ၜဳကလေၚ်၊ အဝ်ဂါတ် (၁၈)
ဟိုတ်နူဘဲဍာ်ဇၞော် မက္တဵုဒှ်လဝ် အပ္ဍဲပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ တိဗ္ၚသြောံကသီု မလီုလာ်ဆောံလေၚ်အာ ဗ္ဒါဲ ၃၀၀၀၀ သွက်ဂွံကလေၚ်ပတမ်ဂှ် ဒှ်ဒၟံၚ်အခက်အခုဲရောၚ် သၟာဗ္ၚတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုအဝ်ဂါတ်မံက် တုဲကၠုၚ်တေံ ဟိုတ်နူဗြဲဂူဆက်ဒၟံၚ်ဂှ်တုဲ ပ္ဍဲကဵုပွိုၚ်ဍုၚ်ကျာ်မြဟ်၊ ကျာ်ထဝ် ကေုာံ ၜဳကလေၚ် တွဵုရးဍုၚ်မန်တံဂှ် ဘဲဍာ်ဇၞော်က္တဵုဒှ်လဝ်တုဲ တိဗ္ၚသြောံကသီုဂၠိုၚ်ကဵုဠက် လီုလာ်ဆောံလေၚ်အာလဝ်ရ။
ပၞောဝ်ကဵုဏံ ပ္ဍဲကဵသြောံကသီု ပွိုၚ်ဍုၚ်ၜဳကလေၚ် (၉၀၀၀၀) ဨကပြၚ် မဒးဆေၚ်လဝ်မုက် ဘဲဍာ်ဗၠိုက် ဗ္ဒါဲ ၂ သတ္တာဟဂှ် တိဗ္ၚၜိုတ် (၃၀၀၀၀) ဨကဝွံ ကြပ်သီုဖအိုတ် လီုလာ်ဆောံလေၚ်က္တဵုဒှ်လဝ်ရောၚ် ဂွံတီကေတ် အတိုၚ်ဂလာန်သၟာဗ္ၚတံရ။
အခိၚ်လၟုဟ် သွက်ဂွံကလေၚ်ပတမ် သြောံကသီု မလီုအာတံဂှ် ဟွံဂတာပ်အခိၚ်ရတုဲ သွက်ဂွံတဵုပၠောမ် နကဵုသၞောတ်မဟရာတ်ဂှ်လေဝ် နွံပၟိက်ဒၟံၚ်သြောံမတံဂှ်ရ ဒှ်ဒၟံၚ်အခက်အခုဲရောၚ်ဂှ် သၟာဗ္ၚမွဲတၠ ဟီုရ။
“ဍာ်ဇၞော်လဝ်ၜါအလန်၊ အလန်ကၠာဂှ် ဗၠိုက်အာၜိုတ် (၇) တ္ၚဲ၊ လ္ပာ်ကုန်တံဂှ် ၜိုတ်မွဲၜါတ္ၚဲ ကလေၚ်မံက်ကၠုၚ်ပၠန်။ မွဲအလန်ပၠန်ဂှ် သာတုဲဍာ်ဇၞော်ဂၠိုၚ်ရ၊ ဗၠိုက်အာ (၁၀) တ္ၚဲ (၁၁) တ္ၚဲ ၜါသတ္တာဟဟီုတှ်ေ အိုတ်အာဟဂှ်ရ။ သၟာဗ္ၚလ္ၚဵုတံတှ်ေ ကၠာဂွိုအ်တဵုပလုမ်ဂှ် ဒးဆောံလေၚ်အာရ။ လ္ၚဵုဂှ်တှ်ေ တဵုတုဲမှ ဒးဆောံလေၚ်အာအိုတ်တး။ မဂၞန်မွဲအဓိကဂှ်တှ်ေ နွံပၟိက်ကဵုမရ။ ခရိတ်အိုတ်ဂှ်တှ်ေ ဗီုဇကုကဵုဇကု ဂၠါဲကေတ်တ်တုဲ သွက်ဂွံကလေၚ်တဵုလွဳပၠန်ဂှ် သၟာဗ္ၚတံ ချပ်တိုန်ရ၊ ဂွံတဵုလွဳဂှ် ဟွံဂတာပ်ရပုဟ်၊ တဵုမ (သီးထပ်) မ္ဂး ဒးဂြာတ်ကေတ် မဟရာတ်ရဏောၚ်။ ပိုယ်သၟာဗ္ၚတံဂှ် ကဵုၚုဟ်က္ဍၚ်က္ဍၚ်တုဲ ဒးဗက်ရာန်ဒၟံၚ်သြောံမတံဂှ်ရ။ သၟာဗ္ၚလ္ၚဵုတံမ္ဂးလေဝ် ရာန်ဟွံမာန်တုဲ ဒးဂ္ဇအ်ဗဵုဒၟံၚ်ရ “ သာ်ဝွံ သ္ဂးရ။
သွက်ဂွံကလေၚ်ပတမ်မ သြောံကသီု မလီုလာ်အာ အပ္ဍဲဍာ်ဗၠိုက်တံဂှ်တုဲ ပ္ဍဲဒၞါဲဒးရာန်မတံဂှ်လေဝ် ၚုဟ်က္ဍၚ်ကီု၊ ၚုဟ်ကပေါတ်တမ်တံ သၠုၚ်တိုန်ဒၟံၚ် ဂၠိုၚ်ကဵုဆဂှ်ရ သၟာဗ္ၚလ္ၚဵု ဟွံကလေၚ်တဵုပလုမ်အိုတ်ရပုဟ်ဂှ် ညးဆက်ဟီုရ။
သၟာဗ္ၚမွဲတၠဂှ်ပၠန်လေဝ် ဟိုတ်နူဘဲဍာ်ဇၞော်တုဲ တိဗ္ၚသြောံကသီု ဗ္ဒါဲ (၁၀၀) တၟံကၠံ လီုလာ်အာလဝ်ကီုလေဝ် ဒဵုကဵုအခိၚ်လၟုဟ် ဌာနတဵုလွဳ ကံၚ်ဇြဳပၞာန်တံ ကၠုၚ်စိုပ်ရီုဗၚ်ကဵုလဝ် ဟွံမွဲဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍာ်ဗၠိုက်ဒၟံၚ်လၟုဟ်ဂှ်တှ်ေ ၜိုတ် ၉၀ တၟံကၠံဂှ် ချိုတ်အာအိုတ်ယျ။ သြောံတံ လီုအာအိုတ်ရ။ သွက်ဂွံကလေၚ်ပတမ်မဂှ် ဟွံဂွံအခိၚ်ပုဟ်။ ဒဵုကဵုအခိၚ်လၟုဟ်ဂှ် ဍာ်ဟွံမံက်ဏီပုဟ်။ ကလေၚ်ပတမ်ဏောၚ်မ္ဂးလေဝ် အခက်အခုဲဂှ်နွံရ။ လၟုဟ်ရဂှ် စိုပ်ဒၟံၚ်ဂိတုခ္ဍတ်သဳယျတှ်ေ ပလုမ်မမ္ဂးလေဝ် ဟွံဂတာပ်ရပုဟ်။ ဂြာတ်မဟရာတ်ပၠန်မ္ဂးလေဝ် ဟွံချိုတ်ပၠိုတ်စကွေံပုဟ်။ လၟုဟ်မ္ဂး သီုကဵုၚုဟ်မ ၚုဟ်ပတမ်တံ မုတံဂှ်မ္ဂး မၞိဟ် (၁၀) ဨကနွံဂှ်တှ်ေ ၜိုတ် (၆၀) ကိုဋ်အိုတ်ဏောၚ်။ မွဲဨက ဒတုံအာ ၜိုတ် (၆) ကိုဋ်ရ။ (၁၀) ဨကတှ်ေ ဒှ်အာၜိုတ် (၆၀) ကိုဋ်ဒ္ကေဝ်ရ။ ညအ်ဂှ် ဒဵုကဵုအခိၚ်လၟုဟ် ပိုယ်တံမုဟွံမိၚ်ဏီပုဟ်။ ကၠုၚ်စိုပ်ရံၚ်တံဂှ်လေဝ် ဟွံမွဲပုဟ်၊ ကံက်စရၚ်တံ မုတံဂှ်လေဝ် ဟွံမွဲပုဟ်။ ကၠောန်ကဵုဏောၚ်ဂှ် ဟွံညာတ်ပုဟ်“ သာ်ဝွံ သ္ဂးတဴရ။
ဟိုတ်နူဍာ်ဇၞော်ဍာ်ဗၠိုက်သာ်ဏံတုဲ သြောံကသီုလီုလာ်ဂၠိုၚ်လဝ်ဂှ်ရ ပ္ဍဲကဵုရာသဳသြောံတိတ်ကၠုၚ်စိုပ်ဏံ ဒမြိပ်တိတ် ယအ်စှ်ေကၠုၚ် တီတီတုဲ ၚုဟ်သြောံတံဂှ်လေဝ် ထပ်တိုန်ကၠုၚ်မာန်ရောၚ် သၟာဗ္ၚတံ သ္ၚဳဂၠိပ်ဒၟံၚ်အိုတ်ရ။
ပ္ဍဲလက်ထက်အလဵုအသဳတုဲကၠုၚ်တေံ ယဝ်ရဍာ်ဇၞော်ဍာ်ဗၠိုက် က္တဵုဒှ်တုဲမ္ဂး သွက်ဂွံကလေၚ်တဵု သြောံကသီု မဇီုကပိုက်လီုလာ်အာတံဂှ် ထံက်ပၚ်ကဵုမတံဂှ်ကီု သွံတြးကဵုဝါဲဓာတ်တံ နကဵုၚုဟ်ဒးဒးဂှ်ကီု သာ်ဏံတံ နွံကီုလေဝ် ပ္ဍဲကဵုလက်ထက်ကံၚ်ဇြဳပၞာန်ဏံ ရီုဗၚ်ရေၚ်တၠုၚ်ကဵုလဝ် ဟွံမွဲရပုဟ်ဂှ် သၟာဗ္ၚတံ သ္ဂးအိုတ်ရ။
တွဵုရးဍုၚ်မန်ဝွံ ဒှ်တွဵုရး တိဗ္ၚမၞုံ ဗ္ဒါဲ ၇ ကိုဋ်ဨကမွဲတုဲ လၟေၚ်သၞာံသြောံတိတ်ဒၟံၚ် ၄၃၀ ကိုဋ်နပြၚ်နွံတုဲ သြောံတိတ်ကၠုၚ်တံဂှ် ဗုတ်တုဲ ပလံၚ်ပ္တိုန်သွံတြးဒၟံၚ် ရးဒေသ ကေုာံ တွဵုရးလ္ၚဵုတံရ။
ဆ္ဂး ကြဴနူဒပ်ပၞာန်သီအဝဵုတုဲ ၚုဟ်သ္ၚုဂှ် တိုန်ကၠုၚ် ဗ္ဒါဲ ၃ ဆဂှ်ရ ဘဲဒဏ်ၚုဟ်က္ဍၚ်တံဂှ် ညးဍုၚ်ကွာန်တံ ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai