ဗြဝတဳ၊ အဝ်ဂါတ်(၂၂)
ပ္ဍဲဂၠံၚ်အာယှ ဗြဝတဳ-ကအ်ကြိက် တွဵုရးကရေၚ် ဒှ်ဂၠံၚ်ဆက်စၠောံဗၞိက် သေံ-ဗၟာဂှ် ဟိုတ်နူ ကွဳစက်ပ္ဍိုက်ညးအာတရဴမွဲဖ္ဍိုက် ဒးဒုၚ်ဗတိုက်လဝ်တုဲ ကောန်အရာပ်ညးဍုၚ်ကွာန် (၄)တၠ ဇီုကပိုက်ဒးလဝ်ဘဲဝပ်ရဂှ် ညးဒေသကီု သီုဂကောံရီုဗၚ်ဟံၚ်ပြာ်မၞိဟ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုအဝ်ဂါတ် စၟတ်တ္ၚဲ (၂၀) တုဲကၠုၚ်အခိၚ်နူဂယး ၜိုတ် (၁၁) နာဍဳဂှ် ယာဉ်ကွဳစက်ပ္ဍိုက်ညးအာတရဴ အာန်ဇြာတုံ ညးအာတရဴ ပါလုပ် (၁၅) တၠ နူဗြဝတဳ စှ်ေကၠုၚ်လ္ပာ်ကအ်ကြိက်ဂှ် ဒးဒုၚ်ဗတိုက်လဝ် ဗ္ဒာဲဆေၚ်စသုၚ်ဒေါနသစ္စာ ဂၠံၚ်အာယှ ဗြဝတဳ – ကအ်ကြိက်ဂှ်ရ။
ဟိုတ်နူကွဳစက်ပ္ဍိုက်ညးအာတရဴ ဒးဒုၚ်ဗတိုက်လဝ်တုဲ မောၚ်သာန်လေန်အောၚ် အယုက် (၂၃) သၞာံ၊ ကိုဝ်သိုဝ်မေန်အောၚ် အယုက် (၃၅) သၞာံ၊ ကိုဝ်ထုၚ်လေန် အယုက် (၄၅) သၞာံ ကေုာံ မနာန်လွေန်ၚေန် အယုက် (၁၉) သၞာံ ဍိုက်ပါဗက်ကၠုၚ်ကွဳစက်တအ်ဂှ် ဒးလဝ်ဘဲဝပ် လွဟ်မကမ်ရ။
ပ္ဍဲပရေၚ်ဗတိုက်ပန်ဏံ ကွဳစက်ပ္ဍိုက်ညးအာတရဴ ဇီုကပိုက်ဒးလီုလာ်လဝ် လ္ၚဵုဂှ်နွံတုဲ ပ္ဍဲကွဳစက် သၠာ (၁၂) ပ္ဍိုက်ယာဉ်ကွဳစက်ဗေတ်ဟိုဝ်လေဝ် အခန်က္ဍိုပ်ကွဳစက် ဒးလဝ်လွဟ်ဇၞော်တုဲ ပရေၚ်လီုလာ် က္တဵုဒှ်လဝ်ရ။
ညးအာတရဴဒးလဝ်ဘဲဝပ်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲဗြဝတဳ နအရီုဗၚ်ဂကောံရီုဗၚ်ဟံၚ်ပြာ်မၞိဟ်တအ်ရဂှ် ဂွံတီကေတ်ရ။
ပ္ဍဲဂၠံၚ်အာယှ ဗြဝတဳ-ကအ်ကြိက် ပဋိပက္ခပၞာန် ကြံၚ်မ္ၚိုဟ်ဒၟံၚ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ်ဂှ် ဟိုတ်နူပရေၚ်ပရေၚ်ပန်ပှော်ဒးကွဳစက်ညးအာတရဴတအ် ဗၠေတ်မှာတုဲ ညးဍုၚ်ကွာန်အာတရဴတအ် ဇီုကပိုက် ဒးချိုတ်လဝ် နွံဒၟံၚ်ရ။
ဗ္ဒာဲဒဒန်တဝ်နဝ် ဂၠံၚ်အာယှ ဗြဝတဳ-ကအ်ကြိက်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၇) တုဲကၠုၚ်တေံ ဟိုတ်နူဗြဲဂူတြိုပ်စှ်ေတုဲ တိဒဵုခရိုဟ်လာ်စှ်ေလဝ်ဂှ် သ္ကုတ်ဂၠံၚ်ပိုတ်သ္ကုတ်အာလဝ်တုဲ အခိၚ်လၟုဟ်ဏံ ကဵုလဝ်အခေါၚ် ကွဳစက်အဇာဍောတ်လ္ၚဵုတအ် တတ်ကၠောံအာကၠုၚ်ရဂှ် ဂွံတီကေတ် နူညးအာတရဴတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် -CJ
sanlontai