ဒပ်ပၞာန်ဂြာတ်ထောံဖျေံဗုမ် ပ္ဍဲဘာကျာ်ခရေတ်ယာန် ဖရူဇြော ကဵုက္ၜၚ်ကျာ

ဖရူဇြော – အဝ်ဂေတ်(၁၉)

တွဵုရးကရေၚ်ဍာဲ၊ ဘာကျာ်ခရေတ်ယာန် ဒၞာဲပ္တဝ်က္ဍိုပ်ပၞာန်ဟွံသေၚ် ပ္ဍဲကွာန်ထဳတဝ်ကူ ပွိုၚ်ဍုၚ်ဖရူဇြောမွဲဘာဂှ် ဟိုတ်နူကံၚ်ဇြဳပၞာန် ဂြာတ်ထောံဖျေံဗုမ် ကဵုက္ၜၚ်ကျာတုဲ ပရေၚ်ဇီုကပိုက်လီုလာ် နွံလဝ်ရဂှ် KNDF လလောၚ်တြးလဝ်ပရိုၚ်ရ။

ဂိတုအဝ်ဂေတ် စၟတ်တ္ၚဲ (၁၂)တုဲကၠုၚ်တေံ အခိၚ်ဗ္တံ ၜိုတ် (၈)နာဍဳဂှ် ဟိုတ်နူဂြာတ်ထောံဖျေံဗုမ်ကဵုက္ၜၚ်ကျာပၞာန်တုဲ မ္ၚးနူစမြိုၚ်ဘာကျာ် “တနာချေန်မေဝ်တဝ်” နူကွာန်ထဳတဝ်ကူတုဲ သီုစမြိုၚ် ကေုာံ ကၟာၚ်ဍိုတ် ပ္ဍဲအရှာမ်ဘာကျာ်ဂှ် ဒးဆဵုဂဗလဝ် ပရေၚ်ဇီုကပိုက်လီုလာ်ရ။

ကြဴနူပေါဲဗတိုက်ဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတအ် ဒှ်လဝ်ပေါဲဗတိုက် ဗ္ဒာဲကွာန်ဂှ်တုဲ အခိၚ်က္လေၚ်ညိၚ်ဝတ်ၜိုဟ်လလံကၠုၚ်ဏံ ဂြာတ်ထောံဖျေံဗုမ် ကဵုက္ၜၚ်ကျာတုဲ ဗတိုက်လဝ်ရဂှ် ဂွံတီကေတ်ရ။

ပရေၚ်ကံၚ်ဇြဳပၞာန်ဂြာတ်ထောံဖျေံဗုမ်ဗတိုက်လဝ်ဏံဂှ် စိုပ်ဂိတုအဝ်ဂေတ် စၟတ်တ္ၚဲ (၁၈)ဏံမှ ဂွံလလောၚ်တြးမာန်ဂှ် အတိုၚ်အကာဲအရာပၞာန် ပ္ဍဲဗလးမုက်တိ ကေတ်စၟတ်သမ္တီတုဲ ဂွံလလောၚ်တြးမာန်ရဂှ် ဓမံက်လဝ် ပ္ဍဲတၚ်လလောၚ်တြး KNDF ရ။

ဟိုတ်နူတံဒပ်သၟဝ်တဲကံၚ်ဇြဳပၞာန် ၝောံဒပ် – ၅၅ ထ္ပက်ကၠုၚ်ဒၟံၚ်ကရောၚ်ပၞာန် ပ္ဍဲဂၠံၚ်ဇၞော်ကၟိန်ဍုၚ် ဒဳမအ်ဇြော-ဖရူဇြောဂှ်ကဵု ဒပ်ပံၚ်ကောံ ပၠန်ဂတးတအ် ပေါဲဗတိုက်ဆေၚ်မုက် က္တဵုဒှ်ဒၟံၚ်ဂှ်ရ ညံၚ်ညးဍုၚ်ကွာန်တအ် ဟွံဂွံသုၚ်စောဲဂၠံၚ်ဇၞော်ကၟိန်ဍုၚ် ဒဳမအ်ဇြော-ဖရူဇြောဂှ် KNDF ကဵုလဝ်သတိရ။

ဒပ်ကံၚ်ဇြဳပၞာန်သီအဝဵုဂှ် ဘာလ္ၚောဝ်ကျာခရေတ်ယာန် ကေုာံ စမြိုၚ်ပရေၚ်ဘာသာ ဒၞာဲပ္တဝ်က္ဍိုပ်ပၞာန်ဟွံသေၚ်တအ်ဂှ် ဟိုတ်နူဂြာတ်ထောံဖျေံဗုမ် ကဵုက္ၜၚ်ကျာ၊ ပန်ဖျေံဒၟံၚ်လွဟ်ဇၞော် ဗတိုက်ဒၟံၚ်တုဲ ပရေၚ်ဇီုကပိုက်လီုလာ်လဝ်နွံတုဲ ပရေၚ်ကောန်အရာပ် ဒးချိုတ်လဝ်လေဝ် နွံဒၟံၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ်- KNDF