ရပ်စပ် ကောန်ဍုၚ်သ္အာၚ် ၁၀ တၠတုဲ ပိုန်ဒြပ်မၞုံကဵုၚုဟ်မး လှုဲသေန်ကာပေါဝ်ဂၠိုၚ်ကဵုလ္ၚီပြကောဋိကိုဋ်ဂှ် ဂကောံဒပ်ဗၠာဲသၟိၚ်တံ သီဂိုၚ်လဝ်

သေန်ကာပေါဝ်၊ အဝ်ဂါတ် (၁၈)

ပ္ဍဲဍုၚ်သေန်ကာပေါဝ် အပ္ဍဲကဵုပရေၚ်ဂၠိုက်ဂၠါဲ ပရေၚ်ဖအိုတ်ကၠေံသြန်ဟွံသ္အးဇ္ၚးဂှ် ဂကောံဒပ်ဗၠာဲသၟိၚ်တံ ရပ်ထိၚ်ဂွံလဝ် ကောန်ဍုၚ်သ္အာၚ် ၁၀ တၠတုဲ သီဂိုၚ်ဂွံလဝ် ကပေါတ်မၞုံကဵုၚုဟ်မး သေန်ကာပေါဝ်ဒဝ်ဠာ ၁ ဗဳလျာန် ပါလုပ်သီုကဵု မသြန်လှုဲ၊ တိသ္ၚိကၠအ်၊ ကွဳစက်ကဆံၚ်သၠုၚ်ၚ် ကေုာံ ပိုန်ဒြပ်တၞဟ်ဟ်ဂမၠိုၚ်တံရ။

အတိုၚ်တၚ်လလောၚ်တြး ဒပ်ဗၠာဲသၟိၚ်တံဂှ်မ္ဂး မွဲဒမြိပ်ဍုၚ်ဇၞော်ကၟိန်ဍုၚ်ဂှ် ကၠောန်သ္ပလုပ်စိုပ်ဍိုက်ဗ္တိုက်လဝ် မွဲအခိၚ်ဓဝ်တုဲ ရပ်ဂွံလဝ် ညးတၠဒုဟ်မၞုံကဵုသံသယတံဂှ်လေဝ် ဂွံတီကေတ်ရ။

ၚုဟ်မးအပံၚ်ဖအိုတ် ချိၚ်ခယျကေတ်ဂှ် သေန်ကာပေါဝ်ဒဝ်ဠာ ၈၁၅ ပြကောဋိကိုဋ်ပြၚ်၊ ပိုန်ဒြပ်အရပ်ရာ ၉၄ သာ် ကေုာံ လၟိဟ်ကွဳစက်ယာန် ၅၀ ဖ္ဍိုက်တံဂှ် ဒဒှ်ရကၟာတ်လဒဵုဂှ်လေဝ် ပ္တိတ်လဝ်အမိၚ်ရ။

သ္အာၚ်နူဂှ်ပၠန် လိက်တၞးစၟတ်သမ္တီ မထ္မံက်ထ္ၜးလဝ် ပိုန်ဒြပ်ဂမၠိုၚ်၊ အကံက်ဗာန်၊ မသြန်၊ ထိုၚ်ၚုဟ်မးဇၞော်ဇၞော်၊ ထဝ်သြန်၊ နာဍဳတဲ၊ ကပေါတ်ကိရိယာဓာတ်လလဳတံဂှ်လေဝ် ပါလုပ်ဒၟံၚ် ပ္ဍဲကဵုအရာမသီဂိုၚ်လဝ်တံရောၚ် သ္ဂးရ။

အတိုၚ်ဒပ်ဗၠာဲသၟိၚ်သေန်ကာပေါဝ် ဟီုဂးလဝ်ဂှ်မ္ဂး ကောန်ဍုၚ်သ္အာၚ် မဒးဒုၚ်ရပ်လဝ်ဂမၠိုၚ်ဝွံ အာယုက်မၞုံ နူကဵု ၃၁ စဵုကဵု ၄၄ သၞာံတံတုဲ ဒှ်ရဲနူကဵုဍုၚ်ကြုက်၊ တူရကဳ၊ သိုက်ပရာသ်၊ ကာမ္ဗောဒဳယျာ၊ ဗာန်နျူယာကျူတံရောၚ်ဂှ် ဂွံတီကေတ်ရ။

စပ်ကဵုကိစ္စဏံတုဲ ပ္ဍဲကဵုတၚ်လလောၚ်တြးတၞဟ်ခြာမွဲဂှ် တိုက်သြန်ဗဟဵုသေန်ကာပေါဝ်ဂှ် လၟေၚ်ဒဒှ်ဏံဝွံ ဆက်စပ်ဒၟံၚ်ကဵု ဂကောံသြန်လှုဲ (FIS) သြန်ဗွဝ်သ္အးသ္အးဇ္ၚးဇ္ၚးဟွံသေၚ်တံ ဒှ်မာန်ဂှ် သ္ၚဳဂၠိပ်လဝ်တုဲ ယၟုဂကောံဗော်သွးတံဂှ် ထ္မံက်ပ္တိတ်ဟီုဂးလဝ် ဟွံမွဲရ။

Ref; Reuters