ဂွံဒုၚ်စၟဳစၟတ် နစိုတ်ဗုဗုသ္အးသ္အးကီုဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဒုရုၚ်ဒေသပၞာန်လ္ပာ်၊ ဒေသပၞာန်လ္ပာ် စၟတ်-၃ ရးဒေသသၠုၚ်ကျာ(J.O.C)ရ။
ပရိုၚ် – သြၚ်လောန်တိုၚ်(မ်)
ဗီုရုပ် – J.O.C
sanlontai